ନୂଆଦିଲ୍ଲୀ, ୩୦ା୭(ପି.ଟି.): ଚିଟ୍ଫଣ୍ଡ୍ ସ୍କିମ୍ରେ ଅଙ୍କୁଶ ଲଗାଇବା ଲାଗି ସୋମବାର ପାର୍ଲାମେଣ୍ଟରେ ସର୍ବସମ୍ମତି କ୍ରମେ ବିଲ୍ ପାସ ହୋଇଛି। ଗତ ୨୪ରେ ଲୋକ ସଭାର ଅନୁମୋଦନ ପାଇବା ପରେ ସୋମବାର ରାଜ୍ୟ ସଭାରେ ଭଏସ୍ ଭୋଟ୍ରେ ଏହାକୁ ପାସ୍ କରାଯାଇଛି। ଫଳରେ ନିରୀହ ଗରିବ ଲୋକମାନେ ଫସୁଥିବା ଏହି ଯୋଜନାରୁ ସେମାନଙ୍କୁ ମୁକ୍ତି ମିଳିବ। ଜମା କରିଥିବା ଅର୍ଥ ସେମାନେ କିପରି ଫେରିପାଇବେ ସେନେଇ ବିଲ୍ରେ ବ୍ୟବସ୍ଥା କରାଯାଇଥିବା ଜଣାପଡ଼ିଛି।
ଗୃହରେ ଆଲୋଚନାବେଳେ ବିଲ୍ ଉପରେ ମତଦେଇ ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ସିଂ ଠାକୁର କହିଛନ୍ତି ଯେ, ଏହି ବିଲ୍ ଗରିବଙ୍କ ଝାଳବୁହା ଧନକୁ ସୁରକ୍ଷା ଦେବ। ବିଲ୍ରେ ରହିଥିବା ତ୍ରୁଟିକୁ ସୁଧାରିବା ଲାଗି ମନ୍ତ୍ରୀ ଗୋଷ୍ଠୀ ଗଠନ କରାଯାଇଥିବା ସେ ପ୍ରକାଶ କରିଛନ୍ତି। ବେଆଇନ ଜମା ପୁଞ୍ଜିକୁ ରୋକିବା ଲାଗି ନୂତନ କେନ୍ଦ୍ରୀୟ ଆଇନ ବେଶ୍ ସହାୟକ ହୋଇପାରିବ। ଜମାକାରୀ ଟଙ୍କା ଫେରି ପାଇବା ଲାଗି ପଦକ୍ଷେପ ଗ୍ରହଣ କରାଯିବ। ଏହି ବିଲ୍ କେନ୍ଦ୍ର ଓ ରାଜ୍ୟକୁ ଆଇନ ତିଆରି ଲାଗି ଶକ୍ତି ଯୋଗାଇବ। ଚିଟ୍ଫଣ୍ଡ ନେଇ ମୋଟ୍ ୯୭୮ ମାମଲା ଚିହ୍ନଟ କରାଯାଇଛି ଓ ସେଥିରୁ ପଶ୍ଚିମବଙ୍ଗରେ ୩୨୬ ମାମଲା ରହିଥିବା ଜଣାପଡ଼ିଛି। ଏଣିକି ବେଆଇନ ଭାବେ ଚାଲିଥିବା ଚିଟ୍ଫଣ୍ଡ୍ ସଂସ୍ଥା ବିରୋଧରେ କାର୍ଯ୍ୟାନୁଷ୍ଠାନ, ଦଣ୍ଡବିଧାନ କରାଯାଇ ପାରିବ। ଏଥିଲାଗି ୧୦ ବର୍ଷ ପର୍ଯ୍ୟନ୍ତ ଜେଲ୍ଦଣ୍ଡ ଓ ୨ ଲକ୍ଷ ଟଙ୍କାରୁ ୫୦ କୋଟି ଟଙ୍କା ପର୍ଯ୍ୟନ୍ତ ଅର୍ଥଦଣ୍ଡ ମିଳିବ। ଆଲୋଚନା ବେଳେ ଡିଏମ୍କେ ନେତା ପି. ଓ୍ବିଲ୍ସନ, ଓ୍ବାଇଏସ୍ଆର୍ସିପିର ଭି. ବିଜୟ ରେଡ୍ଡୀ, ଭାଜପାର ରାମକୁମାର ବର୍ମା, ଆଇଏନ୍ଏସ୍ର କେ.ସି. ରାମମୂର୍ତ୍ତି, ଟିଏମ୍ସିର ଅହମ୍ମଦ ହାସନ୍, ଆପ୍ର ଏନ୍.ଡି. ଗୁପ୍ତା ପ୍ରମୁଖ ବିଲ୍କୁ ସମର୍ଥନ କରିଥିଲେ।
