କଣିହାଁ, ୧୩ା୯(ଡି.ଏନ.ଏ.)-ଅନୁଗୋଳ ଜିଲା କଣିହାଁ ବ୍ଲକସ୍ଥିତ ଏନ୍ଟିପିସି ବିଦ୍ୟୁତ୍ ପ୍ରକଳ୍ପର ଆଶପଣ୍ଡ ପାଉଁଶ ପାଣି ଯୋଗୁ ଅଞ୍ଚଳବାସୀ ନାନା ସମସ୍ୟା ଭୋଗୁଛନ୍ତି। ମଙ୍ଗଳବାର ରାତିରେ ଆଶପଣ୍ଡରୁ ପ୍ରବଳ ମାତ୍ରାରେ ପାଉଁଶ ପାଣି ବାହାରି ମସୁଣିହତା ଗ୍ରାମର ପ୍ରାୟ ଦେଢ ଏକର ଜମିରେ ପଶିଛି। ଏଥିଯୋଗୁ ଫସଲ ନଷ୍ଟ ହେବାର ଆଶଙ୍କା ଉପୁଜିଛି। ଏ ନେଇ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି ପ୍ରତିବାଦରେ ମସୁଣିହତାର କ୍ଷତିଗ୍ରସ୍ତ ଚାଷୀମାନେ ବୁଧବାରଠାରୁ ଷ୍ଟେଜ ଓ୍ବାନ ପାଉଁଶ ପୋଖରୀ କାର୍ଯ୍ୟକୁ ଦିନବେଳା ବନ୍ଦ କରାଇ ଆନ୍ଦୋଳନ ଚଳାଇଛନ୍ତି। ଏଥିରେ ଗ୍ରାମର ୧୫ରୁ ଊର୍ଦ୍ଧ୍ୱ ପରିବାର ସାମିଲ ହୋଇଛନ୍ତି। କ୍ଷତିଗ୍ରସ୍ତ ଚାଷୀ ଟିକନ ସାହୁ, ଅଖିଳ ପ୍ରଧାନ, ପ୍ରମୋଦ ପ୍ରଧାନ, ନିତ୍ୟାନନ୍ଦ ପ୍ରଧାନ, ବିରଞ୍ଚି ଦେହୁରୀ, ଭାଗୁଡୁ କୋଇତା ପ୍ରମୁଖଙ୍କ ଅଭିଯୋଗ ମୁତାବକ, ଏନ୍ଟିପିସି ପାଉଁଶ ପୋଖରୀ ଅଭାବ ସତ୍ତ୍ୱେ ପ୍ରକଳ୍ପ ପୂର୍ଣ୍ଣ କାର୍ଯ୍ୟକ୍ଷମ ହେଉଛି। ସେଥିରୁ ବାହାରୁଥିବା ପାଉଁଶର ପରିଚାଳନା ଠିକ୍ ଭାବେ କରାଯାଉନାହିଁ। ବାଙ୍ଖୁଲି ନାଳ ଯୋଗେ ଟିକିରା ନଦୀକୁ ଏହି ପାଉଁଶ ଛାଡି ଦିଆଯାଉଥିବାରୁ ବ୍ରାହ୍ମଣୀ ନଦୀ ପ୍ରଦୂଷିତ ହେଉଛି। ସେହିପରି ରାସ୍ତାରେ ମଧ୍ୟ ପ୍ରକଳ୍ପ କର୍ତ୍ତୃପକ୍ଷ ପାଉଁଶ ପାଣି ଛାଡି ଦେଉଥିବାରୁ ଯାତାୟାତରେ ଅସୁବିଧା ହେଉଛି। ଏବେ ସିଧାସଳଖ ଚାଷ ଜମିରେ ଆସି ପାଉଁଶ ପାଣି ପଶିଛି। ତୁରନ୍ତ ଏହାର ସ୍ଥାୟୀ ପ୍ରତିକାର ସହ କ୍ଷତିପୂରଣ ପ୍ରଦାନ, ଠିକାସଂସ୍ଥାରେ ନିଯୁକ୍ତି ପାଇଁ ଗ୍ରାମବାସୀ ଦାବି କରିଛନ୍ତି। ଏ ନେଇ ପ୍ରକଳ୍ପ ଜନ ସମ୍ପର୍କ ଅଧିକାରୀ ଅମିତ ବେହେରା କୁହନ୍ତି, ଆନ୍ଦୋଳନ ଯୋଗୁ ଲୋକଙ୍କୁ ବୁଝାଶୁଝା କରିବାକୁ ପାଉଁଶ ପୋଖରୀ କର୍ତ୍ତୃପକ୍ଷ ଯାଇଥିଲେ। ୪ଟି ଦାବି ମଧ୍ୟରୁ ଚାଷ ଜମିରୁ ପାଉଁଶ ଉଠାଯିବା, ଆଗରୁ ଏପରି ପରିସ୍ଥିତି ଯେପରି ନ ଉପୁଜେ ସେଥିପ୍ରତି ଦୃଷ୍ଟି ଦିଆଯିବା, ଚାଷ କ୍ଷତି ବାବଦ କ୍ଷତିପୂରଣ ପ୍ରଦାନ କରିବାକୁ ପ୍ରକଳ୍ପ କର୍ତ୍ତୃପକ୍ଷ ରାଜି ହୋଇଛନ୍ତି। ହେଲେ ଆନ୍ଦୋଳନକାରୀ ନିଯୁକ୍ତି ପାଇଁ ଅଡି ବସିଛନ୍ତି। ଶୁକ୍ରବାର ଏ ସର୍ମ୍ପକରେ ଆଲୋଚନା ପାଇଁ ଆନ୍ଦୋଳନକାରୀଙ୍କୁ ଡକାଯାଇଛି।
