ଆନନ୍ଦପୁର, ୧୧।୯(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ୨୦ ନମ୍ବର ଜାତୀୟ ରାଜପଥର ସାଳପଡ଼ାଠାରେ ଏକ ୧୦ ଚକିଆ ଟ୍ରକ୍ ଧକ୍କାରେ ବୁଧବାର ସକାଳେ ଜଣେ ବାଇକ୍ ଆରୋହୀଙ୍କ ମୃତ୍ୟୁ ଘଟିଛି। ସେ ହେଲେ ପାଟଣା ନିକଟ ପାଟୁଳି ଗ୍ରାମର ସଦାନନ୍ଦ ମହାନ୍ତ(୫୩)।
ପ୍ରକାଶ ଯେ, ସଦାନନ୍ଦ ଆନନ୍ଦପୁର ଉଦ୍ୟାନ ବିଭାଗରେ ଜଣେ କର୍ମଚାରୀ ଥିଲେ। ବୁଧବାର ସକାଳୁ ଘସିପୁରା ବଜାରରୁ କାମ ସାରି ବାଇକ୍ ଯୋଗେ ଫେରୁଥିବା ବେଳେ ଏକ ଟ୍ରକ୍ ତାଙ୍କୁ ସମ୍ମୁଖରୁ ଧକ୍କା ଦେଇଥିଲେ। ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଛି। ଖବର ପାଇ ଘସିପୁରା ପୋଲିସ ମୃତଦେହ ଜବତକରି ଆନନ୍ଦପୁର ମେଡିକାଲ ପଠାଇଛି। ଘଟଣାସ୍ଥଳରେ ଚାପା ଉତ୍ତେଜନା ଦେଖାଦେଇଛି।
