ବନ୍ତଳା/ଅନୁଗୋଳ ଅଫିସ,୨୮।୯(ଡି.ଏନ୍.ଏ.): ଅନୁଗୋଳ ଜିଲା ପୁରୁଣାକୋଟ ଥାନା ଅନ୍ତୁଳିଆ ଫରେଷ୍ଟ ବିଟ୍ ଅଧୀନ ଅନ୍ତୁଳିଆ ରିଜର୍ଭ ଜଙ୍ଗଲର କୁରୁତାପେ ନିକଟକୁ ଛତୁ ତୋଳିବାକୁ ଯାଇ ଶନିବାର ସକାଳେ ହେଟା ବାଘ ଆକ୍ରମଣରେ ଜଣେ ଗୁରୁତର ହୋଇଛନ୍ତି। ସେ ହେଲେ ଅନ୍ତୁଳିଆ ଗ୍ରାମର ଚିତ୍ତ ଦଳବେହେରା(୫୫) ।
ସୂଚନାନୁଯାୟୀ, ଚିତ୍ତଙ୍କ ସହ ପୁତୁରା ବିଦ୍ୟାଧର ଦଳ ବେହେରା(୩୫) ଜଙ୍ଗଲକୁ ଛତୁ ଆଣିବାକୁ ଯାଇଥିଲେ। ତେବେ ସେଠାରେ ହେଟା ଆକ୍ରମଣ କରିବାରୁ ବିଦ୍ୟାଧର ଗଛ ଉପରକୁ ଚଢି ଯାଇଥିଲେ। ମାତ୍ର ଚିତ୍ତ ଯାଇ ନ ପାରିବାରୁ ବାଘ ଆକ୍ରମଣରେ ଗୁରୁତର ହୋଇପଡିଥିଲେ। ତାଙ୍କ ମୁଣ୍ଡ,ଆଖି ଓ ହାତରେ ଗଭୀର କ୍ଷତହୋଇ ଥିଲା। ଗୁରୁତର ଅବସ୍ଥାରେ ଚିତ୍ତଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ଼ ମେଡିକାଲ ସ୍ଥାନାନ୍ତର କରାଯାଇଛି। ଚିତ୍ତଙ୍କୁ କଲରାପତରିଆ ବାଘ ଆକ୍ରମଣ କରିଥିବା ପରିବାର ପକ୍ଷରୁ ଅଭିଯୋଗ ହେଉଥିବା ବେଳେ ଅନୁଗୋଳ ବନଖଣ୍ଡ ଡିଏଫ୍ଓ ଭି କାର୍ତ୍ତିକ ହେଟାବାଘ କାମୁଡିଥିବା ସ୍ପଷ୍ଟ କରିଛନ୍ତି। ତାଙ୍କ ଚିକିତ୍ସା ନିମନ୍ତେ ସମସ୍ତ ଖର୍ଚ୍ଚ ବନବିଭାଗ ବହନ କରିବ ବୋଲି ସେ କହିଛନ୍ତି। କ୍ଷତିପୂରଣ ବାବଦକୁ ୧ଲକ୍ଷ ଟଙ୍କା ପରିବାର ଲୋକଙ୍କୁ ଦିଆଯିବ ବୋଲି ସୂଚନା ମିଳିଛି। ତେବେ ଅନ୍ୟ ପକ୍ଷେ ଏକ ସ୍ବତନ୍ତ୍ର ଟିମ୍ ଘଟଣାସ୍ଥଳରେ ପହଞ୍ଚି ବାଘ ପାଦ ଚିହ୍ନ ଖୋଜିବ ବୋଲି ଡିଏଫ୍ଓ କହିଛନ୍ତି।
