ନୂଆଦିଲ୍ଲୀ, ୨୪।୭ (ପି.ଟି.): ବ୍ୟାଙ୍କକ୍ରେ ଚାଲିଥିବା ଥାଇଲାଣ୍ଡ ଇଣ୍ଟରନ୍ୟାଶନାଲ ବକ୍ସିଂ ଟୁର୍ନାମେଣ୍ଟରେ ଭାରତୀୟ ବକ୍ସରଙ୍କ ପ୍ରଭାବୀ ପ୍ରଦର୍ଶନ ଜାରି ରହିଛି। ପୂର୍ବତନ ଜୁନିୟର ବିଶ୍ୱ ଚାମ୍ପିୟନ ନିଖାତ୍ ଜରୀନ (୫୧ କିଗ୍ରା) ଓ ଏସୀୟ ରୌପ୍ୟ ପଦକ ବିଜେତା ଦୀପକ ସିଂ (୪୯ କିଗ୍ରା) ସେମିଫାଇନାଲରେ ପ୍ରବେଶ କରିବା ସହ ପଦକ ନିଶ୍ଚିତ କରିଛନ୍ତି। ମହିଳା ୫୧ କିଗ୍ରା କ୍ୱାର୍ଟର ଫାଇନାଲ ମୁକାବିଲାରେ ନିଖାତ୍ ୫-୦ରେ ପ୍ରତିପକ୍ଷ ଉଜ୍ବେକିସ୍ତାନ ବକ୍ସର ସିତୋରା ଶୋଗଡାରୋଭାଙ୍କୁ ପରାସ୍ତ କରିଥିଲେ। ସେହିଭଳି ପୁରୁଷ ବିଭାଗରେ ଦୀପକ ତାଙ୍କ ପ୍ରତିପକ୍ଷ ଥାଇଲଣ୍ଡ ବକ୍ସରଙ୍କୁ କିଛି ମିନିଟ୍ରେ ରକ୍ତାକ୍ତ କରି ଧରାଶାୟୀ କରିବା ସହ ସହଜ ବିଜୟ ଲାଭ କରିଥିଲେ। ଏହି ଦୁଇ ଭରତୀୟ ବକ୍ସରଙ୍କ ବ୍ୟତୀତ ଆଶିଷ (୬୯ କିଗ୍ରା), ମଞ୍ଜୁ ରାଣୀ (୪୮ କିଗ୍ରା), ବ୍ରିଜେଶ ଯାଦବ (୮୧ କିଗ୍ରା) ଓ ରାଜ୍ୟଗୋଷ୍ଠୀ କ୍ରୀଡ଼ା ବ୍ରୋଞ୍ଜ ପଦକ ବିଜେତା ମହମ୍ମଦ ହସମୁଦ୍ଦିନ (୫୬ କିଗ୍ରା) ମଧ୍ୟ ପଦକ ରାଉଣ୍ଡରେ ପ୍ରବେଶ କରିଛନ୍ତି। କିନ୍ତୁ ଏସୀୟ ରୌପ୍ୟ ପଦକ ବିଜୟିନୀ ମନିଷା ମୋନୁ (୫୭ କିଗ୍ରା) ରୁଷିଆର ଲୁଇଡ୍ମିଲା ଭୋରୋଣ୍ଟୋସୋଭାଙ୍କ ନିକଟରୁ ହାରି ପ୍ରତିଯୋଗିତାରୁ ବିଦାୟ ନେଇଛନ୍ତି।
