ବରଗଡ଼ ଅଫିସ୍,୧୩।୫: ବରଗଡ଼ ଜିଲା ପାଇକମାଲ ଥାନା ଯୋଗୀନ୍ଦ୍ରନାଥପୁର ଗ୍ରାମର ଭାନୁମତୀ ଓ ଉଦ୍ଧବ ଗୁଣ୍ଡିଙ୍କ ଏକବର୍ଷର ଶିଶୁକନ୍ୟା ନିକିତାଙ୍କ ଶରୀର ଦିନକୁ ଦିନ ବଙ୍କେଇ ଯାଉଛି । ପ୍ରବାସୀ ଶ୍ରମିକ ପରିବାର ହୋଇଥିବା ଯୋଗୁ ସେମାନେ ଶିଶୁକନ୍ୟାର ଚିକିତ୍ସା ପାଇଁ ଆବଶ୍ୟକ ଅର୍ଥ ଯୋଗାଡ଼ କରି ପାରୁ ନାହାନ୍ତି। ତେବେ ପୂର୍ବରୁ ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ସୁଦ୍ଧା ଚିକିତ୍ସା ସହାୟତା କେବଳ କାଗଜ, କଲମରେ ସୀମିତ ରହିଯାଇଛି। ଅନ୍ୟପକ୍ଷେ ଶିଶୁକନ୍ୟାର ସ୍ବାସ୍ଥ୍ୟାବସ୍ଥା ଦିନକୁ ଦିନ ବିଗିଡ଼ିବାରେ ଲାଗିଛି । ଏ ନେଇ ବୁଧବାର ଧରିତ୍ରୀରେ ‘ଚିକିତ୍ସା ପାଇଁ ଅର୍ଥ ବାଧକ’ ଶୀର୍ଷକରେ ଏକ ଖବର ପ୍ରକାଶ ପାଇଥିଲା । ଶିଶୁକନ୍ୟାକୁ ଚିକିତ୍ସା ସହାୟତାରେ ପ୍ରଶାସନିକ ଅଧିକାରୀଙ୍କ ନୀରବତାକୁ ନେଇ ବରଗଡ଼ ଜିଲା ପାଇକମାଲ ବ୍ଲକ ଟେମରୀ ଗ୍ରାମର ସାମାଜିକ କର୍ମୀ ଦୀପା ବାରିକ କ୍ଷୋଭ ପ୍ରକାଶ କରିଛନ୍ତି। ଅନ୍ୟ ଜିଲାରେ ଏଭଳି ଗରିବ, ଅସହାୟଙ୍କୁ ଚିକିତ୍ସା ସହାୟତାରେ ପ୍ରଶାସନ ତତ୍ପର ହୋଇ ଉଠୁଛି। ମାତ୍ର ବରଗଡ଼ରେ ସେଭଳି କ୍ଷେତ୍ରରେ କାହିଁକି ପ୍ରଶାସନିକ ତତ୍ପରତାର ଅଭାବ ରହିଛି। କାଗଜ, କଲମରେ ଚିକିତ୍ସା ସହାୟତା ସୀମିତ ରହୁଛି ବୋଲି ପ୍ରଶ୍ନ କରି ଦୀପା ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ, ବରଗଡ଼ ଏମ୍ପି ସୁରେଶ ପୂଜାରୀ, ରାଜ୍ୟ ସ୍ବାସ୍ଥ୍ୟ ପରିବାର କଲ୍ୟାଣ ବିଭାଗ, ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ ପ୍ରମୁଖଙ୍କୁ ଟୁଇଟ୍ କରିଛନ୍ତି। ଅବିଳମ୍ବେ ଶିଶୁକନ୍ୟାକୁ ଚିକିତ୍ସା ସହାୟତା ଯୋଗାଇ ଦେବାକୁ ସେ ନିବେଦନ କରିଛନ୍ତି।
