ଢେଙ୍କାନାଳ ଅଫିସ, ୨୮।୨ – ଢେଙ୍କାନାଳ ସମଗ୍ର ଶିକ୍ଷା କାର୍ଯ୍ୟାଳୟର ସଭାଗୃହରେ ଗୁରୁବାର ପୂର୍ବାହ୍ନରେ ଜିଲାସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ଭୂମେଶ ଚନ୍ଦ୍ର ବେହେରା ଏଥିରେ ଅଧ୍ୟକ୍ଷତା କରିଥିଲେ। ଦଳଗତ ପ୍ରୟାସ ଜାରି ରଖି ଢେଙ୍କାନାଳକୁ ଶ୍ରେଷ୍ଠ ଜିଲାରେ ପରିଣତ କରିବାକୁ ସେ ଉପସ୍ଥିତ ଅଧିକାରୀଙ୍କୁ ଆହ୍ବାନ ଦେଇଛନ୍ତି।
ସାଥ୍-ଏ ଟିମ୍ ପକ୍ଷରୁ ଜାନୁୟାରୀରେ ହୋଇଥିବା ସର୍ବେକ୍ଷଣରେ ଢେଙ୍କାନାଳ ଜିଲା ରାଜ୍ୟରେ ୫ମ ସ୍ଥାନରେ ରହିଥିଲା। ସର୍ବେକ୍ଷଣରେ ସାମିଲ କରାଯାଉଥିବା ବିଭିନ୍ନ ମାନକ (ଇଣ୍ଡିକେଟର) ଉପରେ ଜିଲାପାଳ ବୈଠକରେ ଉପସ୍ଥିତ ବିଇଓଙ୍କ ସହ ଆଲୋଚନା କରିଥିଲେ। ଇଣ୍ଡିକେଟର ଅନ୍ତର୍ଭୁକ୍ତ ଖର୍ଚ୍ଚ ସମ୍ପର୍କିତ ବିନିଯୋଗ ପ୍ରମାଣପତ୍ର, ପାନୀୟ ଜଳ ଯୋଗାଣ, ବିଦ୍ୟାଳୟ ମିଶ୍ରଣ, ଯୁକ୍ତିସଙ୍ଗତ ଶିକ୍ଷକ ଆବଣ୍ଟନ ଆଦି ବିଷୟର ସମାଧାନ ବ୍ୟକ୍ତିଗତସ୍ତରରେ କରିବାକୁ ଜିଲାପାଳ ବିଇଓମାନଙ୍କୁ ନିର୍ଦ୍ଦେଶ ଦେଇଥିଲେ। ଏଥିସହ ସ୍କୁଲଗୁଡ଼ିକରେ ଶତ ପ୍ରତିଶତ ବିଦ୍ୟୁତ୍ ସଂଯୋଗ, ଶୌଚାଳୟ ପରିଷ୍କାର, ଆଧାର ପଞ୍ଜୀକରଣ, ଦ୍ୱିତୀୟ ପର୍ଯ୍ୟାୟ ଗରିମା ରୌପ୍ୟ ଆକଳନରେ ସମସ୍ତ ବ୍ଲକ ଉନ୍ନତ ପ୍ରଦର୍ଶନ, ଛାତ୍ରୀଛାତ୍ର ଏବଂ ଶିକ୍ଷକଙ୍କ ନିରନ୍ତର ଉନ୍ନତି ଦିଗରେ ଦୃଷ୍ଟି ଦେବାକୁ ଜିଲାପାଳ ପରାମର୍ଶ ଦେଇଛନ୍ତି। ଜାନୁୟାରୀରେ ହାରାହାରି ସଫଳତା ମାନକରେ ପରଜଙ୍ଗ ବ୍ଲକ ଜିଲାରେ ପ୍ରଥମ ଏବଂ ରାଜ୍ୟରେ ୩୦ତମ ସ୍ଥାନ ହାସଲ କରିଛି। ଅଗ୍ରଗାମୀ ବ୍ଲକ ଭାବେ କାମାକ୍ଷାନଗର ଜିଲାରେ ୩ୟ ଏବଂ ରାଜ୍ୟରେ ୫୩ସ୍ଥାନ ହାସଲ କରିଛି। ସମ୍ପୃକ୍ତ ୨ବ୍ଲକର ଗୋଷ୍ଠୀ ଶିକ୍ଷାଧିକାରୀ ଏବଂ କର୍ମଚାରୀଙ୍କ ଉଦ୍ୟମକୁ ଜିଲାପାଳ ପ୍ରଶଂସା କରିଛନ୍ତି। ସେମାନଙ୍କୁ ଉତ୍ସାହିତ କରିବା ସହ ପ୍ରଶଂସାପତ୍ର ପ୍ରଦାନ କରାଯାଇଛି।
ବୈଠକରେ ଡିଇଓ ତଥା ପ୍ରକଳ୍ପ ସଂଯୋଜିକା ନିବେଦିତା ପାଣି, ଜିଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନର ଅଧ୍ୟକ୍ଷ ସଚ୍ଚିଦାନନ୍ଦ ମିଶ୍ର, ସାଥ୍ ଟିମ୍ର ତେଜସ୍ବିନୀ ପାଣିଗ୍ରାହୀ, ସମସ୍ତ ମଣ୍ଡଳ ଶିକ୍ଷା ଅଧିକାରୀ, ଗୋଷ୍ଠୀ ଶିକ୍ଷା ସଂଯୋଜକ, ସମଗ୍ର ଶିକ୍ଷାର କର୍ମକର୍ତ୍ତା, ବ୍ଲକ ଯୋଜନା ସଂଯୋଜକ ପ୍ରମୁଖ ଉପସ୍ଥିତ ଥିଲେ।
