ବୀରମହାରାଜପୁର, ୨୯।୭ (ଡି.ଏନ.ଏ.): ରବିବାର ରାତିରେ ଲଘୁଚାପଜନିତ ପ୍ରବଳ ବର୍ଷା ଯୋଗୁ ସୁବର୍ଣ୍ଣପୁର ଜିଲା ବୀରମହାରାଜପୁର ଉପାନ୍ତ ଅଞ୍ଚଳର ବିଭିନ୍ନ ଯୋର ଓ ନାଳରେ ବଢ଼ିପାଣି ଆସିଛି। ଏଥିଯୋଗୁ ଅନେକ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇଛି। ବ୍ଲକର ଭୁତିଆପାଲି ଓ ଲୁତୁରପଙ୍କ ମଝିରେ ଥିବା ଘୁଙ୍ଗିନାଳ ଉପରେ ପ୍ରାୟ ୪ ଫୁଟର ପାଣି ପ୍ରବାହିତ ହେଉଛି। ଫଳରେ ବୀରମହାରାଜପୁର-ଅମରପାଲି ରାସ୍ତା ସମ୍ପୂର୍ଣ୍ଣ ବନ୍ଦ ରହିଛି। ଏଥିପାଇଁ ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ସୋମବାର ଛାତ୍ରୀଛାତ୍ରମାନେ ଭୁତିଆପାଲି ଓ ବୀରମହାରାଜପୁର କଲେଜକୁ ଯାଇ ନ ପାରି ଫେରିଯାଇଥିତ୍ଲେ। ଉକ୍ତ ରାସ୍ତାଦେଇ ମୁର୍ଷୁଣ୍ଢୀରୁ ସମ୍ବଲପୁରକୁ ଯାଉଥିବା ବସ୍ ଓ ସମ୍ବଲପୁରରୁ ମୁର୍ଷୁଣ୍ଢୀକୁ ଆସୁଥିବା ବସ୍ ସମେତ ଅନେକ ଗାଡ଼ିମୋଟର ପାରି ହୋଇ ନ ପାରି ଉଭୟ ପାର୍ଶ୍ୱରେ ଅପେକ୍ଷା କରିଥିବା ଦେଖିବାକୁ ମିଳିଛି। ଏହି ପୋଲ ଉପରେ ପ୍ରତିବର୍ଷ ଟିକିଏ ବର୍ଷା ହେଲେ ପାଣି ଆସି ଯୋଗାଯୋଗ ବିଚ୍ଛିନ୍ନ ହୋଇଥାଏ। ତେଣୁ ଏହାକୁ ଅଧିକ ଉଚ୍ଚତା କରିବାକୁ ଦାବି ହେଉଛି। ଏହା ସହ ଖଣ୍ଡହତା-ବୀରମହାରାଜପୁର ରାସ୍ତାର ଚୌକାଠାରେ ମଧ୍ୟ ଏହି ଘୁଙ୍ଗିନାଳ ଉପର ଦେଇ ପାଣି ଯାଉଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି। ଉଭୟ ପୋଲରେ ପାଣି ଯାଉଥିବାରୁ ଦୁର୍ଜନତୈଲା, ବହଳପଦର, ଲୁତୁରପଙ୍କ, ଖଣ୍ଡହତା, ମୁର୍ଷୁଣ୍ଢୀ ସମେତ ରେଢ଼ାଖୋଲ ବ୍ଲକର ବୀରମହାରାଜପୁର ଉପରେ ନିର୍ଭର କରୁଥିବା ପ୍ରାୟ ୫-୬ଟି ପଞ୍ଚାୟତର ଲୋକେ ଅସୁବିଧାର ସମ୍ମୁଖୀନ ହୋଇଛନ୍ତି।
