ଛତ୍ରପୁର,୧୦।୬( ଦିଲ୍ଲୀପ ସାମଲ) : ଛତ୍ରପୁର ପୌର ପରିଷଦର ଅଧ୍ୟକ୍ଷା ଶର୍ମିଷ୍ଠା ପ୍ରଧାନଙ୍କ ଅକାଳ ବିୟୋଗ ହୋଇଛି । ସେ ଗତ ଏକ ମାସରୁ ଅଧିକ ଦିନ ଧରି ଅସୁସ୍ଥ ଥିଲେ । ଭୁବନେଶ୍ୱର ଏମ୍ସ ହସ୍ପିଟାଲରେ ସେ ଚିକିତ୍ସିତ ହେଉଥିବା ଅବସ୍ଥାରେ ବୁଧବାର ତାଙ୍କ ବିୟୋଗ ହୋଇଛି । ଯାହାକୁ ନେଇ ଛତ୍ରପୁର ଅଂଚଳରେ ଶୋକର ଛାୟା ଖେଳି ଯାଇଛି ।
ସ୍ବର୍ଗତ ଶର୍ମିଷ୍ଠା ପ୍ରଧାନ ଜଣେ ମେଳାପୀ, ପରୋପକାରୀ, ବନ୍ଧୁବାଛଲ୍ୟ ଏବଂ ସମାଜସେବୀ ଭାବେ ସୁପରିଚିତ ଥିଲେ । ଛତ୍ରପୁର ଚର୍ଚ୍ଚ ରୋଡ଼ ନିବାସୀ ଯୁବ ନେତା କେ. ଚନ୍ଦ୍ର ଶେଖର ରେଡ୍ଡୀଙ୍କ ଧର୍ମପତ୍ନୀ ସ୍ବର୍ଗତ ଶର୍ମିଷ୍ଠା ପ୍ରଧାନ ନିଜ ଉତ୍ତମ ବ୍ୟବହାର ଓ ସ୍ମିତ ହାସ୍ୟ ଦ୍ୱାରା ସହର ବାସୀଙ୍କ ଅତି ପ୍ରିୟଭାଜନ ହୋଇଥିବା ବେଳେ ତାଙ୍କ ବିୟୋଗରେ ସହରର ସମସ୍ତ ରାଜନୈତିକ ବ୍ୟକ୍ତି ବିଶେଷ, ସମାଜସେବୀ, କାଉନସିଲର ତଥା ଜନ ସାଧାରଣମାନେ ଦୁଃଖ ପ୍ରକାଶ କରିଛନ୍ତି । ତାଙ୍କର ଗୋଟିଏ ପୁଅ ରହିଥିବା ବେଳେ ସେ ଭାରତୀୟ ଜନତା ପାର୍ଟିରୁ ଛତ୍ରପୁର ଏନଏସି ଅଧ୍ୟକ୍ଷା ପଦବୀ ନିମନ୍ତେ ସିଧାସଳଖ ନିର୍ବାଚନ ଲଢ଼ି ବିଜୟୀ ହୋଇଥିଲେ । ଗତ ୨୦୨୨ ମସିହା ମାର୍ଚ୍ଚ ମାସ ୩୦ ତାରିଖ ଦିନ ଛତ୍ରପୁର ଏନଏସି ଅଧ୍ୟକ୍ଷା ଭାବେ ଦାୟିତ୍ୱ ନେଇଥିଲେ । ତାଙ୍କ ସମୟରେ ଛତ୍ରପୁର ଏନଏସିକୁ ସରକାରଙ୍କ ପକ୍ଷରୁ ପୌର ପରିଷଦ ଭାବେ ଘୋଷଣା କରାଯାଇଥିଲା ।
