ନୂଆଦିଲ୍ଲୀ,୨୩ା୬(ଆଇଏଏନ୍ଏସ୍): ସାରା ବିଶ୍ୱରେ କରୋନା ମହାମାରୀ ସଂକ୍ରମଣ କରାଇଥିବା ଚାଇନା ଦୋଷ ଲୁଚାଇବାକୁ ଜୋର୍ଦାର ପ୍ରଚାର ଚଳାଇଛି। ଏହି ଘଟଣାରୁ ଧ୍ୟାନ ହଟାଇବା ପାଇଁ ବେଜିଂ ଉଭୟ ସ୍ଥଳଭାଗ ଓ ଜଳରାଶିରେ ନିଜର ସୀମା ବଢ଼ାଇବା ପାଇଁ ଉଦ୍ୟମ ଜାରି ରଖିଛି। ଚାଇନାକୁ ପ୍ରତିହତ କରିବା ଲାଗି ସାମୁଦ୍ରିକ ସହଯୋଗ ବୃଦ୍ଧି ନିମନ୍ତେ ବିଶ୍ୱ ଶକ୍ତିଗୁଡ଼ିକ ପରସ୍ପର ସହ ହାତ ମିଳାଇଛନ୍ତି। ଦକ୍ଷିଣ ଚାଇନା ସାଗର ଏବଂ ଭାରତ ମହାସାଗରରେ ଚାଇନା ତା’ର ପ୍ରଭାବ ବିସ୍ତାର କରି ପଡୋଶୀଙ୍କ ପାଇଁ ଆହ୍ବାନ ସୃଷ୍ଟି କରିଛି।
ଗଲଓ୍ବାନ ଉପତ୍ୟକା ସଂଘର୍ଷ ଘଟଣା ଚାଇନାର ପଡୋଶୀଙ୍କୁ ଭୟ ଦେଖାଇବା ଓ ଆକ୍ରମଣ ପ୍ରୟାସ ନୀତିର ଏକ ଉଦାହରଣ ମାତ୍ର। ବାସ୍ତବରେ ଆକ୍ରମଣାତ୍ମକ ଜାତୀୟତାବାଦ ଏବଂ ସାମରିକ ଆଧିପତ୍ୟ ବିସ୍ତାର ଚାଇନା କମ୍ୟୁନିଷ୍ଟ ପାର୍ଟି (ସିପିସି)ର ନୀତିରେ ପରିଣତ ହୋଇଛି। ଫଳରେ ବେଜିଂ କୌଣସି ଦେଶର ଆଇନ କିମ୍ବା ସମ୍ପତ୍ତି ଅଧିକାରକୁ ସମ୍ମାନ ଦେଉନାହିଁ। ସେହିପରି ଏହା କୌଣସି ସୀମାରେଖାକୁ ସମ୍ମାନ ନ ଜଣାଇ ଡରାଇ ଧମକାଇ ଅନ୍ୟର ଅଞ୍ଚଳ ଓ ସମ୍ପତ୍ତିକୁ ଅକ୍ତିଆର କରିବାକୁ ଚାହୁଁଥିବା ଜଣେ ଉଚ୍ଚ ପଦାଧିକାରୀ କହିଛନ୍ତି। ଦକ୍ଷିଣ ଚାଇନା ସାଗରକୁ ବେଜିଂ ଏହାର ନିଜର ବୋଲି ଦାବି କରିଆସୁଛି ଓ ଅନ୍ତର୍ଜାତୀୟ ଟ୍ରିବ୍ୟୁନାଲର ରାୟକୁ ଅଣଦେଖା କରୁଛି। ଉକ୍ତ ସାଗର ଉପରେ ଚାଇନାର ଅଧିକାରକୁ ଅନ୍ତର୍ଜାତୀୟ ଟ୍ରିବ୍ୟୁନାଲ ପ୍ରତ୍ୟାଖ୍ୟାନ କରିଥିଲା। ଚାଇନା କମ୍ୟୁନିଷ୍ଟ ପାର୍ଟିର ଏଭଳି କାର୍ଯ୍ୟକୁ ବିରୋଧ କରି ଭାରତ-ପ୍ରଶାନ୍ତ ମହାସାଗର ଅଞ୍ଚଳରେ ମୁକ୍ତ ଜାହାଜ ଚଳାଚଳ ଏବଂ ଅନ୍ତର୍ଜାତୀୟ ନିୟମ ପାଳନ ଲାଗି ଆମେରିକା, ଫ୍ରାନ୍ସ, ବ୍ରିଟେନ, ଅଷ୍ଟ୍ରେଲିଆ, ଦକ୍ଷିଣ କୋରିଆ ଓ ଜାପାନ ଭଳି ବୃହତ ସାମୁଦ୍ରିକ ଶକ୍ତିଗୁଡ଼ିକ ସହଯୋଗ ବୃଦ୍ଧି ଲାଗି ପରସ୍ପର ହାତ ମିଳାଇଛନ୍ତି। ଆଞ୍ଚଳିକ ସ୍ତରରେ ବହୁପାକ୍ଷିକ ସହଯୋଗ ଲାଗି ଆହୁରି ଅଧିକ ଦେଶ ଏଥିରେ ସାମିଲ ହେବେ ବୋଲି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ସୀମା ବିବାଦକୁ ନେଇ ଏବେ ଭାରତ ଓ ଚାଇନା ମଧ୍ୟରେ ସମ୍ପର୍କ ତିକ୍ତ ହୋଇଥିବାବେଳେ ବେଜିଂକୁ ମୁକାବିଲା କରିବା ଓ ଉକ୍ତ ଅଞ୍ଚଳରେ ସନ୍ତୁଳନ ରକ୍ଷା ଲାଗି ନୂଆଦିଲ୍ଲୀ ବୃହତ୍ ଆଞ୍ଚଳିକ ଓ ବିଶ୍ୱ ଶକ୍ତି ସହ ସାମିଲ ହେବାକୁ ଯାଉଛି।
