କଟକ ଅଫିସ,୧।୭: କଟକ ନଗର ଡାକମଣ୍ଡଳ ଦ୍ୱାରା ଡିଜିଟାଲ ଇଣ୍ଡିଆର ୪ବର୍ଷ ପୂର୍ତ୍ତି ପାଳନ କରାଯାଇଛି। ଏହି ଅବସରରେ ଡିଜିଟାଲ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଇଥିଲା। କଟକ ନଗର ଡାକମଣ୍ଡଳର ବରିଷ୍ଠ ଅଧୀକ୍ଷକ ଶୁଚିସ୍ମିତା ସ୍ବାଇଁ ଯୋଗଦେଇ ଡାକବିଭାଗର ଡିଜିଟାଲକରଣ ଉପରେ ଅବଗତ କରାଇଥିଲେ। ଏବେ ଟଙ୍କାପଇସା କାରବାର କୋର୍ ବ୍ୟାକିଙ୍ଗ୍ ସେବା ଦ୍ୱାରା କରାଯାଉଛି। ଯେଉଁଥିରେ ଏଟିଏମ୍, ଇଣ୍ଟରନେଟ୍ ବ୍ୟାଙ୍କିଙ୍ଗ, ଏସଏମଏସ ସେବା ଆଦି ଉପଭୋକ୍ତାମାନଙ୍କୁ ଯୋଗାଇ ଦିଆଯାଉଛି। ପୋଷ୍ଟ ଇନଫୋ ଆପ୍ ଦ୍ୱାରା ସ୍ପିଡ୍ ପୋଷ୍ଟ, ପାର୍ଶଲ ଆଦି ସେବାର ଟ୍ରାକିଂ କରାଯାଇପାରୁଛି। ଏହି ଆପ୍ରେ ମଧ୍ୟ ପିଏଲଆଇ ଏବଂ ଆରପିଏଲଆଇର ପ୍ରିମିୟମର ହିସାବ, ସ୍ବଳ୍ପ ସଞ୍ଚୟ ଯୋଜନାର ସୁଧ ଆଦି ଜାଣି ହେଉଛି। ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ୍(ଆଇ.ପି.ପି.ବି) ଦ୍ୱାରା ଘରେ ଘରେ ବ୍ୟାଙ୍କିଙ୍ଗ୍ ସେବା ପହଞ୍ଚି ପାରିଛି। ଆଇପିପିବିି ମୋବାଇଲ ଆପ୍ ଦ୍ୱାରା ଏନଇଏଫଟି, ଆରଟିଜିଏସ, ମୋବାଇଲ୍ ରିଚାର୍ଜ, ବିଦ୍ୟୁତ କର ଦେୟ ଆଦି ସେବା ଉପଭୋକ୍ତାମାନେ ପାଇପାରୁଛନ୍ତି। ଆଧାର ପଞ୍ଜିକରଣ, ପାସପୋର୍ଟ ସେବା, ସୁକନ୍ୟା ସମୃଦ୍ଧି ଯୋଜନା, ପ୍ରଧାନମନ୍ତ୍ରୀ ସୁରକ୍ଷା ବୀମା ଯୋଜନା, ପ୍ରଧାନମନ୍ତ୍ରୀ ଜୀବନ ଜ୍ୟୋତି ବୀମା ଯୋଜନା, ଅଟଳ ପେନ୍ସନ୍ ଯୋଜନା ସର୍ବସାଧାରଣଙ୍କ ପାଖରେ ପହଞ୍ଚିପାରିଛି। ଦର୍ପଣ କାର୍ଯ୍ୟକ୍ରମ ଜରିଆରେ ଗ୍ରାମାଞ୍ଚଳରେ ଡାକଘର ତାର ଅନେକ ସେବାକୁ ଡିଜିଟାଲ କରିପାରିଛି। କେବଳ ସେତିକି ନୁହେଁ, ଡିଜିଟାଲ ଇଣ୍ଡିଆ ଯୋଜନାରେ ଡାକଘର କୋର୍ ସିଷ୍ଟମ୍ ଇଣ୍ଟିଗ୍ରେସନ୍ ଯୋଜନାରେ ପ୍ରତ୍ୟେକ କାର୍ଯ୍ୟକୁ ସମନ୍ବିତ କରିଛି। ଡାକଘରର ଉପରୋକ୍ତ ଡିଜିଟାଲ ସୁବିଧାଗୁଡିକୁ କର୍ମଚାରୀମାନେ ସଚେତନତା କାର୍ଯ୍ୟକ୍ରମ ମାଧ୍ୟମରେ ଲୋକଙ୍କୁ ଅବଗତ କରାଇଥିଲେ। କଟକ ଜିପିଓ ବରିଷ୍ଠ ପୋଷ୍ଟମାଷ୍ଟର ଶେଖ୍ ମହମ୍ମଦ ନୋମାନ ଏହାର ନେତୃତ୍ୱ ନେଇଥିଲେ।
