ନୂଆଦିଲ୍ଲୀ,୩୧-୧(ପି.ଟି.):ଦିଲ୍ଲୀର ଜାମିଆ ନଗରରେ ଗୁରୁବାର ଘଟିଥିବା ଗୁଳିକାଣ୍ଡକୁ ନେଇ ରାଜନୀତି ସରଗରମ ହେବାରେ ଲାଗିଛି। ଦିଲ୍ଲୀ ବିଧାନସଭା ନିର୍ବାଚନକୁ ଘୁଞ୍ଚାଇବା ପାଇଁ ଏହା ଭାଜପାର ଏକ ଷଡ଼ଯନ୍ତ୍ର ବୋଲି ଶାସକ ଆମ୍ ଆଦ୍ମୀ ପାର୍ଟି (ଏଏପି) ସମାଲୋଚନା କରିଛି। କଂଗ୍ରେସ ଏହାକୁ ଏନ୍ଡିଏ ସରକାର ପ୍ରାୟୋଜିତ ଆତଙ୍କବାଦ ବୋଲି ଅଭିହିତ କରିଥିବାବେଳେ ଭାଜପା ନେତାଙ୍କ ଘୃଣା ମନ୍ତବ୍ୟ ଯୋଗୁ ଏପରି ଘଟିଥିବା ସିପିଆଇ ଅଭିଯୋଗ ଆଣିଛି। ଅନ୍ୟପକ୍ଷରେ ଏହି ଘଟଣାକୁ ଜାମିଆ ଶିକ୍ଷକ ସଂଘ ପକ୍ଷରୁ ଦୃଢ଼ନିନ୍ଦା କରାଯାଇଛି। ଏହାସହ ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସଂଘର ଜେନେରାଲ ବଡି ମିଟିଙ୍ଗ୍ରେ ଦାବି କରାଯାଇଛି।
ନେତା ସଞ୍ଜୟ ସିଂ କହିଛନ୍ତି, ଫେବୃୟାରୀ ୮ରେ ହେବାକୁ ଥିବା ଦିଲ୍ଲୀ ବିଧାନସଭା ନିର୍ବାଚନରେ ଭାଜପାର ପରାଜୟ ସୁନିଶ୍ଚିତ। ଏହା ଜାଣିବା ପରେ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଓ ଭାଜପା ନେତାମାନେ ମହାମତ୍ା ଗାନ୍ଧୀଙ୍କ ଶ୍ରାଦ୍ଧଦିବସ ଭଳି ଦିନରେ ଦଙ୍ଗା ଭଳି ସ୍ଥିତି ସୃଷ୍ଟି କରିଛନ୍ତି। ଶାହା ଦିଲ୍ଲୀ ପୋଲିସର ହାତ ବାନ୍ଧି ଦେଇଥିବାରୁ ଆକ୍ରମଣକାରୀ ଗୁଳି ଚଳାଇବାବେଳେ ପୋଲିସ ନୀରବଦ୍ରଷ୍ଟା ସାଜିଥିଲା ବୋଲି ସଞ୍ଜୟ ଟୁଇଟ୍ କରିଛନ୍ତି। ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ କହିଛନ୍ତି, ଦିଲ୍ଲୀର ଆଇନଶୃଙ୍ଖଳା ପରିସ୍ଥିତି ଖରାପ ହେବାରେ ଲାଗିଛି। ସ୍ବରାଷ୍ଟ୍ରମନ୍ତ୍ରୀ ଏଥିପ୍ରତି ଧ୍ୟାନ ଦିଅନ୍ତୁ ବୋଲି ସେ ଟୁଇଟ୍ କରିଛନ୍ତି। ଦଳ ପକ୍ଷରୁ ଶାହାଙ୍କୁ ସବୁଠୁ ଅଯୋଗ୍ୟ ସ୍ବରାଷ୍ଟ୍ରମନ୍ତ୍ରୀ ଭାବେ ଅଭିହିତ କରାଯାଇ ତାଙ୍କ ଇସ୍ତଫା ଦାବି କରାଯାଇଛି। କଂଗ୍ରେସ ନେତା ମନୀଷ ତିଓ୍ବାରୀଙ୍କ ମତରେ ଭାଜପା ଦିଲ୍ଲୀ ବିଧାନସଭା ନିର୍ବାଚନକୁ ଧ୍ରୁବୀକରଣ କରୁଛି। ଯେଉଁ ଘୃଣା ଦିନେ ମହାମତ୍ା ଗାନ୍ଧୀଙ୍କୁ ହତ୍ୟା କରିଥିଲା, ତାହା ଆଜି ଭାରତର ଅର୍ଥନୀତିକୁ ପଙ୍ଗୁ କରିଦେଇଛି। ଜାମିଆ ମିଲିଆ ଇସ୍ଲାମିଆ ୟୁନିଭର୍ସିଟିରେ ଯେପରି ଭାବେ ଜଣେ ଅଜ୍ଞାତ ଯୁବକ ଗୁଳି ଚଳାଇଲେ, ତାହା ଏନ୍ଡିଏ ସରକାର ବିଗତ ମାସେ ଧରି ଦେଶରେ ସୃଷ୍ଟି କରିଥିବା ଘୃଣା ବାତାବରଣର ପରିଣାମ। କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଏବଂ ଭାଜପା ଏମ୍ପି ପରଭେଶ ବର୍ମାଙ୍କୁ ସେମାନଙ୍କ ବିବାଦୀୟ ମନ୍ତବ୍ୟ ପାଇଁ ନିର୍ବାଚନ ପ୍ରଚାରରୁ ବାଦ୍ ଦେଇ ନିର୍ବାଚନ କମିଶନ ଉଚିତ ପଦକ୍ଷେପ ନେଇଛନ୍ତି। ସେହିପରି ସିପିଆଇ ସାଧାରଣ ସମ୍ପାଦକ ଡି. ରାଜା କହିଛନ୍ତି, ଜାମିଆ ଗୁଳିକାଣ୍ଡ ହେଉଛି ନିର୍ବାଚନ ପ୍ରଚାର ବେଳେ ଭାଜପା ନେତାଙ୍କ ବିବାଦୀୟ ମନ୍ତବ୍ୟର ପ୍ରତ୍ୟକ୍ଷ ପରିଣାମ। ‘ବିଶ୍ୱାସଘାତଙ୍କୁ ଗୁଳି କର’ ବୋଲି ସ୍ଲୋଗାନ ଦେଇଥିବା ଅନୁରାଗ ଠାକୁରଙ୍କୁ ତୁରନ୍ତ ଗିରଫ କରାଯାଉ ବୋଲି ସେ ଦାବି କରିଛନ୍ତି।
