କୁଜଙ୍ଗ,୮ା୬(ସ୍ବ.ପ୍ର.): ଜୁଲାଇ ୩ ତାରିଖରେ ହେବାକୁ ଥିବା ଢିଙ୍କିଆ ପଞ୍ଚାୟତ ନିର୍ବାଚନ ପାଇଁ ନାମାଙ୍କନପତ୍ର ଦାଖଲ ହୋଇଛି। ୨୩ ଓ୍ବାର୍ଡ ବିଶିଷ୍ଟ ଏହି ପଞ୍ଚାୟତରେ ୨୨ଟି ଓ୍ବାର୍ଡ ପାଇଁ ୪୮ଜଣ ପ୍ରାର୍ଥୀ ନାମାଙ୍କନପତ୍ର ଦାଖଲ କରିଛନ୍ତି। ୯ ନଂ. ଓ୍ବାର୍ଡଟି ଆଦିବାସୀ ମହିଳାଙ୍କ ପାଇଁ ସଂରକ୍ଷିତ ଥିବାବେଳେ ଏହି ବର୍ଗର କେହି ପ୍ରାର୍ଥୀ ନ ଥିବାରୁ ନାମାଙ୍କନପତ୍ର ଦାଖଲ ହୋଇନାହିଁ। ସେହିପରି ଏହି ସମ୍ବେଦନଶୀଳ ପଞ୍ଚାୟତରେ ୯ ଜଣ ପ୍ରାର୍ଥୀ ସରପଞ୍ଚ ପଦବୀ ପାଇଁ ପ୍ରାର୍ଥତ୍ପତ୍ର ଦାଖଲ କରିଛନ୍ତି। ସେମାନେ ହେଲେ ପୂର୍ବତନ ସମିତିସଭ୍ୟ କିଶୋର କୁମାର ପରିଡ଼ା, ପୂର୍ବତନ ସମିତି ସଭ୍ୟ ପ୍ରକାଶ ଜେନା, ପ୍ରଳୟ ବିଶ୍ୱାଳ, ତିଳୋତ୍ତମା ପରିଡ଼ା, ଶୁଭାଶିଷ ସୁଭରଞ୍ଜନ ଲେଙ୍କା, ସୁରେଶ ଚନ୍ଦ୍ର ଦାସ, ମୀରା ବିଶ୍ୱାଳ, ପୂର୍ବତନ ନାଏବ ସରପଞ୍ଚ ମମତା ନାୟକ ଓ ରଞ୍ଜନ ବର୍ଦ୍ଧନ। ପ୍ରାର୍ଥୀମାନେ ଏରସମା ଏବିଡିଓ ବିଜୟକେତନ ଚୌଧୁରୀ, ଦୀପକ ଓଝା, ନିର୍ବାହୀ ଅଧିକାରୀ ପୂର୍ଣ୍ଣଚନ୍ଦ୍ର ସାହୁ, ଜିଆର୍ଏସ୍ ନନ୍ଦିତା ଦାସ ପ୍ରମୁଖଙ୍କ ଉପସ୍ଥିତିରେ ନାମାଙ୍କନପତ୍ର ଦାଖଲ କରିଥିଲେ। ସୂଚନାଯୋଗ୍ୟ, ପୋସ୍କୋ ଗଣ୍ଡଗୋଳ ଯୋଗୁ ଏହି ପଞ୍ଚାୟତରେ ନିର୍ବାଚନ ହୋଇପାରୁ ନ ଥିଲା। ପରିସ୍ଥିତି ଶାନ୍ତ ପଡ଼ିବା ପରେ ଏଠାରେ ପଞ୍ଚାୟତ ନିର୍ବାଚନ ହୋଇଥିଲା। ଅନ୍ୟ ପଞ୍ଚାୟତଗୁଡିକ ତୁଳନାରେ ଭିନ୍ନ ସମୟରେ ଏହି ପଞ୍ଚାୟତରେ ନିର୍ବାଚନ ହେବାରୁ ଏହାର କାର୍ଯ୍ୟକାଳ ଅନୁଯାୟୀ ଅଲଗା ଭାବେ ନିର୍ବାଚନ ହେଉଛି।
