ଟୋକିଓ,୩୦।୩ (ଏଏଫପି)- କୋଭିଡ-୧୯ ଆତଙ୍କ କାରଣରୁ ୨୦୨୦ ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇବାକୁ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଐତିହାସିକ ନିଷ୍ପତ୍ତି ନେଇଛି। ତେବେ ଚଳିତ ସପ୍ତାହରେ ଅଲିମ୍ପିକ୍ସର ନୂଆ ତାରିଖର ଘୋଷଣା ହୋଇପାରେ ବୋଲି ଆୟୋଜକମାନେ ସୂଚନା ଦେଇଛନ୍ତି। ଆଗାମୀ ଗ୍ରୀଷ୍ମ ଓ ବସନ୍ତ ଋତୁରେ ବିଭିନ୍ନ ଦୃଷ୍ଟିକୋରରୁ ଭଲ ଓ ମନ୍ଦ ବିଚାର ଆଇଓସି ନିଷ୍ପତ୍ତି ନେବ। ଚଳିତ ସପ୍ତାହରେ ତାରିଖ ନେଇ ଘୋଷଣା ହୋଇପାରେ ଓ ଏ ସଂକ୍ରାନ୍ତରେ ଆଇଓସି ଅଧ୍ୟକ୍ଷ ଥୋମାସ ବାକ୍ ତରଫରୁ ଚଳିତ ସପ୍ତାହରେ କିଛି ସୂଚନା ଆସିପାରେ ବୋଲି ଟୋକିଓ ୨୦୨୦ ମୁଖ୍ୟ ୟୋଶିରୋ ମୋରି କହିଛନ୍ତି।
ଉଲ୍ଲେଖଥାଉ କି, ଟୋକିଓ ଅଲିମ୍ପିକ୍ସ ଜୁଲାଇ ୨୪ରୁ ଆରମ୍ଭ ହୋଇ ୧୬ ଦିନରେ ପରେ ଶେଷ ହେବାର କାର୍ଯ୍ୟକ୍ରମ ରହିଥିଲା। କିନ୍ତୁ ସାରା ବିଶ୍ୱରେ କରୋନା ଭାଇରସ ସଂକ୍ରମଣ ମହାମାରୀ ରୂପ ନେଇଥିବାରୁ ଏହି କ୍ରୀଡ଼ା ମହାକୁମ୍ଭକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିଲା। ଏହି ପରିସ୍ଥିତିର ଫାଇଦା ଉଠାଇ ଜାପାନର ଆୟୋଜକ ମାନେ ଗ୍ରୀଷ୍ମ ଉତ୍ତାପରରୁ ରକ୍ଷା ପାଇବା ପାଇଁ ଅଲିମ୍ପିକ୍ସକୁ ସ୍ପ୍ରିଙ୍ଗ୍ ତଥା ବସନ୍ତରେ ଆୟୋଜନ କରିବାକୁ ଯୋଜନା କରୁଥାଇପାରନ୍ତି ବୋଲି ଅନୁମାନ କରାଯାଉଛି। ପୂର୍ବରୁ ଉତ୍ତାପ କାରଣରୁ ମାରାଥାନକୁ ଟୋକିଓର ଉତ୍ତରରେ ୮୦୦ କି.ମି. ଦୂର ଥିବା ସାପ୍ପୋରୋରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା। ଗ୍ରୀଷ୍ମରେ ଟୋକିଓ ଅପେକ୍ଷା ସାପ୍ପୋରୋରେ ଉତ୍ତାପ ଅପେକ୍ଷକୃତ କମ୍ ଥାଏ। ୨୦୨୧ ଜୁଲାଇ ୨୩ରେ ଅଲିମ୍ପିକ୍ସ ଆରମ୍ଭ ହେବାର ଯଥେଷ୍ଟ ସମ୍ଭାବନା ରହିଛି ବୋଲି ପବ୍ଲିକ ବ୍ରଡ କାଷ୍ଟର ଏନ୍ଏଚ୍କେ କହିଛି। ଅଲିମ୍ପିକ ଘୁଞ୍ଚିବା ଓ ନୂଆ ଆୟୋଜନ ଏକ କଷ୍ଟକର ବ୍ୟାପାର ଓ ଏଥିରେ ଅତିରିକ୍ତ ଖର୍ଚ୍ଚ ହେବ ବୋଲି ଟୋକିଓ ୨୦୨୦ ମୁଖ୍ୟ କାର୍ଯ୍ୟ ନିର୍ବାହୀ ତୋଶିରୋ ମୁଟୋ କହିଛନ୍ତି।
