ଅନୁଗୋଳ ଅଫିସ୍, ୨୫ା୩- ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟର ଜଣେ କର୍ମଚାରୀଙ୍କ ଝୁଲନ୍ତା ମୃତଦେହ ବୁଧବାର ସକାଳେ ସେ ରହୁଥିବା ଭଡ଼ା ଘରୁ ଉଦ୍ଧାର କରାଯାଇଛି। ମୃତକ ଯକ୍ଷ୍ମା ବିଭାଗର ଲାବୋରେଟାରି ଟେକ୍ନିସିଆନ ସୁରେଶ ସାହୁ ବୋଲି ଜଣାପଡିଛି । ତାଙ୍କ ଘର ଦେବଗଡ ଜିଲା ବାଘଦରି ଅଞ୍ଚଳରେ ହୋଇଥିବା ବେଳେ ସେ ଅନୁଗୋଳ ଜିଲା ମିଶ୍ରପଡାଠାରେ ଏକ ଭଡ଼ାଘରେ ରହୁଥିଲେ। ପୋଲିସ ସୂଚନା ମୁତାବକ, ସୁରେଶଙ୍କର କିଛିଦିନ ତଳେ ଜିଲା ମୁଖ୍ୟ ଚିକିତ୍ସାଳୟରୁ ମାଧପୁର ଚିକିତ୍ସାଳୟକୁ ବଦଳି ହୋଇଥିଲା। ତାଙ୍କ ପରିବାର ଲୋକେ ଘରକୁ ଯାଇଥିବା ବେଳେ ସେ ୨ ଦିନ ହେଲା ଏକୁଟିଆ ଥିଲେ। ବୁଧବାର ସକାଳେ ଘର ଭିତରେ ତାଙ୍କ ମୃତଦେହ ଝୁଲୁଥିବା ଦେଖି ପଡୋଶୀ ପୋଲିସକୁ ସୂଚନା ଦେଇଥିଲେ। କୌଣସି କାରଣରୁ ସେ ଆତ୍ମହତ୍ୟା କରିଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି। ଅନୁଗୋଳ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
