ଓ୍ବାଶିଂଟନ,୨୦।୧: ୱାଶିଂଟନ ଡି.ସି.ର ନ୍ୟାସନାଲ ମଲରେ ରାତାରାତି ସମସ୍ତଙ୍କ ଦୃଷ୍ଟି ଆକର୍ଷଣ କରିଛି ଏକ ୧୦ ଫୁଟ ଉଚ୍ଚ ପ୍ରତିକୃତି ବା ରେପ୍ଲିକା।
ଏହା ଡୋନାଲ୍ଡ ଟ୍ରମ୍ପଙ୍କ ଉଦ୍ଦେଶ୍ୟରେ ଲେଖାଯାଇଥିବା ଏକ ପୁରୁଣା ଜନ୍ମଦିନ ବାର୍ତ୍ତାର ନକଲ, ଯାହା ଏକଦା ଦୋଷୀ ସାବ୍ୟସ୍ତ ହୋଇଥିବା ଯୌନ ଅପରାଧୀ ଜେଫ୍ରି ଏପଷ୍ଟାଇନଙ୍କୁ ଉପହାର ଦିଆଯାଇଥିଲା।
ଏହାକୁ ‘ଦି ସିକ୍ରେଟ ହ୍ୟାଣ୍ଡସେକ’ ନାମକ ଏକ ଗୋଷ୍ଠୀ ଦ୍ୱାରା ସ୍ଥାପିତ ହୋଇଥିଲା। ଏହି ଇନଷ୍ଟଲେଶନ ଏକ ବଡ଼ କାର୍ଡ ପରି। ଗୋଟିଏ ପାର୍ଶ୍ୱରେ ଟ୍ରମ୍ପଙ୍କୁ ସମ୍ବୋଧିତ ଏକ ବାର୍ତ୍ତା ରହିଛି, ଯେଉଁଥିରେ ଜଣେ ମହିଳାଙ୍କ ସ୍କେଚ ରହିଛି। ଏଥିରେ ଲେଖା ଅଛି, ‘ଜନ୍ମଦିନର ଶୁଭେଚ୍ଛା ଏବଂ ପ୍ରତ୍ୟେକ ଦିନ ଆଉ ଏକ ଆଶ୍ଚର୍ଯ୍ୟଜନକ ଗୁପ୍ତ ରହସ୍ୟ ହେଉ।’ ଅନ୍ୟ ପାର୍ଶ୍ୱରେ ଲେଖା ଅଛି, ‘ହାପି ବାର୍ଥ ଡେ’ ଟୁ ଏ ଟେରିଫିକ ଗାୟ’।
ସୂଚନାଯୋଗ୍ୟ, ଏପଷ୍ଟାଇନଙ୍କ ଜନ୍ମଦିନ ଜାନୁଆରୀ ୨୦ ତାରିଖ ଥିଲା। ଗୋଷ୍ଠୀ ଅନୁଯାୟୀ, ରେପ୍ଲିକାଟି ରବିବାର ରାତିରେ ସ୍ଥାପିତ ହୋଇଥିଲା ଏବଂ ଜାନୁଆରୀ ୨୩ ତାରିଖ ପର୍ଯ୍ୟନ୍ତ ଏହାର ଅନୁମତି ରହିଛି। ୱାଲ ଷ୍ଟ୍ରିଟ ଜର୍ନାଲ ଗତ ବର୍ଷ ଜୁଲାଇରେ ଏହି ବାର୍ତ୍ତା ବିଷୟରେ ରିପୋର୍ଟ କରିଥିଲା। ଟ୍ରମ୍ପ ଏଥିରେ ସ୍ବାକ୍ଷର କରିବାକୁ ମନା କରିଥିଲେ ଏବଂ କହିଥିଲେ ଯେ ଏପଷ୍ଟାଇନଙ୍କ ସହିତ ତାଙ୍କର କୌଣସି ଘନିଷ୍ଠ ସମ୍ପର୍କ ନାହିଁ। ସେ ଖବରକାଗଜ ଉପରେ ମଧ୍ୟ ମାମଲା ରୁଜୁ କରିଥିଲେ, ଦାବି କରିଥିଲେ ଯେ ଅନ୍ୟ କେହି ଏହାକୁ ଲେଖିଥିବେ।
ଟ୍ରମ୍ଫ ଏପଷ୍ଟାଇନଙ୍କ ସହିତ ଜଡିତ କୌଣସି ଆଇନଗତ ଅଭିଯୋଗର ସମ୍ମୁଖୀନ ହୋଇନାହାଁନ୍ତି। ଯୌନ ଚାଲାଣ ଅଭିଯୋଗରେ ବିଚାର ପାଇଁ ଅପେକ୍ଷା କରି ୨୦୧୯ରେ ଜେଲରେ ଏପଷ୍ଟାଇନଙ୍କ ମୃତ୍ୟୁ ହୋଇଥିଲା। ଏହି ବାର୍ତ୍ତାଟି ଏପଷ୍ଟାଇନଙ୍କ ପ୍ରେମିକା ଘିସଲେନ ମ୍ୟାକ୍ସୱେଲଙ୍କ ଦ୍ୱାରା ସୃଷ୍ଟି ହୋଇଥିବା ଏକ ‘ଜନ୍ମଦିନ ପୁସ୍ତକ’ର ଅଂଶ ଥିଲା।
Dharitri – The Largest & Most Trusted Odia Daily
