ହାଟଡିହୀ, ୭।୫(ଡି.ଏନ.ଏ.)-କରୋନା ରୋଗକୁ ମୁକାବିଲା ଲାଗି ସମଗ୍ର ବିଶ୍ୱ ଏବେ ଏକଜୁଟ ହୋଇଛି। ସମସ୍ତେ ସାହାଯ୍ୟ ଓ ସହାୟତାର ହାତ ବଢ଼ାଉଛନ୍ତି। ଏହି ପରିପ୍ରେକ୍ଷୀରେ କେନ୍ଦୁଝର ଜିଲା ହାଟଡିହୀ ବ୍ଲକ ଅଞ୍ଚଳରେ ୨ଜଣ ଯୁବକ ଚିତ୍ର ମାଧ୍ୟମରେ କରୋନା ସଚେତନତା ବାର୍ତ୍ତା ବାଣ୍ଟୁଛନ୍ତି। ରମ୍ପାସ ପଞ୍ଚାୟତର ସୁଶାନ୍ତ ଜେନା ଓ ଦିଗନ୍ତ ଜେନା ନିଜ ଚିତ୍ର ତୂଳିରେ ଲୋକଙ୍କୁ ସଚେତନ କରିଚାଲିଛନ୍ତି। ଏମାନେ ଆକର୍ଷଣୀୟ ଚିତ୍ର କରି ଏଥିରୁ ଯାହା ରୋଜଗାର ହୁଏ ସେଥିରେ ପେଟ ପୋଷିଥାନ୍ତି। ଚିତ୍ର କରି କରୋନା ମୁକାବିଲା ପାଇଁ ଆହ୍ବାନ ଦେଇଛନ୍ତି। ଗରିବ ହେଲେ ବି ଅର୍ଥ ଅଭାବ ଏମାନଙ୍କ ମନୋବଳକୁ ହରାଇ ପାରିନି। କିନ୍ତୁ ଏହି ଦୁଇ ଯୁବକଙ୍କ ପ୍ରତି ବ୍ଲକ, ଉପଖଣ୍ଡ କିମ୍ବା ଜିଲା ପ୍ରଶାସନର ଦୃଷ୍ଟି ଏପର୍ଯ୍ୟନ୍ତ ପଡ଼ିନାହିଁ। ଏମାନଙ୍କୁ ସରକାରୀ ସ୍ତରରେ ସହାୟତା ଯୋଗାଇଦେବାକୁ ସ୍ଥାନୀୟ ଲୋକେ ନିବେଦନ କରିଛନ୍ତି।
