ଦୁବାଇ,୨୦।୪: କରୋନା ଭାଇରସ୍ ସାରା ବିଶ୍ୱରେ ମହାମାରୀ ରୂପ ନେଇ ଆତଙ୍କ ବଜାୟ ରଖିଛି। ଏପରିସ୍ଥଳେ ବିଶ୍ୱର ପ୍ରାୟ ସବୁ କ୍ରୀଡ଼ା ଇଭେଣ୍ଟ ବାତିଲ ହୋଇଛି କିମ୍ବା ସ୍ଥଗିତ ରହିଛି। ହାଇପ୍ରୋଫାଇଲ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)କୁ ମଧ୍ୟ ସ୍ଥଗିତ ରଖାଯାଇଛି। ଏବେ ଅଷ୍ଟ୍ରେଲିଆରେ ଆଗାମୀ ଅକ୍ଟୋବର-ନଭେମ୍ବରରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ଖେଳାଯିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
କରୋନା ଭାଇରସ୍ କାରଣରୁ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଅଷ୍ଟ୍ରେଲିଆ ଲକ୍ଡାଉନ ଜାରି ରଖିଛି। କେବଳ ସେତିକି ନୁହଁ ୬ ମାସ ପାଇଁ ଅଷ୍ଟ୍ରେଲିଆ ତା’ର ସୀମା ସିଲ କରିଛି। ଫଳରେ ୧୮ ଅକ୍ଟୋବରରୁ ଆରମ୍ଭ ହୋଇ ୧୫ ନଭେମ୍ବର ପର୍ଯ୍ୟନ୍ତ ଚାଲିବାକୁ ଥିବା ଟି୨୦ ବିଶ୍ୱକପ୍ ଆୟୋଜନ ନେଇ ଆଶଙ୍କା ସୃଷ୍ଟି ହୋଇଛି। ଏହି ଟୁର୍ନାମେଣ୍ଟକୁ ଆସନ୍ତାବର୍ଷକୁ ଘୁଞ୍ଚାଇ ଦିଆଯିବ ବୋଲି ଶୁଣାଯାଉଛି। ଏଭଳି ସ୍ଥିତିରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଆସନ୍ତା ଅଗଷ୍ଟ ପୂର୍ବରୁ ଟି୨୦ ବିଶ୍ୱକପ୍ ନେଇ କୌଣସି ନିଷ୍ପତ୍ତି ନେବ ନାହିଁ ବୋଲି କହିଛି। ଅନିଶ୍ଚିତତା ଜାରି ରହିଥିବା ବେଳେ ଖେଳାଳି, କୋଚ୍, ପ୍ରଶଂସକ ଓ କ୍ରିକେଟ ସହିତ ସମ୍ପର୍କିତ ସବୁ ଲୋକଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଆମେ ଗୁରୁତ୍ୱ ଦେବୁ ବୋଲି ଆଇସିସିର ପ୍ରବକ୍ତା କହିଛନ୍ତି। ଏହି ଟୁର୍ନାମେଣ୍ଟକୁ ଖୋଲା ଷ୍ଟାଡିୟମରେ ଆୟୋଜନ କରାଯିବ ବୋଲି ସୂଚନା ମିଳିଛ। ତେବେ ଅଗଷ୍ଟରେ ଏ ସଂକ୍ରାନ୍ତରେ ନିଷ୍ପତ୍ତି ନିଆଯିବାର ସମ୍ଭାବନା ରହିଛି। ଇତିମଧ୍ୟରେ ଆଇସିସି ତା’ର ମୁଖ୍ୟ କାର୍ଯ୍ୟନିର୍ବାହୀ କମିଟିର ବୈଠକ ଡାକିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ ଜୟ ଶାହା ଏହି ବୈଠକରେ ଅଂଶଗ୍ରହଣ କରିବେ। ଏହି ବୈଠକରେ ଫ୍ୟୁଚର ଟୁର ପ୍ରୋଗ୍ରାମରେ ପରିବର୍ତ୍ତନ କରାଯିବା ନେଇ ଆଲୋଚନା ହେବ ବୋଲି ଆଶା କରାଯାଉଛି।
