ଭୋପାଳ,୨୦।୭: ମଧ୍ୟପ୍ରଦେଶ ଗ୍ବାଲିୟର-ଚମ୍ବଲ ଅଞ୍ଚଳରେ ଚାଲିଥିବା ୩ଟି ସିନ୍ଥେଟିକ୍ କ୍ଷୀର କାରଖାନା ଉପରେ ପୋଲିସ ଚଢ଼ାଉ କରିଛି। ଏନେଇ ୫୭ ଜଣଙ୍କୁ ଗିରଫ କରାଯାଇଛି। ଚଢ଼ାଉ ସମୟରେ ସିନ୍ଥେଟିକ୍ କ୍ଷୀର ପ୍ରସ୍ତୁତିରେ ବ୍ୟବହୃତ ହେଉଥିବା ବିଭିନ୍ନ ପଦାର୍ଥ ଜବତ ହୋଇଛି। ଏହି କ୍ଷୀରକୁ ମହାରାଷ୍ଟ୍ର, ମଧ୍ୟପ୍ରଦେଶ, ଉତ୍ତରପ୍ରଦେଶ, ରାଜସ୍ଥାନ, ଦିଲ୍ଲୀ, ହରିୟାଣା ଆଦି ୬ଟି ରାଜ୍ୟରେ ଥିବା ବ୍ରାଣ୍ଡେଡ୍ କ୍ଷୀର ଉତ୍ପାଦନକାରୀ ୟୁନିଟ୍କୁ ପଠାଯାଉଥିବା ପୋଲିସ କହିଛି। ମୋରେନା ଜିଲାର ଅମ୍ବା ଏବଂ ଭିଣ୍ଡ୍ ଜିଲାର ଲହରଠାରେ ଥିବା ଏହି ସିନ୍ଥେଟିକ୍ କ୍ଷୀର କାରଖାନାକୁ ସିଲ୍ କରାଯାଇଛି। ସ୍ପେଶାଲ୍ ଟାସ୍କ୍ ଫୋର୍ସ(ଏସଟିଏଫ୍) ଚଢ଼ାଉ ସମୟରେ ୧୦ ହଜାର ଲିଟର କ୍ଷୀର, ୫ଶହ କିଲୋଗ୍ରାମ୍ ଖୁଆ, ୨ଶହ କିଲୋଗ୍ରାମ୍ ପନିର ଜବତ ହୋଇଥିବା ଏସ୍ପି ରାଜେଶ ଭଦୋରିଆ ସୂଚନା ଦେଇଛନ୍ତି। କ୍ଷୀର ନେଇ ଯାଉଥିବା ୨୦ ଟ୍ୟାଙ୍କର ଏବଂ ୧୧ ପିକ୍ ଅପ୍ ଭ୍ୟାନ୍କୁ ମଧ୍ୟ ଜବତ କରାଯାଇଛି।
