ଭୁବନେଶ୍ୱର,୧୬ା୯(ବ୍ୟୁରୋ) : ପରିବହନ ସଚିବଙ୍କ ନିର୍ଦ୍ଦେଶକ୍ରମେ ରବିବାର ଛୁଟିଦିନରେ ରାଜ୍ୟର ସମସ୍ତ ଆଞ୍ଚଳିକ ପରିବହନ କାର୍ଯ୍ୟାଳୟ (ଆର୍ଟିଓ) କାର୍ଯ୍ୟ କରିଥିଲା। ଅଧିକ ଭିଡ଼ ହେଉଥିବା ଭୁବନେଶ୍ୱରର ଆର୍ଟିଓ-୧ ଓ ଆର୍ଟିଓ-୨ରେ ସୁରୁଖୁରୁରେ କାର୍ଯ୍ୟ ଚାଲିଥିଲା। ଡ୍ରାଇଭିଂ ଲାଇସେନ୍ସ ଓ ଗାଡ଼ି କାଗଜପତ୍ର ପାଇଁ ଲୋକେ ଧାଡିରେ ରହିଥିଲେ। ପୂର୍ବରୁ ଆବେଦନ କରିଥିବା ଲୋକେ ଲର୍ନିଂ ଟେଷ୍ଟ ଦେଇଥିଲେ। ଅନ୍ୟଦିନ ଅପେକ୍ଷା ଭିଡ଼ କମ୍ ରହିଥିବାବେଳେ ଆରଟିଓ-୧କୁ ପ୍ରାୟ ଦୁଇ ହଜାର ଓ ଆର୍ଟିଓ-୨କୁ ୭ଶହ ଲୋକ ଆସିଥିଲେ। ତେବେ ଛୁଟିଦିନ ହୋଇଥିବାରୁ ଏମାନଙ୍କ ମଧ୍ୟରୁ ଅଧିକାଂଶ ସରକାରୀ କର୍ମଚାରୀ ଥିବା ଜଣାପଡ଼ିଛି।
ଅନ୍ୟଦିନ ଭଳି ପୂର୍ବାହ୍ନ ୧୦ଟାରେ ଅଫିସ ଖୋଲିଥିଲା। ଅଧିକାରୀ ଓ କର୍ମଚାରୀମାନେ ନିର୍ଦ୍ଧାରିତ ସମୟରେ ପହଞ୍ଚତ୍ ଲୋକଙ୍କୁ ସେବା ଯୋଗାଇଦେଇଥିଲେ। ଆରମ୍ଭରେ ଟିକେ ଭିଡ଼ ରହିଥିଲା। ପରେ ଲୋକେ ଲାଇନ୍ରେ ଆସି ସୁରୁଖୁରୁରେ ନିଜର କାର୍ଯ୍ୟ ସାରିଥିଲେ। ଯେଉଁମାନେ ଫର୍ମ ଫିଲ୍ଅପ୍ ବା ଅନ୍ୟ କାଗଜପତ୍ର କିପରି କରିବେ ତାହା ସମ୍ପର୍କରେ ଜାଣିପାରୁ ନ ଥିଲେ ସେମାନଙ୍କୁ ସହଯୋଗ କରିବାକୁ ଆବଶ୍ୟକ ବ୍ୟବସ୍ଥା କରାଯାଇଥିଲା। ଆର୍ଟିଓ ଆଗରେ ରହିଥିବା ଦୁଇଟି ଅନ୍ଲାଇନ୍ ମେଶିନରୁ ଲୋକେ ଡ୍ରାଇଭିଂ ଲାଇସେନ୍ସ ସହ ଅନ୍ୟ କାଗଜପତ୍ର ସମ୍ପର୍କରେ ସୂଚନା ପାଇପାରୁଥିଲେ। ଏହାସହ ସେ ଥିଲେ ମଧ୍ୟ ଲୋକେ ଲାଇସେନ୍ସ ପାଇଁ ଆବେଦନ କରୁଥିଲେ। ତେବେ ଅପରାହ୍ନ ପ୍ରାୟ ୨ଟାରେ ଇଣ୍ଟରନେଟ ସମସ୍ୟା ଦେଖାଦେବାରୁ କୌଣସି ଫାଇଲ୍ ଅପଲୋଡ୍ ହୋଇ ନ ଥିଲା। ଘଣ୍ଟାଏ ଧରି କାର୍ଯ୍ୟ ବାଧାପ୍ରାପ୍ତ ହୋଇଥିଲା। ଏହାକୁ ନେଇ ଲାଇନ୍ରେ ଛିଡ଼ା ହୋଇଥିବା ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା।
