ନୂଆଦିଲ୍ଲୀ, ୧୮ା୪- ଆଗଧାଡ଼ିରେ ରହି କରୋନା ମୁକାବିଲା କରୁଥିବା ଯୋଦ୍ଧାଙ୍କୁ ସମ୍ମାନ ଜଣାଇଛି ଗୁଗୁଲ। ସର୍ଚ୍ଚ ଇଞ୍ଜିନ ଗୁଗୁଲ ଡୁଡୁଲସ୍ ସିରିଜରେ ଶନିବାର ସମସ୍ତ ଜରୁରିକାଳୀନ ସେବା କର୍ମଚାରୀଙ୍କୁ ଏକକାଳୀନ ଉପସ୍ଥାପନ କରି ସେମାନଙ୍କୁ ଧନ୍ୟବାଦ ଜଣାଯାଇଛି। ସମସ୍ତ ଡାକ୍ତର କର୍ମଚାରୀ, ଜନସ୍ବାସ୍ଥ୍ୟ, ପରିମଳ କର୍ମଚାରୀ, କୃଷକ, ଗବେଷଣାରତ କର୍ମଚାରୀ, ଗ୍ରୋସରୀ, ଖାଦ୍ୟସେବା, ପରିବହନ, ବିତରଣ, ଶିଶୁ ଯତ୍ନ କର୍ମଚାରୀ, ପ୍ୟାକେଜିଂ, ଶିପିଂ କର୍ମଚାରୀ ପ୍ରମୁଖଙ୍କୁ ଏହି ଆଇକନ ମାଧ୍ୟମରେ କୃତଜ୍ଞତା ଜଣାଯାଇଛି ।ଏହି କୋଲାଜ ଆଇକନରେ ଗୁଗୁଲ ବନାନ ପାଇଁ ଥିବା ‘ଓ’ରେ ଏହି ଯୋଦ୍ଧାମାନଙ୍କୁ ଦର୍ଶାଯାଇଛି ଓ ମଝିରେ, ଚାରିପାଖରେ ହାର୍ଟ ବା ଲଭ୍ ଇମେଜ ରହିଛି ।
କୋଭିଡ-୧୯ ସମଗ୍ର ବିଶ୍ୱକୁ ପ୍ରଭାବିତ କରିଥିବା ସମୟରେ ଲୋକେ ବର୍ତ୍ତମାନ ଅଧିକ ମାତ୍ରାରେ ପରସ୍ପରକୁ ସାହାଯ୍ୟ କରିବାକୁ ଏକାଠି ହେଉଛନ୍ତି। ସେମାନଙ୍କ ମଧ୍ୟରୁ ଆଗଧାଡ଼ିରେ ରହି କାମ କରୁଥିବା ବ୍ୟକ୍ତିମାନଙ୍କୁ ଚିହ୍ନିବା ଏବଂ ସମ୍ମାନ ଜଣାଇବା ପାଇଁ ଏପ୍ରିଲ ୬ରୁ ଏହି ଡୁଡୁଲ ସିରିଜ ଆରମ୍ଭ କରାଯାଇଛି ବୋଲି ଡୁଡୁଲ ଟିମ୍ ପକ୍ଷରୁ ଏକ ବିବୃତ୍ତିରେ କୁହାଯାଇଛି। ପ୍ରତ୍ୟେକ ଦିନ ଗୋଟିଏ ଲେଖାଏଁ ଜରୁରିକାଳୀନ ବିଭାଗର କର୍ମଚାରୀଙ୍କୁ ଏଥିରେ ସ୍ଥାନିତ କରାଯାଉଥିବାବେଳେ ଶନିବାର ସମସ୍ତଙ୍କୁ ମିଶାଇ ଏହି ଆଇକନରେ ରଖାଯାଇଛି। ଏଥିସହ ସ୍ବାସ୍ଥ୍ୟ ମନ୍ତ୍ରଣାଳୟ ଏବଂ ବିଶ୍ୱ ସାସ୍ଥ୍ୟ ସଙ୍ଗଠନ ପକ୍ଷରୁ ଦିଆଯାଉଥିବା ସମସ୍ତ ତଥ୍ୟ ଏବଂ ସଂକ୍ରମଣ ରୋକିବାକୁ ନିଆଯାଉଥିବା ବିଭିନ୍ନ ପଦକ୍ଷେପ ସମ୍ପର୍କରେ ମଧ୍ୟ ୱେବସାଇଟରେ ସୂଚନା କରାଯାଉଛି ବୋଲି ଏହି ଟିମ୍ ପ୍ରକାଶ କରିଛି।
