ଜୁନାଗଡ଼,୮।୧: କରୋନା କଟକଣା ଯୋଗୁଁ ରାଜ୍ୟର ସମସ୍ତ ଶିକ୍ଷାନୁଷ୍ଠାନଗୁଡିକ ବନ୍ଦ ରହିଥିଲା। ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ପ୍ରାୟ ୧୦ମାସ ବ୍ୟବଧାନ ପରେ ଶୁକ୍ରବାର ହାଇସ୍କୁଲଗୁଡିକ ଖୋଲିଛି। ପ୍ରଥମ ପର୍ଯ୍ୟାୟରେ ହାଇସ୍କୁଲର କେବଳ ଦଶମ ଶ୍ରେଣୀର ଛାତ୍ରୀଛାତ୍ର ଅଧ୍ୟୟନ କରିବେ ବୋଲି ରାଜ୍ୟ ସରକାର ନିର୍ଦ୍ଦେଶ ଜାରି କରିଛନ୍ତି। ଏହି ପରିପ୍ରେକ୍ଷୀରେ ଶୁକ୍ରବାର କଳାହାଣ୍ଡି ଜିଲା ଜୁନାଗଡ ବ୍ଲକର ୩୭ଟି ସରକାରୀ ହାଇସ୍କୁଲ ଖୋଲିଛି। ୩୭ଟି ହାଇସ୍କୁଲର ଦଶମ ଶ୍ରେଣୀରେ ୨୯୬୦ ଛାତ୍ରୀଛାତ୍ର ରହିଥିବାବେଳେ ସେଥିମଧ୍ୟରୁ ଶୁକ୍ରବାର ପ୍ରଥମ ଦିନରେ ୧୦୧୮ଜଣ ଛାତ୍ରୀଛାତ୍ର ସ୍କୁଲକୁ ପଢିବାକୁ ଆସିଥିଲେ। କୋଭିଡ ନିୟମ ଅନୁଯାୟୀ ଗୋଟିଏ ବେଞ୍ଚରେ ଜଣେ ଛାତ୍ରୀ କିମ୍ବା ଛାତ୍ରଙ୍କୁ ବସାଇ ପାଠ ପଢାଯାଉଥିବା ଜୁନାଗଡ଼ ବ୍ଲକ ଶିକ୍ଷା ଅଧିକାରୀ ବିଜୟ କୁମାର ସେନାପତି ପ୍ରକାଶ କରିଛନ୍ତି।
