ନୂଆଦିଲ୍ଲୀ,୨୧।୬(ପି.ଟି.): କୋଭିଡ୍-୧୯ ମହାମାରୀ କାରଣରୁ ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ଘୁଞ୍ଚିଲେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳିବୁ ବୋଲି ଅଷ୍ଟ୍ରେଲିଆ ତାରକା ଓପନର ଡେଭିଡ୍ ଓ୍ବାର୍ନର କହିଛନ୍ତି। ଆସନ୍ତା ଅକ୍ଟୋବର-ନଭେମ୍ବରରେ ୧୬ଟି ଦେଶକୁ ନେଇ ଖେଳାଯିବାକୁ ଥିବା ଏହି ବିଶ୍ୱକପ୍ ଆୟୋଜନ ନେଇ କ୍ରିକେଟ ଅଷ୍ଟ୍ରେଲିଆ ଅଧ୍ୟକ୍ଷ ଅର୍ଲ ଏଡିଙ୍ଗ୍ସ ନକାରାତ୍ମକ ମନ୍ତବ୍ୟ ଦେଇଛନ୍ତି। ସେ ଏହାକୁ ଅବାସ୍ତବ ବୋଲି କହିଛନ୍ତି। ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ମଧ୍ୟ ଏପର୍ଯ୍ୟନ୍ତ ବିଶ୍ୱକପ୍ ଆୟୋଜନ ନେଇ ଅନ୍ତିମ ନିଷ୍ପତ୍ତି ନେଇନାହିଁ। ଆସନ୍ତା ମାସରେ ଆଇସିସି ବିଶ୍ୱକପ୍ର ଭାଗ୍ୟ ନେଇ ବିଚାର କରିବ। କିନ୍ତୁ ଏପରି ସ୍ଥିତିରେ ଓ୍ବାର୍ନର ଆଇପିଏଲ୍ ଖେଳିବା ନେଇ ବେଶ୍ ଆଶାବାଦୀ ଅଛନ୍ତି।
ଯଦି ବିଶ୍ୱକପ୍ ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ ଖେଳା ନ ଯାଏ ତା’ହେଲେ ଅନ୍ୟ ଅଷ୍ଟ୍ରେଲୀୟ ଖେଳାଳିଙ୍କ ସମେତ ଆଇପିଏଲ୍ ଖେଳିବି ବୋଲି ‘ଇଣ୍ଡିଆ ଟୁଡେ’କୁ ସାକ୍ଷାତ୍କାର ଦେବା ଅବସରରେ ଓ୍ବାର୍ନର କହିଛନ୍ତି। କ୍ରିକେଟ ଅଷ୍ଟ୍ରେଲିଆ ତରଫରୁ ଅନୁମତି ଦିଆଗଲେ ଆମେ ଆଇପିଏଲ୍ ଖେଳିବାକୁ ପ୍ରସ୍ତୁତ ହେବୁ। ଏବେ ସମସ୍ତେ ଆଇସିସିର ନିଷ୍ପତ୍ତିକୁ ଅପେକ୍ଷା କରିଛନ୍ତି। ଟି୨୦ ବିଶ୍ୱକପ୍ ସ୍ଥଗିତ ହେବା ନେଇ ଏବେ ଆଲୋଚନା ଚାଲିଛି। ଅଷ୍ଟ୍ରେଲିଆରେ ସବୁ ଦେଶ ପାଇଁ ଚ୍ୟାଲେଞ୍ଜ ରହିଛି। କାରଣ ଏଠାରେ ୧୪ ଦିନ କ୍ୱାରାଣ୍ଟାଇନ୍ର ବ୍ୟବସ୍ଥା ରହିଛି। ଟି୨୦ ବିଶ୍ୱକପ୍ ସ୍ଥଗିତ ରହିଲେ ଅଧିକାଂଶ ଅଷ୍ଟ୍ରେଲୀୟ ଖେଳାଳି ସେପ୍ଟେମ୍ବର- ଅକ୍ଟୋବରରେ ଆଇପିଏଲ୍ ଖେଳିବାକୁ ଚାହାନ୍ତି ବୋଲି ସେ କହିଛନ୍ତି। ତେବେ ଏଥିପାଇଁ ସରକାର ଓ କ୍ରିକେଟ ଅଷ୍ଟ୍ରେଲିଆର ଅନୁମତି ଆବଶ୍ୟକ।
