ଅମରପାଲି, ୨୨।୫ (ଡି.ଏନ୍.ଏ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ବହଲପଦର ପଁଚେତ୍ ଅମରପାଲି ଗଁାର ଦଧି ବାଘ(୬୦) କିଡ଼୍ନୀ ରୋଗ୍ରେ ପୀଡ଼ିତ ଅଛନ୍। ସେ ଝନେ ନିହାତି ଗରିବ୍ ଲୋକ ହେଇଥିଲା ବେଲେ ଟଁକା ପଏସା ଅଭାବୁ ଉଷୋକଷା ଘିନି ଖାଇ ନାଇଁ ପାରବାର। ଯେନ୍ଥିରଲାଗି ରୋଗ୍ କମବାର ଜାଗାରେ ଦିନୁଦିନ୍କେ ବଢ଼ତେଲ ଯାଉଛେ। ତାକର ପାସେ ବିଜୁ ସ୍ବାସ୍ଥ୍ୟ ବୀମା ଯୋଜନାର କାର୍ଡ ଥିଲେ ବି କାମେ ନାଇଁ ଲାଗବାର ବଲି ସେ ଅଭିଯୋଗ କରିଛନ୍।
ସୂଚନା ହିସାବେ ଅମରପାଲିର ଦଧି ବାଘକଁର ପରିବାର କହେଲେ ମାଏକିନା, ଆର ୪ ଝି’କେ ନେଇ ତାକର ସଁସାର। ଉପରର ଦୁଇ ଝି’କେ ଦୁଖ୍ସୁଖ୍ କରି ବିହାଚୁରା କରିଛନ୍। ସେ ନିହାତି ଗରିବ୍, ଜମି କହେଲେ ଅଧ୍ ଏକର ରହିଛେ। ଏନ୍ତାଥି ସେ କୁଲି ମଜୁରି କରି ନିଜର କୁଟୁମ ପୁଷୁଥିଲେ। ଗଲା ଜାନୁୟାରୀ ମାସେ ତାହାକୁ ଲଗାତାର ଜର ହେଲା। ସେ ବୀରମହାରାଜପୁର, ସୋନପୁର ଆର ବଲାଙ୍ଗୀର ଡାକତରଖାନାକେ ଯାଇ ଚିକିସତ୍ା କରାଲେ। ହେଲେ ଦିହିପା ଭଲ ନାଇଁ ହେଲା, ସମ୍ବଲପୁର ଡାକ୍ତରଖାନା ଯାଇ ପରୀକ୍ଷା ନିରୀକ୍ଷା କଲେ। ସେଠାନେ ସେ କିଡ଼୍ନୀ ରୋଗ୍ରେ ଆକ୍ରଁାତ ଥିବାର ଜାନବାକେ ପାଏଲେ। ଶେଷେ ଚିକିସତ୍ା ଲାଗି ସେ ବୁର୍ଲା ଡାକ୍ତରଖାନାରେ ୧୫ ଦିନ୍ ଭରତି ହେଇ ଚିକିସତ୍ିତ ହେଲେ। ଏନ୍ତା ପରିସ୍ଥିତିରେ ଘରେ ଥିବାର ଦୁଇ ଅବିହାରି ଝି’ କୁଲି ମଜୁରି କରି ପରିବାର ଚଲାବାର ସଂଗେ ବାପର ଚିକିସତ୍ା ଖରଚ୍ ତୁଲଉଛନ୍। ଦଧିର ଚିକିସତ୍ା ଲାଗି ଜମିବାଡ଼ି ଯାହାଥିଲା ଗହନା କରି ପରିବାଟା ସରବ୍ସୁଅଁାତ ହେଇଯାଇଛନ୍। ତାକର ବିଜୁ ସ୍ବାସ୍ଥ୍ୟ ବୀମା ଯୋଜନାର କାର୍ଡ ବି ରହିଛେ। ହେଲେ ଦଧି ଚିକିସତ୍ା ବେଲେ କାର୍ଡର କିଛି ଲାଭ ନାଇଁପାଇ। ଏନ୍ତା କି ତାହାକୁ ମାହାଲିଆ ଉଷୋକଷା ନାଇଁ ମିଲିଥିବାର ସେ ଅଭିଯୋଗ କରିଛନ୍। ଏହେଦେ ବି ରୋଗ୍ ଦାଉ ସାଧୁଛେ, ସେଥିରଲାଗି ଲାଗବରମସ କରି ସେ କଟକରେ ଚିକିସତ୍ା କରଉଛନ୍। ହେଲେ ଟଁକା ପଏସା ଅଭାବୁ ଉଷୋ ଘିନି ଖାଇ ନାଇଁପାରବାର। ସେନ୍ତା ଦଧି ଅଂଚଲର ଝନେ ନଁା କରା ସଂକୀରତନ କଳାକାର। ହେଲେ ତାହାକୁ ୬୦ ଟପିଥିଲେ ବି ଆଏଜତକ୍ କଳାକାର ଭତା ପାଏବାରୁ ବଁଚିତ ଅଛନ୍। ସୂଚନା ଅନ୍ସାରେ ଅମରପାଲି ଗଁାରେ ଦିନୁଦିନ୍କେ କିଡ଼୍ନୀ ରୋଗ୍ ବହପୁଛେ। ଇ ଦିଗେ ଅଭିଯୋଗ କଲେ ବି ସୁଆସ୍ତିଅ ବିଭାଗ କେହେନ୍ସି ପରକାର ପଦକ୍ଷେପ ନାଇଁ ନେଉଥିବାର ଗଁାବାସୀ ଅଭିଯୋଗ କରିଛନ୍। ବଛର କେତେଟା ଭିତରେ ଗଁାର ୧୦ରୁ ୧୫ ଝନ୍ କିଡ଼୍ନୀ ରୋଗ୍ରେ ମରି ସାରିଛନ୍, ଏହେଦେ ୪୦ରୁ ଅଧ୍କା ଲୋକ୍ ପୀଡ଼ିତ ଥିବାର ଜନାଯାଇଛେ। ଇ ଦିଗେ ଜିଲା ପରଶାସନ, ସୁଆସତିଅ ବିଭାଗ ଧିଆନ୍ ଦେଇ ଯେତେ ଜଲଦି ହେବା ପଦକ୍ଷେପ ନେବାର ସଂଗେ ଦଧିକେ ଚିକିସତ୍ା ସାହାଯ୍ ଯୁଗେଇ ଦେବାକେ ଦାବି ହେଉଛେ।
