ଜଳେଶ୍ୱର, ୧୦।୮-ଜଳେଶ୍ୱର ବ୍ଲକ ଆରୁହା ପଞ୍ଚାୟତର ନିମପୁର ଗ୍ରାମର ଶ୍ମଶାନ ଜାଗାକୁ ଗ୍ରାମ ବାହାରୁ ଆସିଥିବା କେତେକ ଆଦିବାସୀ ଅସ୍ଥାୟୀ ଚାଳିଆ କରି ରହିଛନ୍ତି। ଏହାକୁ ବିରୋଧ କରି ଗ୍ରାମବାସୀ ଶୁକ୍ରବାର ତହସିଲ କାର୍ଯ୍ୟାଳୟରେ ଧାରଣା ଦେଇଛନ୍ତି। ଗ୍ରାମର ଶ୍ମଶାନ ଜାଗାରୁ ଜବରଦଖଲ ଉଚ୍ଛେଦ ନ ହେବା ଯାଏ ଏହି ଧାରଣା ଚାଲୁରହିବ ବୋଲି ଗ୍ରାମବାସୀ କହିଛନ୍ତି।
ଗତ ୨୦୧୪ ନଭେମ୍ବର ୪ ତାରିଖଠାରୁ ଏହି ଆଦିବାସୀମାନେ ଗ୍ରାମ ଶ୍ମଶାନକୁ ଜବରଦଖଲ କରି ସେଠାରେ ଚାଳିଆ କରି ରହିଆସୁଛନ୍ତି। ସେମାନଙ୍କୁ ଉଚ୍ଛେଦ କରିବା ପାଇଁ ଗ୍ରାମବାସୀଙ୍କ ତରଫରୁ ବାଲେଶ୍ୱର କୋର୍ଟରେ ସିଟି କେସ ନଂ.୬୧୫/୧୪ ଏବଂ ଜଳେଶ୍ୱର ପି.ଏସ୍. କେସ୍ ନଂ.୨୭୫/୧୪ରେ ମାମଲା ଚାଲୁ ରହିଛି। ପୁଣି ୨୦୧୯ ମାର୍ଚ୍ଚ ୨୮ ତାରିଖ ରାତିରେ କେତେକ ଲୋକ ଆସି ସେହି ଶ୍ମଶାନ ଜାଗାରେ ଘର କରିବା ଆରମ୍ଭ କରିଥିଲେ। ଏନେଇ ଗ୍ରାମବାସୀ ଜଳେଶ୍ୱର ଆଇଆଇସି, ଏସ୍ଡିପିଓ, ଜଳେଶ୍ୱର ତହସିଲଦାର ଓ ବାଲେଶ୍ୱର ଜିଲାପାଳଙ୍କୁ ଲିଖିତ ଜଣାଇବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ। ତେଣୁ ନିମପୁର ଗ୍ରାମବାସୀ ଶୁକ୍ରବାର ପୂର୍ବାହ୍ନରୁ ଜଳେଶ୍ୱର ତହସିଲ ଅଫିସ ସମ୍ମୁଖରେ ଧାରଣାରେ ବସିଛନ୍ତି। ପ୍ରତ୍ୟେକ ଦିନ ପୂର୍ବାହ୍ନ୧୧ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ଏହି ଧାରଣା ଆସନ୍ତା ୧୪ ତାରିଖ ଯାଏ ଚାଲୁ ରହିବ ବୋଲି ଗ୍ରାମବାସୀ କହିଛନ୍ତି। ଏହି ଧାରଣାରେ ନିମପୁର ଗ୍ରାମ ପରିଚାଳନା କମିଟି ସଭାପତି ଲକ୍ଷ୍ମୀନାରାୟଣ ପ୍ରଧାନ, ସମ୍ପାଦକ ନିଗମାନନ୍ଦ ପାତ୍ରଙ୍କ ନେତୃତ୍ୱରେ ଜୟନ୍ତ କୁମାର ସାହୁ, ସୁକୁମାର ଦାସ, ସୁରେଶ ଚନ୍ଦ୍ର ଗିରି, ଗୈାତମ ପ୍ରଧାନ, ସୁରେନ୍ଦ୍ର ବ୍ରହ୍ନ, କାଳିଚରଣ ସାହୁ, ବେଣୁଧର ବେହେରା, ହରି ବେଶ୍ରା, ମହେଶ୍ୱର ପ୍ରଧାନ, ମନୋରଞ୍ଜନ ଘୋଷ, ଅରୁଣ କୁମାର ପ୍ରଧାନ ପ୍ରମୁଖ ସାମିଲ ହୋଇଛନ୍ତି।
ଏ ସମ୍ପର୍କରେ ତହସିଲଦାର ଅଭିମନ୍ୟୁ ପଣ୍ଡାଙ୍କୁ ପଚାରିବାରୁ ସେ କହିଥିଲେ, ସେହି ଶ୍ମଶାନ ଜମିରେ ମୋଟ ୭୦ଜଣ ଲୋକ ଜବରଦଖଲ କରି ରହିଛନ୍ତି। ଗ୍ରାମବାସୀଙ୍କର ଦାବି ଫଳରେ ବର୍ତ୍ତମାନ ସୁଦ୍ଧା ୩୦ଜଣଙ୍କୁ ଅନ୍ୟତ୍ର ଥଇଥାନ କରାଯାଇଛି। ବାକି ୪୦ ଜଣଙ୍କୁ ନୋଟିସ ଜାରି କରାଯାଇଛି। ଆସନ୍ତା ୧୪ତାରିଖ ସୁଦ୍ଧା ଉକ୍ତ ଅଞ୍ଚଳକୁ ଜବରଦଖଲ ମୁକ୍ତ କରାଯିବ ବୋଲି କହିଛନ୍ତି।
