ଭୁବନେଶ୍ୱର, ୫ା୮(ବ୍ୟୁରୋ): ରାଜମହଲ ଛକରେ ଜଣେ ବ୍ୟକ୍ତିଙ୍କ ଗୋଡକୁ ଛୁରାମାଡ କରି ଲୁଟ ଉଦ୍ୟମ କରୁଥିବା ଅଭିଯୁକ୍ତଙ୍କୁ କ୍ୟାପିଟାଲ ଥାନା ପୋଲିସ ରବିବାର ଗିରଫ କରିଥିବାବେଳେ ୨ଜଣ ଫେରାର ଅଛନ୍ତି। ସେ ହେଲେ ଅଶୋକ ନଗର ଅଞ୍ଚଳର ରାକେଶ ବେହେରା। ସୂଚନା ମୁତାବକ, ଏହି ଥାନା ଅଞ୍ଚଳରେ ରହୁଥିବା କେ ବିକ୍ରମ ଶନିବାର ରାତି ୮ଟା ୩୦ବେଳେ ବୋଲବମ ସାମଗ୍ରୀ କିଣିବାକୁ ୟୁନିଟ ୧ ମାର୍କେଟ ଯାଉଥିଲେ। ରାଜମହଲ ଛକ ନିକଟରେ ଅଭିଯୁକ୍ତ ରାକେଶ ଏବଂ ତାଙ୍କ ଦୁଇ ସହଯୋଗୀ ବିକ୍ରମଙ୍କୁ ପଛରୁ ଆକ୍ରମଣ କରିଥିଲେ। ଉଭୟଙ୍କ ମଧ୍ୟରେ ଧସ୍ତାଧସ୍ତି ବେଳେ ଏକ ଛୁରିରେ ଅଭିଯୁକ୍ତ ବିକ୍ରମଙ୍କ ଗୋଡକୁ ଆକ୍ରମଣ କରିଥିଲେ। ସେ ଦୌଡି ଯାଇ ଥାନାର ଦ୍ୱାରସ୍ଥ ହୋଇଥିଲେ। ଏ ନେଇ ପୋଲିସ ନଂ ୨୮୧/୧୯ରେ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରିବା ସହ ଫେରାର ଅଭିଯୁକ୍ତଙ୍କୁ ଧରିବା ନେଇ ଚଢାଉ ଜାରି ରହିଛି।
