ରୂପ୍ସା, ୨୨।୮(ଡି.ଏନ.ଏ.)-ବାଲେଶ୍ୱର ସଦର ବ୍ଲକ ରୂପ୍ସା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗୁରୁବାର ଉତ୍ତେଜନା ଦେଖାଦେଇଛି। ଜଣେ ଆସନ୍ନ ପ୍ରସବାଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିବାକୁ ଆସିଥିବା ଜନନୀ ଏକ୍ସପ୍ରେସ୍ (୧୦୨ ଆମ୍ବୁଲାନ୍ସ) ଡ୍ରାଇଭରଙ୍କ ଦୁର୍ବ୍ୟବହାର ଓ ଟଙ୍କା ମାଗିବା ଘଟଣାରେ ଅପ୍ରୀତିକର ପରିସ୍ଥିତି ଉପୁଜିଥିଲା। ଏପରିକି ଡ୍ରାଇଭରଜଣକ ରାସ୍ତାରେ ଦେଖି ନେବ ବୋଲି କହି ଧମକ ଦେବାରୁ ରୋଗୀ ଓ ତାଙ୍କ ସମ୍ପର୍କୀୟମାନେ ଭୟରେ ଅନ୍ୟ ଏକ ଘରୋଇ ଭ୍ୟାନ୍ରେ ମୁଖ୍ୟ ଚିକିତ୍ସାଳୟକୁ ନେଇଥିଲେ। ଡ୍ରାଇଭରଙ୍କ ଏପରି ଆଚରଣକୁ ବିରୋଧ କରି ଉତ୍ତ୍ୟକ୍ତ ଲୋକେ ମେଡ଼ିକାଲ ପରିସରରେ ଡ୍ରାଇଭର ସହ ଜନନୀ ଏକ୍ସପ୍ରେସ୍କୁ ଅଟକ ରଖିଥିଲେ। ମେଡ଼ିକାଲ ଅଫିସର ଡା. ବିନୟ କୁମାର ଦାସ ମହାପାତ୍ର ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିଥିଲେ।
ରୂପ୍ସା ଥାନା ମିରିଗିମୁଣ୍ଡି ଗ୍ରାମର କାର୍ତ୍ତିକ ବେହେରାଙ୍କ ସ୍ତ୍ରୀ ମମତା ଗୁରୁବାର ଭୋର୍ ସମୟରେ ସ୍ବାସ୍ଥ୍ୟକେନ୍ଦ୍ରରେ ପ୍ରସବ ପାଇଁ ଭର୍ତ୍ତି ହୋଇଥିଲେ। ଏହାପରେ ତାଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା। ପରିବାର ଲୋକେ ମାଗଣା ସ୍ବାସ୍ଥ୍ୟସେବା ପାଇଁ ଜନନୀ ଏକ୍ସପ୍ରେସ୍ (ନଂ. ଓଡ଼ି୦୧ୟୁ-୭୫୧୯)କୁ ଫୋନ୍ କରିଥିଲେ। ବାରମ୍ବାର ଫୋନ କରିବା ପରେ ବିଳମ୍ବରେ ଆମ୍ବୁଲାନ୍ସ ପହଞ୍ଚିଥିଲା। ଆସନ୍ନ ପ୍ରସବାଙ୍କ ପରିବାର ଲୋକଙ୍କୁ ଡ୍ରାଇଭର ଜଣକ ଫୋନ୍ରେ ମଧ୍ୟ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଆମ୍ବୁଲାନ୍ସ ପହଞ୍ଚିବା ପରେ କାର୍ତ୍ତିକ, ତାଙ୍କ ପନତ୍ୀ ଓ ଭାଉଜ ସେଥିରେ ବସିଥିଲେ। ଡ୍ରାଇଭର ଜଣକ ସେମାନଙ୍କୁ ୫ଶହ ଟଙ୍କା ମାଗିଥିଲେ। କାର୍ତ୍ତିକ ଏହାର ପ୍ରତିବାଦ କରିବାରୁ ଡ୍ରାଇଭର ଜଣକ ସେମାନଙ୍କୁ ରାସ୍ତାରେ ଦେଖିନେବ କହି ଧମକ ଦେଇଥିଲେ। ଫଳରେ ଉତ୍ତେଜନା ଦେଖାଦେଇଥିଲା। ଉତ୍ତ୍ୟକ୍ତ ଲୋକେ ଡ୍ରାଇଭର ସହ ଆମ୍ବୁଲାନ୍ସକୁ ଅଟକ ରଖି ମେଡ଼ିକାଲ ଅଫିସରଙ୍କୁ ଖବର ଦେଇଥିଲେ। ମେଡ଼ିକାଲ ଅଫିସର ଆସି ବୁଝାଶୁଝା କରୁଥିବା ବେଳେ ଡ୍ରାଇଭର ଜଣକ ଆମ୍ବୁଲାନ୍ସ ନେଇ ଦ୍ରୁତ ବେଗରେ ବାଲେଶ୍ୱର ଅଭିମୁଖେ ପଳାଇଥିଲେ। ହେଲେ ରୂପ୍ସା ବସ୍ଷ୍ଟାଣ୍ଡ ରାସ୍ତାର ମହାପାତ୍ର ହାଇସ୍କୁଲଠାରେ ଲୋକେ ଆମ୍ବୁଲାନ୍ସକୁୁ ଅଟକାଇଥିଲେ। ଥାନାଧିକାରୀ ସୁଚନ୍ଦ୍ର ମହାଳିକ ପହଞ୍ଚି ଡ୍ରାଇଭର ସହ ଆମ୍ବୁଲାନ୍ସକୁ ଥାନାକୁ ନେଇ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡ଼ିଥିଲା।
