ଦିନେ ଷ୍ଟେଶନରେ ଲତା ମଙ୍ଗେସ୍କରଙ୍କ ଗୀତ ଗାଇ ରାତାରାତି ଷ୍ଟାର ପାଲଟି ଯାଇଥିବା ରାନୁ ମଣ୍ଡଳ ଏବେ ଟ୍ରୋଲ ହେବାରେ ଲାଗିଛନ୍ତି। କାରଣ ତାଙ୍କର କଥାବାର୍ତ୍ତା ଓ ବ୍ୟବହାରରେ ଏପରି ପରିବର୍ତ୍ତନ ହୋଇଛି, ଯାହା କଳ୍ପନା ବାହାରେ। ଯେଉଁମାନେ ତାଙ୍କର ପ୍ରଶଂସକ ପାଲଟିଥିଲେ ସେହିମାନେ ଏବେ ତାଙ୍କୁ ସୋସିଆଲ ମିଡିଆରେ ଟ୍ରୋଲ୍ କରୁଛନ୍ତି। ଆସନ୍ତୁ ଜାଣିବା କେଉଁ କଥାରେ ରାନୁ ଟ୍ରୋଲ୍ ହୋଇଛନ୍ତି।
ହିମେଶ ରେଶମିୟା ରାନୁଙ୍କୁ ନିଜର ଫିଲ୍ମ ‘ହାପି ହାର୍ଡି ଔର ହୀର୍’ରେ ଗୀତ ଗାଇବାର ସୁଯୋଗ ଦେଇଥିଲେ। ଏହା ପରେ ଏକ ଖବରଦାତା ସମ୍ମିଳନୀରେ ତାଙ୍କ ଝିଅ ସମ୍ପର୍କରେ ରାନୁଙ୍କୁ ପଚରାଯିବାରୁ ମୋ’ ଝିଅର କିଛି ଅସୁବିଧା ଥିଲା, ଏଣୁ ସେ ମୋତେ ଦେଖିବାକୁ ଆସିପାରୁ ନ ଥିଲା ବୋଲି କହିଥିଲେ। ମୁଁ ତାଙ୍କୁ ଦୋଷ ଦେବିନି। its enough ଧାଡ଼ିଏ ଇଂରାଜୀ କହିଥିଲେ। ଏହା ପରେ ୟୁଜରମାନେ ତାଙ୍କୁ ଟ୍ରୋଲ କରିବାରେ ଲାଗିପଡ଼ିଲେ।
ହିନ୍ଦୀ ଫିଲ୍ମର ସୁରସମ୍ରାଜ୍ଞୀ କୁହାଯାଉଥିବା ଲତା ମଙ୍ଗେସ୍କରଙ୍କ ଗୀତକୁ ରାନୁ କପି କରି ଗାଉଥିବାରୁ କିଛି ଲୋକ ଏପରି ଅଭ୍ୟାସ ଛାଡ଼ିବାକୁ ତାଙ୍କୁ ପରାମର୍ଶ ଦେଇଥିଲେ। କିଛି ୟୁଜର ନିଜ କଣ୍ଠରେ ଗୀତ ଗାଇବାକୁ କହିଥିଲେ। ଏପରିକି ସୋସିଆଲ ମିଡିଆରେ ତାଙ୍କୁ କେହିକେହି କପି କ୍ୟାଟ୍ ମଧ୍ୟ କହିବାରେ ଲାଗିଲେ।
ଏହି କିଛିଦିନ ତଳେ ରାନୁଙ୍କୁ ଏକ ଶପିଂ ମଲ୍ରେ ଜଣେ ମହିଳା ଛୁଇଁ ଦେବାରୁ ରାନୁ ଚିହିଁକି ଉଠିଥିଲେ। ତୁମେ ମୋତେ ଛୁଇଁବାକୁ ସାହସ କିପରି କଲ ବୋଲି ପ୍ରଶ୍ନ ମଧ୍ୟ କରିଥିଲେ। ମୁଁ ଏବେ ସେଲିବ୍ରିଟି । ଏହିପରି ଘଟଣାକୁ ନେଇ ୟୁଜର୍ସମାନେ ରାନୁଙ୍କୁ ଟ୍ରୋଲ କରିବାରେ ପଛାଇ ନ ଥିଲେ।
ବର୍ତ୍ତମାନ ଆଉ ଏକ ଭିଡିଓ ସାମ୍ନାକୁ ଆସିଛି, ଯେଉଁଥିରେ ତାଙ୍କର ସ୍ବପ୍ନ କିପରି ସାକାର ହେଲା ସେ ସମ୍ପର୍କରେ ପଚରାଯାଉଛି। କିନ୍ତୁ ରାନୁ ପ୍ରଶ୍ନକର୍ତ୍ତାଙ୍କ କୌଣସି କଥାକୁ ଶୁଣି ନ ଶୁଣିଲା ପରି ପପକର୍ଣ୍ଣ ଖାଇ କହୁଛନ୍ତି ମୋତେ କିଛି ଶୁଭୁନି। ରାନୁଙ୍କ ଏପରି ବ୍ୟବହାରକୁ ନେଇ ମଧ୍ୟ ଖୁବ୍ ଚର୍ଚ୍ଚା ଚାଲିଛି।
