ସାଙ୍ଘାଇ,୩୦।୫(ଏଏଫ୍ପି)- ୧୮ ବର୍ଷରୁ କମ୍ ଫୁଟ୍ବଲ ଟୁର୍ନାମେଣ୍ଟ ଦକ୍ଷିଣ କୋରିଆ ଦଳ ଜିତିବା ପରେ ଉଲ୍ଲସିତ ହୋଇ ପାଣ୍ଡା କପ୍ ଉପରେ ଗୋଡ଼ ରଖି ଫଟୋ ଉଠାଇଥିଲେ। ଏଥିନେଇ ଚାମ୍ପିୟନ ଦକ୍ଷିଣ କୋରିଆ ଦଳ ଚାଇନାବାସୀଙ୍କୁ କ୍ଷମାପ୍ରାର୍ଥନା କରିଛନ୍ତି। ଅନ୍ତର୍ଜାତୀୟ ଯୁବ ଟୁର୍ନାମେଣ୍ଟ ଫାଇନାଲକୁ ୩-୦ ଗୋଲରେ ଜିତିବା ପରେ ଆୟୋଜକ ଚାଇନାକୁ ଅପମାନିତ କରିଥିବା ଅଭିଯୋଗ ହୋଇଥିଲା। ଉକ୍ତ ଫଟୋକୁ ଚାଇନା ଗଣମାଧ୍ୟମ ଓ ସୋସିଆଲ ମିଡିଆରେ ପ୍ରବଳ ସମାଲୋଚନା କରାଯାଇଥିଲା। ଏହାପରେ ଦଳର ସଦସ୍ୟ ଓ କୋଚ୍ ତୁରନ୍ତ ଏକ ଖବରଦାତା ସମ୍ମିଳନୀ ଡକାଇ ଏକ ଭିଡିଓ ଜରିଆରେ କ୍ଷମା ମାଗିଛନ୍ତି। ପ୍ରଥମେ ଉକ୍ତ ସ୍ଥିତି ପାଇଁ ଆମେ ଦୁଃଖିତ। ଆମର ଜଣେ ଖେଳାଳି ବଡ଼ ଭୁଲ କରିଛନ୍ତି। ଏଥିନେଇ ଚାଇନାବାସୀ ଓ ପ୍ରଶଂସକଙ୍କୁ ଆମେ ଆଉ ଥରେ କ୍ଷମାପ୍ରାର୍ଥନା କରୁଛୁ ବୋଲି ଦକ୍ଷିଣ କୋରିଆ ଦଳର ମୁଖ୍ୟ କୋଚ୍ କହିଛନ୍ତି। ଉଲ୍ଲେଖଥାଉ କି, ୬ଟି ଦେଶକୁ ନେଇ ଅନୁଷ୍ଠିତ ଟୁର୍ନାମେଣ୍ଟରେ ନ୍ୟୁଜିଲାଣ୍ଡ ଓ ଥାଇଲାଣ୍ଡକୁ ମଧ୍ୟ ଦକ୍ଷିଣ କୋରିଆ ହରାଇଥିଲା।
