ଢେଙ୍କାନାଳ ଅଫିସ, ୨୨।୧୨ – ଢେଙ୍କାନାଳ ଜିଲା ଭାଜପାର ମଙ୍ଗ ଧରିଛନ୍ତି ରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା ଆଇନଜୀବୀ ନରେଶ ଚନ୍ଦ୍ର ମହାପାତ୍ର। ରାଜ୍ୟ ନେତୃମଣ୍ଡଳୀ ତାଙ୍କୁ ଜିଲା ସଭାପତି ଦାୟିତ୍ୱ ଦେଇଥିବା ଜିଲା ଉପସଭାପତି ନବକିଶୋର ଗୁରୁ ଶନିବାର ଏକ ପ୍ରେସ୍ ବିଜ୍ଞପ୍ତି ମାଧ୍ୟମରେ ଜଣାଇଛନ୍ତି। ଭାଜପାର ନୀତିଆଦର୍ଶ, କେନ୍ଦ୍ର ସରକାରଙ୍କ ଜନହିତକର ଯୋଜନାଗୁଡ଼ିକୁ ଜନସାଧାରଣଙ୍କ ପାଖରେ ପହଞ୍ଚାଇବା ସହ ବୁଥ୍ସ୍ତରରେ ସଙ୍ଗଠନକୁ ସୁଦୃଢ଼ କରିବାକୁ ପ୍ରୟାସ ଜାରି ରହିବ ବୋଲି ନରେଶ ନିଜ ପ୍ରତିକ୍ରିୟାରେ କହିଛନ୍ତି। ଏଥି ଲାଗି ସେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜ୍ୟ ସଭାପତି ବସନ୍ତ ପଣ୍ଡା, ପୂର୍ବତନ ରାଜ୍ୟ ସଭା ସଦସ୍ୟ ରୁଦ୍ରନାରାୟଣ ପାଣି, ପୂର୍ବତନ ଜିଲା ସଭାପତି ବିଭୂତି ଭୂଷଣ ପ୍ରଧାନ, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ରଙ୍କୁ କୃତଜ୍ଞତା ଜ୍ଞାପନ କରିଛନ୍ତି। ଭାଜପାର ଜଣେ ଆଗଧାଡ଼ିର ନେତା ଭାବେ ନରେଶ ଦୀର୍ଘଦିନ ହେଲା ଦଳ ସହିତ ଜଡ଼ିତ। ସେ ୨୦୧୩ରୁ ୨୦୧୬ ଯାଏ ଭାଜପାର ଜିଲା ସଭାପତି ରହିଥିଲେ।
ସ୍ଥାନୀୟ ଦକ୍ଷିଣକାଳୀ ରୋଡ୍ସ୍ଥିତ ଜିଲା ଭାଜପା କାର୍ଯ୍ୟାଳୟକୁ କେହି ତାଲା ପକାଇ ଦେଇଥିବା ଆଲୋଚନା ହେଉଛି। ଏ ନେଇ ନୂତନ ସଭାପତିଙ୍କ ଦୃଷ୍ଟି ଆକର୍ଷଣ କରାଯିବାରୁ ସେ କହିଥିଲେ, ସେଠାରେ ମଣ୍ଡଳ କାର୍ଯ୍ୟାଳୟ କରାଯିବ। ଏଥିପାଇଁ ତାଲା ପକାଯାଇଛି। ତାଲା ପକାଇଥିବା ବ୍ୟକ୍ତି ଏ ନେଇ ତାଙ୍କୁ ଜଣାଇଛନ୍ତି। ମାସକ ଭିତରେ ନିଜସ୍ବ କାର୍ଯ୍ୟାଳୟ ଉଦ୍ଘାଟିତ ହେବ। ଏହା ହେବା ପର୍ଯ୍ୟନ୍ତ ତାଙ୍କ ନିଜସ୍ବ ବାସଭବନରେ କାର୍ଯ୍ୟାଳୟ ଚାଲିବ ବୋଲି ନରେଶ ସୂଚନା ଦେଇଛନ୍ତି।