ନୂଆଦିଲ୍ଲୀ,୧୦ା୨(ଆଇଏଏନ୍ଏସ୍): ନୂଆଦିଲ୍ଲୀସ୍ଥିତ ଗାର୍ଗୀ କଲେଜର କେତେଜଣ ଛାତ୍ରୀ ଯୌନ ଉତ୍ପୀଡ଼ନର ଶିକାର ହୋଇଛନ୍ତି। ଏକ ସାଂସ୍କୃତିକ କାର୍ଯ୍ୟକ୍ରମ ଚାଲିଥିବାବେଳେ ସେମାନଙ୍କ ସହ ଅଶାଳୀନ ବ୍ୟବହାର କରାଯାଇଥିବା ଅଭିଯୋଗ ହୋଇଛି। ଯୌନ ଉତ୍ପୀଡ଼ନ ବେଳର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଏହାକୁ ନେଇ ଛାତ୍ରୀଛାତ୍ରମାନେ ପୀଡ଼ିତାଙ୍କ ସମର୍ଥନରେ ରବିବାର ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରି ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯାଉ ବୋଲି ଡେମୋକ୍ରାଟିକ୍ ଷ୍ଟୁଡେଣ୍ଟସ ଫେଡେରେଶନ୍ (ଡିଏସ୍ଏଫ୍) ପକ୍ଷରୁ ଦାବି କରାଯାଇଛି।
ୟୁନିଭର୍ସିଟିର ଗାର୍ଗୀ କଲେଜରେ ବାର୍ଷିକ ସାଂସ୍କୃତିକ ମହୋତ୍ସବ ‘ରେଭରି’ ଚାଲିଥିଲା। ଗତ ୬ ତାରିଖରେ ଏହାର ତୃତୀୟ ଦିନ ମହୋତ୍ସବ ପାଳନ କରାଯାଉଥିବାବେଳେ ଘଟିଥିଲା ଅଭାବନୀୟ ଘଟଣା। ରାଜନୀତି ବିଜ୍ଞାନର ଜଣେ ଦ୍ୱିତୀୟ ବର୍ଷ ଛାତ୍ରୀ ନିଜ ନାମ ଗୋପନ ସର୍ତ୍ତରେ ତାଙ୍କ ଅନୁଭୂତି ବଖାଣିଛନ୍ତି। ସେ କହିଛନ୍ତି, ସେଦିନ ସନ୍ଧ୍ୟା ପ୍ରାୟ ୬ଟାରେ କଲେଜ ପଡ଼ିଆରେ ଏଭଳି ଭିଡ଼ ଲାଗିଥିଲା ଯେ, କିଏ କୁଆଡ଼େ ହଲ୍ଚଲ୍ ହେବା ପାଇଁ ମଧ୍ୟ ସ୍ଥାନ ନ ଥିଲା। ମୋ ସହ ମୋର ଦୁଇଜଣ ବାନ୍ଧବୀ ଥିଲେ। ଭିଡ଼ ଭିତରେ ମୁଁ ହଜି ନ ଯିବି ବୋଲି ସେମାନେ ମୋ ହାତ ଧରିଥିଲେ। କାରଣ ଜାମର ଯୋଗୁ ପଡ଼ିଆରେ ଫୋନ୍ ଲାଗୁ ନ ଥିଲା। ହଠାତ୍ ପଛପଟୁ ପ୍ରବଳ ଚାପ ଆସିବାରୁ ମୋ ହାତ ଚାପି ହୋଇଯାଇଥିଲା। ୧୦-୧୫ ମିନିଟ ଧରି ମୁଁ ସାଙ୍ଗମାନଙ୍କୁ ପାଇ ନ ଥିଲି। ସେହି ସମୟ ଭିତରେ ମୁଁ ୩ ଥର ଯୌନ ଉତ୍ପୀଡ଼ନର ଶିକାର ହୋଇଥିଲି। କେହି କେହି ମୋ ଦେହକୁ ଭିଡ଼ି