ଗଣ୍ଡତୁରୁମ, ୨୯।୬ (ଡି.ଏନ୍.ଏ): ଭେଡ଼େନ ବ୍ଲକ ମହୁଲପାଲି ପଁଚେତ୍ ଟିହିକିପାଲି ଗଁ। ରେ କିଡ଼୍ନୀ ରୁଗୀକଁର ସଂଖ୍ୟା ଦିନୁଦିନ୍କେ ବଢ଼ବାରେ ଲାଗିଛେ। ଗଲା ୩ ବଛର ଭିତରେ କିଡ଼୍ନୀ ରୋଗ୍ରେ ଗଁ। ର ୫ ଝନ୍ ମରିଥିଲାବେଲେ ଗଲା ବୁଧୁବାର ରାତି ଆର ଝନେ ରୁଗୀ ପୀତାମ୍ବର ମେହେର(୫୫)କଁର ମୁର୍ତୁ ଘଟିଛେ। ଝନେ ଉତାରୁ ଝନେ କିଡ଼୍ନୀ ରୋଗ୍ରେ ମରବାର ଘଟନାକେ ନେଇ ଗଁ। ରେ ଗୁଟେ ଭଏର ବାତାବରନ୍ ସୁରୁଷ୍ଟି ହେଇଛେ। ପିଇଲା ପାଏନ୍ ଲାଗି ଏନ୍ତା ସମସିଆ ହେଉଥିବାର ଗଁ। ବାସୀ ଅଭିଯୋଗ କରି ପରଶାସନର ଦୁରୁଷ୍ଟି ଆକରଷନ୍ କରି ନିରାଶ ହେଇଛନ୍। ଏନ୍ତାଥି ଆଏବାର ଦିନେ ଗଁ। ବାସୀ ଗୁଟେ ବଡ଼ଭାରି ଉଲ୍ଗୁଲାନ ଲାଗି ସଜ୍ବାଜ ହେଉଥିବାର ଜନାପଡ଼ିଛେ।
ସୂଚନା ଅନ୍ସାରେ ଟିହିକିପାଲି ଗଁ। ୩ଟା ଓ୍ବାର୍ଡକେ ନେଇ ଗଠିତ୍ ହେଇଥିଲାବେଲେ ପାଖାପାଖି ୧୫ ଶହ ଲୋକ୍ ବାସ୍ କରୁଛନ୍। ଗଁାବାସୀକର ପିଇଲା ପାଏନ୍ ଲାଗି ୧ କି.ମି. ଦୂରେ ଥିବାର ଗୁଟେ ନଲ୍ଚୁଅଁା ନ ସାହାଭରସା। କାରନ୍ ଗଁାରେ ଥିବାର ବାକି ନଲ୍ଚୁଅଁ। ରୁ ଖର ପାଏନ୍ ବାହାରୁଛେ, ଯେନ୍ଥିରଲାଗି ସେ ପାଏନ୍ ରଁଧାବଢ଼ା, ଖାଇପିଇ ନାଇଁହେବାର। ଗଁାବାସୀକର ପିଇଲା ପାଏନ୍ ସୁବିଧା ଲାଗି ଥାନୀୟ ଗିରିଗୋବର୍ଦ୍ଧନ ପାହାଡ଼ ପାସେ ୩ ବଛର ତଲେ ଗୁଟେ ଗଭୀର ନଲ୍ଚୁଅଁା କୁଡ଼ାଯାଇଛେ। ହେଲେ ଆଏଜ୍ତକ ସେଟା କାଯ୍କ୍ଷମ ନାଇଁ ହେଇପାରି। ଏନ୍ତାଥି ଗଁାବାସୀ ଉପେ ଶୂଇନ୍ ହେଇ ଆସର ପାସର ବଁଧ୍କଟା, ଖୁଲାଚୁଅଁାର ଦୂଷିତ ପାଏନ୍ ବେଭାର କରୁଛନ୍। ଦୂଷିତ୍ ପାଏନ୍ ବେଭାର ଲାଗି ଗଁାରେ କିଡ଼୍ନୀ ରୋଗ୍ ବହପୁଥିବାର ଗଁାବାସୀ ଅଭିଯୋଗ କରିଛନ୍। ଗଲା ୩ ବଛର ଭିତରେ ଗଁାର ଗରୁଡ଼ ବାରିକ(୫୦), ଦାମିନୀ ମେହେର(୬୫), ଲଲିତ ମେହେର(୫୦), ସୁଶାନ୍ତ ଅଦାବର(୪୦), ଟଙ୍କଧର ପଧାନ(୪୦) ପରମୁଖ କିଡ଼୍ନୀ ରୋଗ୍ରେ ପୀଡ଼ିତ ହେଇ ଆରପାରକେ ଚାଲିଯାଇଛନ୍। ସେନ୍ତା ଗଁାରେ ଆହୁରି ୩୦ରୁ ୩୫ ଝନ୍ ରୋଗ୍ରେ ଆକ୍ରଁାତ ହେଇ ଚିକିସତ୍ିତ ହେଉଛନ୍। ଇ ଘଟନାକେ ନେଇ ଗଁାବାସୀକର ଭିତରେ ଛନ୍କା ପସିଯାଇଥିଲାବେଲେ ଆରକେତେ କୁଟୁମବସିଆ ଉନିଆ ଆଡ଼େ ପଲାବାର ଲାଗି ସଜବାଜ ହେଉଥିବାର ଜନାଯାଇଛେ। ଇ ସମସିଆ ବାବ୍ଦେ ଗଁାର ଝନେ ମହିଲା ରାଜକୁମାରୀ ଛୁରିଆକୁଁ ପଚରାଲାରୁ ଆମେ ଗଁାବାସୀ ପିଇଲା ପାଏନ୍ ଲାଗି ବଡ଼ା ଗୁଲ୍ଗୁଲା ହେଉଛୁଁ। ଗଁାରେ ପିଇଲା ପାଏନ୍ର ବଡ଼ଭାରି ଅଭାବ ରହିଛେ, ସେଥିରଲାଗି ବଁଧର ପାଏନ୍ରେ ରଁଧାବଢ଼ା କରୁଛୁଁ। ସେନ୍ତା ହରିଜନ ପଡ଼ାର ରୋହିତ ପେରାକୁଁ ପଚରାଲରୁ ଆମର ପଡ଼ାବାସୀକର କଥା କେହି ନାଇଁ ଶୁନବାର। ଗଁାରୁ ପଡ଼ାବାସୀ ଦୂଷିତ ପାଏନ୍ ଆନି ବେଭାର କରୁଛନ୍ ଆର ରୁଗ୍ଦୁଖ୍ରେ ପଡ଼ି ମରୁଛନ୍। ହେଲେ ବି ଥାନୀୟ ପରଶାସନର ଚେତା ନାଇଁ ପସବାର ବଲି ସେ କହିଥିଲେ। ଇ ବାବ୍ଦେ ଗଁାର ନରେନ୍ଦ୍ର ପୁରୋହିତ କହିଛନ୍ ଯେ, ଦୂଷିତ ପାଏନ୍ ଲାଗି ଗଁାଥି କିଡ଼୍ନୀ ରୋଗ୍ ଚାପି ଗଲାନ। ଗୁଟେ ପରେ ଗୁଟେ ମରତେଲ ଯାଉଛନ୍। ୩ ବଛର ଭିତରେ ୬ ଝନ୍ ମଲେନ। ଗଁାରେ ଖୁଜଲେ ଆହୁରି ୩୦ରୁ ୪୦ ରୁଗୀ ବାହାରବେ ବଲି ସେ କହିଥିଲେ।
