ତିହିଡ଼ି, ୨୬।୭(ଡି.ଏନ.ଏ.) – ଭଦ୍ରକ ଜିଲା ତିହିଡ଼ି ବ୍ଲକରେ ଅତିରିକ୍ତ ଜେଏମ୍ଏଫ୍ସି କୋର୍ଟ ସହ ଅତିରିକ୍ତ ସିଭିଲ ଜଜ୍ କୋର୍ଟ ସ୍ଥାପନ ପାଇଁ ସ୍ଥିର ହୋଇଥିଲା। ମାତ୍ର ଏଥିନିମନ୍ତେ ଜମି ଚିହ୍ନଟ ହୋଇପାରୁ ନ ଥିବା ନେଇ ତିହିଡ଼ି ଓକିଲ ସଂଘର କର୍ମକର୍ତ୍ତାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସଂଘ ପକ୍ଷରୁ ଏ ସମ୍ପର୍କରେ ପୁନର୍ବାର ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇ ତୁରନ୍ତ ପଦକ୍ଷେପ ନେବାକୁ ଦାବି କରାଯାଇଛି।
ଉଲ୍ଲେଖନୀୟ ଯେ, ଗତ ଜାନୁୟାରୀ ୧୯ ତାରିଖରେ ଓକିଲ ସଂଘ ପକ୍ଷରୁ ଏ ନେଇ ଜିଲାପାଳଙ୍କୁ ଦାବିପତ୍ର ପ୍ରଦାନ କରାଯିବା ସହ ୧୫ ଦିନ ମଧ୍ୟରେ ପଦକ୍ଷେପ ନେବାକୁ ଦାବି ଜଣାଇଥିଲେ। ଏହାପରେ କୋର୍ଟ ପ୍ରତିଷ୍ଠା ପାଇଁ ସରକାରୀ ଜମି ଚିହ୍ନଟ କରିବାକୁ ନିର୍ଦ୍ଦେଶ ଦିଆଯାଇଥିଲା। ଏପରିକି ସରକାରୀ ଜମି ନ ମିଳିଲେ ଘରୋଇ ଜମି ଚିହ୍ନଟ କରି କ୍ରୟ କରିବା ଏବଂ ଆବଶ୍ୟକ ପଡ଼ିଲେ ଭଡ଼ାଘରେ କୋର୍ଟ ଚଳାଇବା ଲାଗି ହାଇକୋର୍ଟ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା। ପ୍ରଶାସନ ପକ୍ଷରୁ କୌଣସି ରିପୋର୍ଟ ପ୍ରଦାନ କରାଯାଇ ନ ଥିବାରୁ ଏପରି ବିଳମ୍ବ ହୋଇଥିବା ଜଣାଯାଇଛି। ଜିଲାର ଅନ୍ୟ ବ୍ଲକଗୁଡ଼ିକରେ ଏହି କୋର୍ଟ ସ୍ଥାପନ ହୋଇଥିବାବେଳେ ତିହିଡ଼ିରେ ହୋଇପାରି ନାହିଁ। ଫଳରେ ବ୍ଲକର ସର୍ବାଧିକ ମାମଲା ଜିଲା କୋର୍ଟରେ ବିଚାର ନ ହୋଇ ପଡ଼ିରହିଛି। ୨୦୧୭ ମସିହା ଜାନୁୟାରୀ ମାସ ପର୍ଯ୍ୟନ୍ତ ଜୁନିୟର ଡିଭିଜନରେ ୪୫୩ଟି ସିଭିଲ୍ ଏବଂ ୨୬୨୬ ଫୌଜଦାରି ମାମଲା ବିଚାରାଧୀନ ରହିଛି। ଏଥିଯୋଗୁ ତିହିଡ଼ି ଅଞ୍ଚଳବାସୀ ସମସ୍ୟାର ସମ୍ମୁଖୀନ ହେଉଥିବା କୁହାଯାଇଛି। ଏହି ପରିପ୍ରେକ୍ଷୀରେ ତୁରନ୍ତ ଜମି ଚିହ୍ନଟ କରି କୋର୍ଟ ପ୍ରତିଷ୍ଠା କରାଯିବା ଲାଗି ସଂଘର ସଭାପତି ସୂର୍ଯ୍ୟରଞ୍ଜନ ମିଶ୍ର, ଉପସଭାପତି ମନୋରଞ୍ଜନ ଦାସ, ସମ୍ପାଦକ ବିଷ୍ଣୁଚରଣ ଦାସ, ସହସମ୍ପାଦକ ଗୌରହରି ମହାନ୍ତି ଓ କୋଷାଧ୍ୟକ୍ଷ ତପନ ମିଶ୍ର ପ୍ରମୁଖ ଦାବି କରିଛନ୍ତି।