ଆର୍ଟିଓ-୧ର ଆର୍ଟିଓ ପ୍ରଦୀପ ମହାନ୍ତି କହିଛନ୍ତି, ନୂଆ ମୋଟର ଆଇନ ସେପ୍ଟେମ୍ବର ୧ରୁ ଲାଗୁ ହେବାଠାରୁ ବର୍ତ୍ତମାନ ପର୍ଯ୍ୟନ୍ତ ଡିଏଲ୍ ଆବେଦନ ପାଇଁ ୨୦ହଜାରରୁ ଊର୍ଦ୍ଧ୍ୱ ସ୍ଲଟ୍ ବୁକ୍ ହୋଇଛି। ନିୟମ କୋହଳ ହେବା ପରେ ଏବେ ଅଟୋ ଡ୍ରାଇଭର ପୂର୍ବଭଳି ବେପରୁଆଭାବେ ଗାଡ଼ି ଚାଳନା କରୁଛନ୍ତି। ଏକାଧିକ ଯାତ୍ରୀଙ୍କୁ ଗାଡିରେ ବସାଇ ବିପଦପୂର୍ଣ୍ଣ ଭାବେ ନେଉଛନ୍ତି। ତେଣୁ ଏଭଳି କଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଟୋ ଚାଳକ ସଂଘକୁ ସତର୍କ କରାଯାଇଥିବା ସେ କହିଛନ୍ତି। ସେହିଭଳି ଆର୍ଟିଓ-୨ରେ ୧୮ହଜାରରୁ ଊର୍ଦ୍ଧ୍ୱ ସ୍ଲଟ୍ ବୁକ୍ ହୋଇଥିବା ଆର୍ଟିଓ ସଞ୍ଜୟ ବେହେରା ସୂଚନା ଦେଇଛନ୍ତି। ତେବେ ଏତେ ସଂଖ୍ୟକ ଲୋକ ଡିଏଲ୍ କରି ନ ଥିବାରୁ ସେ ଆଶ୍ଚର୍ଯ୍ୟପ୍ରକାଶ କରିବା ସହ କାହିଁକି ବିନା ଲାଇସେନ୍ସରେ ଗାଡ଼ି ଚଢ଼ୁଥିଲେ ବୋଲି ପ୍ରଶ୍ନ କରିଛନ୍ତି।
ଲର୍ନିଂ ଟେଷ୍ଟ୍ ପାଇଁ ନାଲ୍କୋ ଛକରେ ଆଜି ଖୋଲିବ କ୍ୟାମ୍ପ୍ ଅଫିସ
ଭୁବନେଶ୍ୱରରେ ଥିବା ଦୁଇ ଆର୍ଟିଓରେ ଏକସଙ୍ଗେ ବିଭିନ୍ନ କାର୍ଯ୍ୟ ହେଉଥିବାରୁ ଲୋକଙ୍କୁ ସେବା ଯୋଗାଇବାରେ ସମସ୍ୟା ହେଉଛି। ତେଣୁ ଡ୍ରାଇଭିଂ ଲାଇସେନ୍ସ ପାଇଁ ଲର୍ନିଂ ଟେଷ୍ଟ କରିବାକୁ କ୍ୟାମ୍ପ୍ ଅଫିସ ଖୋଲିବ। ସୋମବାରଠାରୁ ନାଲକୋ ଛକ ନିକଟ ବିଏମ୍ସି ଡେପୁଟି କମିଶନରଙ୍କ କାର୍ଯ୍ୟାଳୟ ପରିସରରେ ଆର୍ଟିଓ-୨ର କ୍ୟାମ୍ପ୍ ଅଫିସ୍ କାର୍ଯ୍ୟ କରିବ ବୋଲି ଆର୍ଟିଓ ସଞ୍ଜୟ ବେହେରା କହିଛନ୍ତି। ସେହିଭଳି ଶହୀଦନଗର ଓ୍ବାର୍ଡ ଅଫିସ ଓ ସ୍ଥାନୀୟ ବିଏମ୍ସି କାର୍ଯ୍ୟାଳୟରେ ଆର୍ଟିଓ-୧ର ଶାଖା ଅଫିସ୍ ରହିଛି। କିନ୍ତୁ ଏହି ଦୁଇ ଶାଖା ଅଫିସ୍ ଏବେ ବନ୍ଦ ରହିଥିବାରୁ ତାହାର ସ୍ଥିତି ଅନୁଧ୍ୟାନ କରାଯିବ। ଆବଶ୍ୟକ ବ୍ୟବସ୍ଥା କରାଯାଇ ଲୋକଙ୍କୁ ସେବା ଯୋଗାଇ ଦିଆଯିବ ବୋଲି ଆର୍ଟିଓ ପ୍ରଦୀପ ମହାନ୍ତି କହିଛନ୍ତି।
