ଅନୁଗୋଳ ଅଫିସ୍, ୧।୬- ସେସୁ ସହ ଏନ୍ଜେନ୍ର ଚୁକ୍ତି ଶେଷ ହେବା ଓ ସେସୁ ପରିଚାଳନା ଦାୟିତ୍ୱ ଟାଟା ପାଓ୍ବାର କମ୍ପାନୀ ଲିମିଟେଡ୍କୁ ଯିବା ପରେ ଠିକା କର୍ମଚାରୀଙ୍କ ଭଳି ମିଟର ରିଡିଂ ଓ ବିଲ୍ ଆଦାୟ ଦାୟିତ୍ୱ ତୁଲାଉଥିବା ଅନୁଗୋଳ ଜିଲାର ୯୦ଟି ଏସ୍ଏଚ୍ଜି ଓ ୧୧ଟି ଶକ୍ତି ସହାୟକ ଗୋଷ୍ଠୀର ମହିଳାମାନେ ଏବେ କାମ ହରାଇବା ଆଶଙ୍କାରେ ପଡ଼ିଛନ୍ତି। ତେଣୁ ସେମାନଙ୍କୁ ପୂର୍ବଭଳି କାମ କରିବାର ସୁଯୋଗ ଦେବା ପାଇଁ ସମ୍ପୃକ୍ତ ସଦସ୍ୟମାନେ ସୋମବାର ଜିଲା ପ୍ରଶାସନର ଦ୍ୱାରସ୍ଥ ହୋଇଛନ୍ତି। ପ୍ରଶାସନ ସେମାନଙ୍କ ବ୍ୟବସ୍ଥା ନ କଲେ ଆନ୍ଦୋଳନକୁ ଓହ୍ଲାଇବେ ବୋଲି ସ୍ବୟଂ ସହାୟକ ଗୋଷ୍ଠୀର ସଦସ୍ୟାମାନେ ଚେତାବନୀ ଦେଇଛନ୍ତି।
ଅଭିଯୋଗ ମୁତାବକ, ଅନୁଗୋଳ ଜିଲାର ବଅଁରପାଳ, ତାଳଚେର, କିଶୋରନଗର, ଛେଣ୍ଡିପଦା ଓ ଆଠମଲ୍ଲିକ ବ୍ଲକର ୯୦ଟି ଏସ୍ଏଚ୍ଜି ଓ ୧୧ଟି ଶକ୍ତି ସହାୟିକା ୨୦୦୯ରୁ ସେସୁ ସହ ଚୁକ୍ତି କରି ମିଟର ରିଡିଂ କରୁଥିଲେ। ୨୦୧୨ରେ ସେସୁ ବିଲ୍ ଆଦାୟ ଓ ମିଟର ରିଡିଂ ଦାୟିତ୍ୱ ଏନ୍ଜେନ୍କୁ ଦେଇଥିଲା। ଏହି ଏସ୍ଏଚ୍ଜି ଓ ଶକ୍ତି ସହାୟିକାମାନେ ଏନ୍ଜେନ୍ରେ ମଧ୍ୟ କାମ କରିଥିଲେ। କିନ୍ତୁ ସେସୁ ସହ ଏନ୍ଜେନ୍ର ଚୁକ୍ତି ଶେଷ ହୋଇସାରିଥିବାରୁ ଏବେ ସେମାନେ ଆଶଙ୍କାରେ ରହିଛନ୍ତି। ତୁରନ୍ତ ନିଯୁକ୍ତି ଦାବି ସହ ଯିଏ ଯେଉଁଠି ଯେତିକି ଟଙ୍କାରେ କାମ କରୁଥିଲେ ସେମିତି କାର୍ଯ୍ୟ କରିବାକୁ ଦିଆଯାଉ ବୋଲି ଦାବି କିର ଜିଲାର ୧୦୧ଟି ଏସ୍ଏଚ୍ଜି ଓ ଶକ୍ତି ସହାୟିକା ଜିଲା ପ୍ରଶାସନର ଦ୍ୱାରସ୍ଥ ହୋଇଥିଲେ। ଶତାଧିକ ମହିଳା ବିକ୍ଷୋଭ ପ୍ରଦର୍ଶନ କରିବା ସହ ଜିଲାପାଳ ମନୋଜ କୁମାର ମହାନ୍ତିଙ୍କୁ ଦାବିପତ୍ର ପ୍ରଦାନ କରିଥିଲେ। ଦାବି ପୂରଣ ନ ହେଲେ ଉଠିବୁ ନାହିଁ ବୋଲି ମହିଳାମାନେ ଅଡ଼ି ବସିଥିଲେ। ଫଳରେ ଜିଲାପାଳ ଆସି ୭ ଦିନ ସମୟ ମାଗିଥିବା ଜଣାପଡ଼ିଛି। ୭ ଦିନ ମଧ୍ୟରେ ସେମାନଙ୍କ ସମସ୍ୟାର ସମାଧାନ ହେବ। ଏହି ସମୟ ମଧ୍ୟରେ ସମସ୍ତ କାଗଜପତ୍ର ପ୍ରସ୍ତୁତ କରିବାକୁ ଜିଲାପାଳ କହିଥିଲେ। ବିକ୍ଷୋଭରେ ସବିତା ଦାସ, ଭାନୁମତି ଭୁଖା, ଟୁନି ସାହୁ, ସରସ୍ବତୀ ପ୍ରଧାନ, ଲଳିତ ନାଏକ, ଗୀତାଞ୍ଜଳି ସାହୁ, ବୈଜନ୍ତୀ ପ୍ରଧାନ, କବିତା ପ୍ରଧାନ, ରୁବି ପ୍ରଧାନ, ସୁଜାତା ସାହୁ ପ୍ରମୁଖ ଉପସ୍ଥିତ ଥିଲେ।
