ବନ୍ତଳା,୩୦।୧୨(ଡି.ଏନ.ଏ.) – ଅନୁଗୋଳ ଜିଲାରେ ଶୀତ ଲହରି ଜାରି ରହିଛି। ଶନିବାର ଜିଲାର ତାପମାତ୍ରା ରେକର୍ଡ ସ୍ତର ୩.୪କୁ ଖସି ଆସିଥିବା ବେଳେ ରବିବାର ତାହା ୪.୬ ଥିବା ଜଣାପଡ଼ିଛି। ଫଳରେ ଜିଲାବାସୀ ଶୀତରେ ହନ୍ତସନ୍ତ ହେଉଥିବା ଦେଖିବାକୁ ମିଳିଛି। ଦିନତମାମ ଲୋକେ ଶୀତବସ୍ତ୍ର ପିନ୍ଧି ବାହାରକୁ ବାହାରୁଥିବାବେଳେ ନିରାଶ୍ରୟ ଓ ବେସାହରା ମଣିଷମାନେ ବଡ଼ ଦୁର୍ଦ୍ଦଶା ଭୋଗୁଛନ୍ତି। ତେଣୁ ଅସହାୟମାନଙ୍କୁ ଏପରି ଜାଡରୁ ରକ୍ଷା କରିବା ପାଇଁ ଜିଲାପାଳ ମନୋଜ କୁମାର ମାହାନ୍ତିଙ୍କ ନିର୍ଦ୍ଦେଶକ୍ରମେ ରବିବାର ଅପରାହ୍ନରେ ଅନୁଗୋଳ ପୌରପାଳିକା ତରଫରୁ ସହରରେ ଥିବା କଳାକେନ୍ଦ୍ରରେ ଅସ୍ଥାୟୀ ଭାବେ ରାତି ଆଶ୍ରୟ ସ୍ଥଳ ଖୋଲାଯାଇଥିବା ପୌର ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା ସୂଚନା ଦେଇଛନ୍ତି। ଏଠାରେ ୩୦ରୁ ଊଦ୍ଧର୍ବ ବ୍ୟକ୍ତିଙ୍କ ରହିବା ପାଇଁ ବିଛଣା, ଚାଦର, ତକିଆର ବ୍ୟବସ୍ଥା କରାଯାଇଛି। ସେହିପରି ପ୍ରବଳ ଶୀତକୁ ଦୃଷ୍ଟିରେ ରଖି ଜନସାଧାରଣଙ୍କ ସୁରକ୍ଷା ପାଇଁ ଜିଲାପାଳ ସମସ୍ତ ବିଡିଓ, ତହସିଲଦାର, ପଞ୍ଚାୟତ ନିର୍ବାହୀ ଅଧିକାରୀ, ଶିକ୍ଷୟିତ୍ରୀ ଶିକ୍ଷକ ଓ ଜିଲାର ସମସ୍ତ ପ୍ରଶାସନିକ ଅଧିକାରୀଙ୍କୁ ସତର୍କ କରାଇବା ସହିତ ତୁରନ୍ତ ପଦକ୍ଷେପ ନେବା ପାଇଁ ନିର୍ଦ୍ଦେଶ ଦେଇଛନ୍ତି। ଜିଲାର ସାମାଜିକ କର୍ମୀମାନଙ୍କୁ ଏଥିରେ ସହଯୋଗ କରିବା ପାଇଁ ଜିଲାପାଳ ଅନୁରୋଧ କରିବା ସହ ନିରାଶ୍ରୟ ଓ ବେସାହାରାମାନଙ୍କୁ ତୁରନ୍ତ ଜିଲା କଳାକେନ୍ଦ୍ର ଆଣିବାକୁ ପରାମର୍ଶ ଦେଇଛନ୍ତି।
