ନୂଆଦିଲ୍ଲୀ, ୧୩-୯ (ପି.ଟି.):ଉଚ୍ଚଶିକ୍ଷା କ୍ଷେତ୍ରରେ ଭାରତ କେତେ ଆଗୁଆ ତାହା ସଦ୍ୟ ପ୍ରକାଶିତ ଟାଇମ୍ସ ହାୟର ଏଜୁକେଶନ ୟୁନିଭର୍ସିିଟି ର଼୍ୟାଙ୍କିଙ୍ଗ୍ରୁ ସ୍ପଷ୍ଟ ବାରିହୋଇ ପଡ଼ୁଛି। ମାନବ ସମ୍ବଳ ବିକାଶ ମନ୍ତ୍ରଣାଳୟ ରିପୋର୍ଟ ଅନୁଯାୟୀ ଶ୍ରେଷ୍ଠ ୩୦୦ ର଼୍ୟାଙ୍କ ମଧ୍ୟରେ ଭାରତର କୌଣସି ଉଚ୍ଚ ଶିକ୍ଷାନୁଷ୍ଠାନ ସ୍ଥାନ ପାଇନାହାନ୍ତି। ୨୦୧୨ ପରଠାରୁ ପ୍ରଥମ ଥର ଲାଗି ଭାରତର କୌଣସି ବିଶ୍ୱବିଦ୍ୟାଳୟ ଶ୍ରେଷ୍ଠ ୩୦୦ ର଼୍ୟାଙ୍କରେ ସ୍ଥାନ ପାଇ ନ ଥିବା ଜଣାପଡ଼ିଛି। ତେବେ ଶ୍ରେଷ୍ଠ ୫୦୦ ମଧ୍ୟରେ ଭାରତର ୫ ଆଇଆଇଟି, ବାଙ୍ଗାଲୋରସ୍ଥିତ ଇଣ୍ଡିଆନ୍ ଇନ୍ଷ୍ଟିଚ୍ୟୁଟ୍ ଅଫ୍ ସାଇନ୍ସ ସ୍ଥାନ ପାଇବାରେ ସଫଳ ହୋଇଛନ୍ତି। ଆଇଆଇଟି ରୋପଡ୍, ଆଇଆଇଟି ଇନ୍ଦୋର, ଆଇଆଇଟି ବମ୍ବେ, ଆଇଆଇଟି ଦିଲ୍ଲୀ, ଆଇଆଇଟି ଖଡ଼ଗପୁର ସହ ବାଙ୍ଗାଲୋର ଆଇଆଇଏସ୍ସି ଭାରତର ଉଚ୍ଚଶିକ୍ଷା କ୍ଷେତ୍ରକୁ ପ୍ରଶସ୍ତ କରିଛନ୍ତି। ଏନେଇ କେନ୍ଦ୍ର ମାନବ ସମ୍ବଳ ବିକାଶ ମନ୍ତ୍ରୀ ରମେଶ ପୋଖ୍ରିୟାଲ୍ ନିଶଙ୍କ ଟୁଇଟ୍ କରି ଏହି ଶିକ୍ଷାନୁଷ୍ଠାନଗୁଡ଼ିକୁ ଅଭିନନ୍ଦନ ଜଣାଇଛନ୍ତି। ଆଇଆଇଟି ଗାନ୍ଧୀନଗର ଶ୍ରେଷ୍ଠ ୬୦୦ରେ ସ୍ଥାନ ପାଇଛି।
ଭାରତରେ ଅନେକ ଦକ୍ଷତାସମ୍ପନ୍ନ ପ୍ରତିଭା ରହିଛନ୍ତି। ବିଦେଶୀ ଛାତ୍ରୀଛାତ୍ରଙ୍କୁ ଆକର୍ଷିତ କଲାଭଳି ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି। ହେଲେ ଅନ୍ତର୍ଜାତୀୟ ସ୍ତରରେ ପ୍ରତିଦ୍ୱନ୍ଦ୍ୱୀମାନେ ଢେର୍ ଆଗୁଆ ରହିବା ସହ ଗବେଷଣାକୁ ଗୁରୁତ୍ୱ ଦେଉଛନ୍ତି। ଭାରତରେ ଉଚ୍ଚଶିକ୍ଷାକୁ ଗୁରୁତ୍ୱ ଦିଆଯାଉଥିଲେ ହେଁ ଶ୍ରେଷ୍ଠ ୩୦୦ରେ ସ୍ଥାନ ନ ମିଳିବା ପରିତାପର ବିଷୟ ବୋଲି ର଼୍ୟାଙ୍କିଙ୍ଗ୍ ଏଡିଟର ଇଲି ବୋଥ୍ଓ୍ବେଲ ପ୍ରକାଶ କରିଛନ୍ତି। ଓ୍ବାଲର୍ଡ ୟୁନିଭର୍ସିଟି ର଼୍ୟାଙ୍କିଙ୍ଗ୍ସ୍ ବିଶ୍ୱର ସବୁଠାରୁ ଶ୍ରେଷ୍ଠ ସମ୍ମାନଜନକ ଶିକ୍ଷା ର଼୍ୟାଙ୍କିଙ୍ଗ୍ଭାବେ ଜଣାଶୁଣା। ବିଶ୍ୱର ୯୨ ଦେଶର ୧,୩୯୬ ଉଚ୍ଚ ଶିକ୍ଷାନୁଷ୍ଠାନର ର଼୍ୟାଙ୍କ ଏହା ପ୍ରସ୍ତୁତ କରିଥାଏ। ଏଥିରେ ଶିକ୍ଷାଦାନ, ଗବେଷଣା, ଜ୍ଞାନ ସ୍ଥାନାନ୍ତରଣ, ଅନ୍ତର୍ଜାତୀୟ ଦୃଷ୍ଟିକୋଣ ସହ ବିଭିନ୍ନ ୧୩ଟି କ୍ଷେତ୍ରରେ ଉଚ୍ଚତର ଗବେଷଣାକୁ ଗୁରୁତ୍ୱ ଦିଆଯାଇଥାଏ। ଚଳିତ ବର୍ଷ ମଧ୍ୟ ଅକ୍ସଫୋର୍ଡ ୟୁନିଭର୍ସିଟି ଲଗାତର ଚତୁର୍ଥ ଥର ଲାଗି ଶ୍ରେଷ୍ଠତ୍ୱ ପ୍ରତିପାଦନ କରିବାରେ ସଫଳ ହୋଇଛି। ଆମେରିକାର ୬୦ ବିଶ୍ୱବିଦ୍ୟାଳୟ ଶ୍ରେଷ୍ଠ ୨୦୦ରେ ସ୍ଥାନ ପାଇଥିବାବେଳେ କାଲିଫର୍ନିିଆର ୧୦ ଏଥିରେ ଅଛନ୍ତି। କାଲିଫର୍ନିଆ ବିଶ୍ୱବିଦ୍ୟାଳୟ ତୃତୀୟରୁ ଦ୍ୱିତୀୟ ସ୍ଥାନକୁ ଆସିଥିବାବେଳେ କେମ୍ବ୍ରିଜ୍ ବିଶ୍ୱବିଦ୍ୟାଳୟ ଦ୍ୱିତୀୟରୁ ତୃତୀୟ ସ୍ଥାନକୁ ଖସିଯାଇଛି। ଏସିଆର ଶ୍ରେଷ୍ଠ ବିଶ୍ୱବିଦ୍ୟାଳୟ ଭାବେ ମେନ୍ଲାଣ୍ଡ ଚାଇନା ସଫଳତା ପାଇଛି।
