ଫିରିଙ୍ଗିଆ,୨୫ା୮-ଫିରିଙ୍ଗିଆ ବ୍ଲକ ଭୁଙ୍ଗିଯୋଡି ପଞ୍ଚାୟତ ଗାଜୁରିଘାଟି ଓ ମହଲିଙ୍ଗିଆ ଗ୍ରାମକୁ ରାସ୍ତା ନାହିଁ। ପଞ୍ଚାୟତ ସଦର ମହକୁମା ଠାରୁ ଏହି ୨ଗ୍ରାମ ପ୍ରାୟ ୬ କିମି ଦୂର। ଫଳରେ ପାହାଡ ଉପର ଦେଇ ପାଦ ଚଲାବାଟରେ ଲୋକେ ଯିବା ଆସିବା କରନ୍ତି। ଉକ୍ତ ଦୁଇ ଗ୍ରାମରେ ପ୍ରାୟ ୨୫ ପରିବାରର ୧୦୦ରୁ ଉର୍ଦ୍ଧ୍ୱ ଲୋକ ବାସ କରୁଛନ୍ତି। ବିଭିନ୍ନ କାମରେ ଗ୍ରାମବାସୀ ପଞ୍ଚାୟତ କାର୍ଯ୍ୟାଳୟକୁ ଆସିବାକୁ ହେଲେ ୬ କିମି ପାହାଡି ରାସ୍ତାରେ ଚାଲିକି ଯିବାକୁ ପଡେ। ଏପରିକି ଚାଉଳ ଓ ଭତ୍ତା ଆଣିବାକୁ ବୃଦ୍ଧ, ବୃଦ୍ଧାଙ୍କୁ ଚାଲି ଯିବାକୁ ପଡୁଛି। ଆମ୍ବୁଲାନ୍ସ ଆସିପାରୁନଥିବାରୁ ରୋଗୀ ଓ ପ୍ରସୂତିଙ୍କୁ ଖଟିଆରେ ଫିରିଙ୍ଗିଆ ଡାକ୍ତରଖାନାକୁ ନିଅନ୍ତି। ଏହି ଗ୍ରାମର ଅନ୍ୟ ଏକ ସମସ୍ୟା ହେଉଛି ପାନୀୟ ଜଳ। ଗ୍ରାମରେ ଗୋଟିଏ ନଳକୂପ ରହିଛି। ସେଥିରୁ ପୁଣି ମଇଳା ପାଣି ବାହାରୁଛି। ଫଳରେ ଗ୍ରାମ ନିକଟରେ ଯାଇଥିବା ଏକ ନାଳରୁ ଚୁଆ କରି ପାଣି ଆଣି ବ୍ୟବହାର କରୁଛନ୍ତି। ସମସ୍ୟା ନେଇ ଗ୍ରାମବାସୀ ବହୁବାର ସରପଞ୍ଚ ଓ ବିଡିଓଙ୍କୁ ଅଭିଯୋଗ କରିଛନ୍ତି। ଏପରିକି ବିଭିନ୍ନ ନିର୍ବାଚନବେଳେ ନେତାମାନେ ଗ୍ରାମକୁ ଭୋଟ ମାଗିବାକୁ ଆସିବାବେଳେ ସମାଧାନ ପ୍ରତିଶୃତି ମଧ୍ୟ ଦେଇଛନ୍ତି। ମାତ୍ର ପରେ ଆଉ କାହାର ଦେଖା ମିଳେ ନାହିଁ ବୋଲି ଗ୍ରାମର ନିବେ କହଁର, ଆଦେଶ କହଁର, ବୁଲୁ କହଁର, ନୀଳାମ୍ବର କହଁର ପ୍ରମୁଖ ଅଭିଯୋଗ କରିଛନ୍ତି। ଏନେଇ ବିଡିଓ ପ୍ରବୀଣ କୁମାର ବାଣୁଆଙ୍କ ସହ ଯୋଗାଯୋଗ କରିବାରେ ସେ ଏହାର ଅନୁଧ୍ୟାନ କରି ରାସ୍ତା ନିର୍ମାଣ ପାଇଁ ପଦକ୍ଷେପ ନେବେ ବୋଲି କହିଛନ୍ତି।