ଧରିଥିଲେ। ଏପରି କି କେହି ଜଣେ ସ୍କର୍ଟ ଭିତରେ ହାତ ପୂରାଇ ଦେଇଥିଲେ। ଅସମ୍ଭାଳ ଭିଡ଼ ଯୋଗୁ ମୁଁ ସେଥିରୁ ମୁକୁଳି ପାରି ନ ଥିଲି। ୧୫ ମିନିଟ ପରେ ମୁଁ ବହୁ କଷ୍ଟରେ ବାହାରିବାରେ ସକ୍ଷମ ହୋଇଥିଲି। ଷ୍ଟଲ୍ ପଛପଟ ଏକ ଖାଲି ସ୍ଥାନରେ ପହଞ୍ଚତ୍ବା ପରେ ଯାହା ଦେଖିଲି ସେଥିରେ ଚକିତ ହୋଇଯାଇଥିଲି। ଜଣେ ୩୦-୩୫ ବର୍ଷୀୟ ଯୁବକ ମୋତେ ଦେଖି ହସ୍ତମୈଥୁନ ଆରମ୍ଭ କରିଦେଇଥିଲେ। ସେଠୁ ଦୌଡ଼ି ପଳାଇଆସିଥିଲି ବୋଲି ଛାତ୍ରୀ ଜଣକ କହିଛନ୍ତି।
ଜଣେ ଛାତ୍ରୀ କହିଛନ୍ତି ଯେ, ଅପରାହ୍ନ ୩ଟାରୁ ସାଢ଼େ ୩ଟା ମଧ୍ୟରେ କେତେଜଣ ଯୁବକ ପ୍ରବେଶପଥ ଦେଇ ଧସେଇ ପଶିଥିଲେ। ୩୦୦ରୁ ୪୦୦ ଲୋକ କଲେଜକୁ ଆସିବାବେଳେ ଗେଟ୍ରେ କେହି ସୁରକ୍ଷା କର୍ମୀ କି ବାଉନ୍ସର ନ ଥିଲେ। ଯୌନ ଉତ୍ପୀଡ଼ନର ଶିକାର ହେବା ପରେ ପ୍ରିନ୍ସପାଲ ପ୍ରୋମିଲା କୁମାରଙ୍କୁ ଜଣାଇଥିଲେ। ହେଲେ ପ୍ରିନ୍ସପାଲ କହିଥିଲେ, ତୁମେ ଯଦି ଏତେ ଅସୁରକ୍ଷିତ ମନେକରୁଛ, ତେବେ ଏଠାକୁ ଆସିବାର ନ ଥିଲା। ଅନ୍ୟପକ୍ଷରେ ଛାତ୍ରୀଙ୍କ ଏହି ଅଭିଯୋଗକୁ ପ୍ରିନ୍ସପାଲ ଖଣ୍ଡନ କରିଛନ୍ତି। ଡିଏସ୍ଏଫ୍ ପକ୍ଷରୁ ରବିବାର ବିକ୍ଷୋଭ ପ୍ରଦର୍ଶନ କରାଯାଇଛି। କଲେଜ ପ୍ରଶାସନର ଅବହେଳା ଓ ଢିଲା ସୁରକ୍ଷା ବ୍ୟବସ୍ଥା ଯୋଗୁ ଏପରି କାଣ୍ଡ ଘଟିଛି। ଅନୁପ୍ରବେଶକାରୀ ଯୁବକମାନେ ଗୈରିକ ପତାକା ଉଡ଼ାଇ ‘ଜୟ ଶ୍ରୀରାମ’ ସ୍ଲୋଗାନ ଦେଉଥିଲେ। ସେମାନେ ଛାତ୍ରୀମାନଙ୍କ ସହ ଅତ୍ୟନ୍ତ ଖରାପ ବ୍ୟବହାର କରିଛନ୍ତି। କେତେଜଣ ଛାତ୍ରୀଙ୍କୁ ବାଥ୍ରୁମ୍ ଭିତରେ ବନ୍ଦକରି ଦୁର୍ବ୍ୟହାର କରାଯାଇଥିଲା। ଏହି କାଣ୍ଡରେ ସମ୍ପୃକ୍ତ ଦୋଷୀଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉ ବୋଲି ଡିଏସ୍ଏଫ୍୍ ପକ୍ଷରୁ ଜାରି ଏକ ବିବୃତିରେ ଦାବି କରାଯାଇଛି।