ନୂଆଦିଲ୍ଲୀ,୨୧।୧୧: ଚିଟ୍ଫଣ୍ଡ ସଂଶୋଧନ ବିଲ୍ ବୁଧବାର ଲୋକ ସଭାରେ ଗୃହୀତ ହୋଇଯାଇଛି। ବିଲ୍ର ବ୍ୟବସ୍ଥା ଅନୁଯାୟୀ ଚିଟ୍ଫଣ୍ଡ ଜମାରାଶି ସୀମା ୩ ଗୁଣ ବଢ଼ାଯାଇଛି। ଏହି ଫଣ୍ଡ ପରିଚାଳନା ବାବଦରେ ଜମାକାରୀଙ୍କୁ ୭ ପ୍ରତିଶତ କମିଶନ ଦେବାକୁ ପଡିବ। ବର୍ତ୍ତମାନ ତାହା ୫ ପ୍ରତିଶତ ରହିଛି। ଚିଟ୍ଫଣ୍ଡକୁ ଅଧିକ ମର୍ଯ୍ୟାଦାଜନକ କରିବା ପାଇଁ ଏହାକୁ ଭ୍ରାତୃତ୍ୱ ପାଣ୍ଠି, ରୋଟେଟିଂ ସେଭିଙ୍ଗ୍ସ ଆଣ୍ଡ କ୍ରେଡିଟ୍ ଆସୋସିଏଶନ ଭାବେ ନାମିତ କରାଯାଇଥିବା ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର କହିଛନ୍ତି। ଚିଟ୍ଫଣ୍ଡ ଆଇନସମ୍ମତ ଓ ଏହାକୁ ନେଇ କେହି ଦ୍ୱନ୍ଦ୍ୱରେ ପଡିବା ଉଚିତ ନୁହେଁ॥ ଅନିୟମିତ ଜମା ଯୋଜନା ବା ପୋଞ୍ଜି ସ୍କିିମ୍ରେ ଅନେକେ ସେମାନଙ୍କ ଜମାରାଶି ହରାଇଛନ୍ତି।
ବିଲ୍ରେ ବ୍ୟକ୍ତିବିଶେଷ କିମ୍ବା ୪ ଜଣରୁ କମ୍ ଅଂଶୀଦାରଙ୍କ ଦ୍ୱାରା ପରିଚାଳିତ ଚିଟଫଣ୍ଡରେ ସର୍ବାଧିକ ଚିଟ୍ ପରିମାଣ ୧ ଲକ୍ଷ ଟଙ୍କାରୁ ୩ ଲକ୍ଷକୁ ବୃଦ୍ଧିକରିବା ପ୍ରସ୍ତାବ ରହିଥିଲାବେଳେ ୪ କିମ୍ବା ତଦୂର୍ଦ୍ଧ୍ୱ ଅଂଶୀଦାର ଗଠନ କରିଥିବା ସଂସ୍ଥା ଦ୍ୱାରା ପରିଚାଳିତ ଚିଟ୍ଫଣ୍ଡରେ ସର୍ବାଧିକ ଚିଟ୍ ପରିମାଣ ୬ ଲକ୍ଷରୁ ୧୮ ଲକ୍ଷ ଟଙ୍କାକୁ ବଢ଼ାଯାଇଛି।
ଚିଟ୍ଫଣ୍ଡ ବିଲ୍ ଉପରେ ଆଲୋଚନାରେ ଭାଗନେଇ ବିଭିନ୍ନ ଦଳର ସଦସ୍ୟମାନେ ଜମାକାରୀଙ୍କ ଟଙ୍କା ହଡପ କରିଥିବା ଚିଟ୍ଫଣ୍ଡ ପରିଚାଳକମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଥିଲେ। ଅନ୍ୟପକ୍ଷରେ ସରକାର ନେଇଥିବା ପଦକ୍ଷେପକୁ ଭାଜପା ସଦସ୍ୟମାନେ ପ୍ରଶଂସା କରିବା ସହ ଏହାଦ୍ୱାରା ଆର୍ଥିକ ଦୁର୍ବଳ ବର୍ଗର ଲୋକଙ୍କ ଜମାଅର୍ଥ ସୁରକ୍ଷିତ ରହିପାରିବ ବୋଲି କହିଥିଲେ। ବିଲ୍ ଆଣିବାରେ ବିଳମ୍ବକୁ ନେଇ ଟିଏମ୍ସି ସଦସ୍ୟ ସୌଗତ ରାୟ ପ୍ରଶ୍ନ ଉଠାଇଥିଲେ। ଗତବର୍ଷ ଅଗଷ୍ଟରେ ଅର୍ଥ ସଂକ୍ରାନ୍ତ ଷ୍ଟାଣ୍ଡିଂ କମିଟି ସୁପାରିସ୍ କରିବା ସତ୍ତ୍ୱେ ସଂଶୋଧିତ ବିଲ୍ ଆଣିବାକୁ ବର୍ଷେରୁ ଊର୍ଦ୍ଧ୍ୱ ସମୟ ଲାଗିଗଲା ବୋଲି ସେ କହିଥିଲେ। ଜନସାଧାରଣ ଏଭଳି ଆର୍ଥିକ ବ୍ୟବସ୍ଥାରେ ଠକାମିର ଶିକାର ହେଉଥିବାରୁ ଦେଶରେ ଅର୍ଥନୈତିକ ସାକ୍ଷରତାର ଆବଶ୍ୟକତା ରହିଥିବା ଭାଜପା ଏମ୍ପି ମୀନାକ୍ଷୀ ଲେଖି କହିଥିଲେ। ବ୍ୟାଙ୍କ ୮ରୁ ୯ ପ୍ରତିଶତ ସୁଧ ଦେଉଥିଲାବେଳେ ଜଣେ କିପରି ୩୦ରୁ ୪୦ ପ୍ରତିଶତ ସୁଧ ଦେଇପାରିବ, ସାଧାରଣ ଜମାକାରୀ ତାହା ଜାଣି ନ ପାରି ଠକାମିରେ ପଡିଥାନ୍ତି ବୋଲି ସେ କହିଥିଲେ।
ବିଭିନ୍ନ ପ୍ରଶ୍ନର ଉତ୍ତର ଦେଇ ଅର୍ଥ ରାଷ୍ଟ୍ରମନ୍ତ୍ରୀ କହିଥିଲେ, ଚିଟ୍ଫଣ୍ଡ ଜମାକାରୀ ବୀମା ପାଇଁ ଆବେଦନ କରିପାରିବେ। ତେବେ ଏହା ଜମାକାରୀଙ୍କ ଉପରେ ଅଧିକ ବୋଝ ପକାଇବାକୁ ଥିବାରୁ ସରକାର ଏହାକୁ ଅନିବାର୍ଯ୍ୟ କରିନାହାନ୍ତି। ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ କମିଟି ଚିଟ୍ଫଣ୍ଡ ଠକେଇ ମାମଲାଗୁଡ଼ିକର ତଦନ୍ତ କରୁଛନ୍ତି। ସେମାନଙ୍କ ତଦନ୍ତ କାର୍ଯ୍ୟ ଧାର୍ଯ୍ୟ ସମୟସୀମା ମଧ୍ୟରେ ଶେଷ ହେବା ସହ ଗରିବ ଜମାକାରୀ ଯଥାଶୀଘ୍ର ସମ୍ଭବ ସେମାନଙ୍କ ଟଙ୍କା ଫେରିପାଇବା ଦିଗରେ ପଦକ୍ଷେପ ନିଆଯିବା ଜରୁରୀ ବୋଲି ମନ୍ତ୍ରୀ କହିଥିଲେ।