ରଣପୁର,୨୪।୮(ସ୍ବ.ପ୍ର.)-ମାଲିକ ଗାଡି ଚୋରିର ଦୋଷ ଡ୍ରାଇଭରଙ୍କ ଉପରେ ଲଦିବାରୁ ଡ୍ରାଇଭର ମାନସିକ ଭାରସାମ୍ୟ ହରାଇ ଆମତ୍ହତ୍ୟା କରିଥିବା ଅଭିଯୋଗ ହୋଇଛି। ସମ୍ପୃକ୍ତ ମାଲିକଙ୍କୁ ଗିରଫ ଦାବିରେ ଶୁକ୍ରବାର ରଣପୁର ଥାନା ରାଜସୁନାଖଳା ଫାଣ୍ଡି ସମ୍ମୁଖରେ ଡ୍ରାଇଭରଙ୍କ ମୃତଦେହ ରଖି ସମ୍ପର୍କୀୟ ଓ ଗ୍ରାମବାସୀ ବିକ୍ଷୋଭ ପ୍ରଦର୍ଶନ କରିଛନ୍ତି। ଅପରାହ୍ନ ୧ଟାରୁ ବିକ୍ଷୋଭ ଆରମ୍ଭ ହୋଇଥିଲା। ସନ୍ଧ୍ୟାରେ ରଣପୁର ଆଇଆଇସି ବୈଦ୍ୟନାଥ ଭୋଇ ଘଟଣାସ୍ଥଳରେ ପହଞ୍ଚତ୍ ଗାଡିମାଲିକଙ୍କୁ ଗିରଫ କରିବାର ପ୍ରତିଶ୍ରୁତି ଦେବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା ।
ପ୍ରକାଶ ଯେ, ରାଜସୁନାଖଳା ବଢ଼େଇ ସାହିର ପ୍ରଭାତ ମଲ୍ଲିକଙ୍କ ପୁଅ ତୁଷାର (୨୨) ସେହି ସାହିର ଅଜୟ କୁମାର ସାହୁଙ୍କ ଟାଟା ଏସିଇ ଗାଡି ଚଲାଉଥିଲେ। ଗତ କିଛିଦିନ ତଳେ ଅଜୟଙ୍କ ଗାଡି ଚୋରି ହୋଇ ଯାଇଥିଲା । ଅଜୟ ଚୋରି ପାଇଁ ଡ୍ରାଇଭର ତୁଷାରଙ୍କୁ ଦାୟୀ କରିଥିଲେ । ତୁଷାର ନିର୍ଦ୍ଦୋଷ ବୋଲି ବାରମ୍ବାର କହିଥିଲେ ମଧ୍ୟ ଅଜୟ ନିଜ କଥାରୁ ହଟି ନ ଥିଲେ । ଏପରିସ୍ଥଳେ ତୁଷାର ଗତ ୧୯ ତାରିଖରୁ ନିଖୋଜ ହୋଇଯାଇଥିଲେ । ପରିବାର ଲୋକମାନେ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କର ଟେର ପାଇ ନ ଥିଲେ। ତେବେ ପୁରୀ ରେଳ ଷ୍ଟେଶନରେ ସେ ବିଷ ପିଇ ଆମତ୍ହତ୍ୟା କରିଥିବା ଜଣାପଡିଥିଲା। ପୁରୀରୁ ମୃତଦେହ ବ୍ୟବଚ୍ଛେଦ ହୋଇ ଆସିବା ପରେ ସୁନାଖଳା ଫାଣ୍ଡି ସମ୍ମୁଖରେ ପରିବାର ସଦସ୍ୟ, ସମ୍ପର୍କୀୟ ଘେରାଉ କରିଥିଲେ । ମୃତକଙ୍କ ମା ପ୍ରତିମା ଫାଣ୍ଡିରେ ଅଭିଯୋଗ କରିବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
