ନୂଆଦିଲ୍ଲୀ,୨୧।୪(ପି.ଟି.): କୋଭିଡ-୧୯ ସଂକ୍ରମଣକୁ ଦୃଷ୍ଟିରେ ରଖି ଭାରତୀୟ କିମ୍ବଦନ୍ତୀ ବ୍ୟାଟ୍ସମ୍ୟାନ ସୁନୀଲ ଗାଭାସ୍କର ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଦେଇଛନ୍ତି। ଭାରତ ଓ ଅଷ୍ଟ୍ରେଲିଆ ମଧ୍ୟ ଟି୨୦ ବିଶ୍ୱକପ୍ ଆୟୋଜନ ନେଇ ଅଦଳବଦଳ କରିବାକୁ ସେ ପ୍ରସ୍ତାବ ଦେଇଛନ୍ତି। ଅଷ୍ଟ୍ରେଲିଆ ଚଳିତ ବର୍ଷ ୨୦୨୦ ବିଶ୍ୱକପ ଆୟୋଜନ କରିବ। ସେହିପରି ଭାରତ ୨୦୨୧ରେ ମଧ୍ୟ ଏହି ମେଗା ଇଭେଣ୍ଟ ଆୟୋଜନ କରିବ। କିନ୍ତୁ ଭାରତ ଓ ଅଷ୍ଟ୍ରେଲିଆ ମଧ୍ୟରେ ଏହି ଇଭେଣ୍ଟର ଆୟୋଜନ ନେଇ ଅଦଳବଦଳ ହେବା ଉପରେ ସେ ମତ ରଖିଛନ୍ତି। ଆସନ୍ତା ବର୍ଷ ବଦଳରେ ଭାରତ ଚଳିତ ବର୍ଷ ଓ ଚଳିତ ବର୍ଷ ବଦଳରେ ଅଷ୍ଟ୍ରେଲିଆ ଆସନ୍ତା ବର୍ଷ ଟି୨୦ ବିଶ୍ୱକପ୍ ଆୟୋଜନ କରନ୍ତୁ ବୋଲି କହିଛନ୍ତି।
କୋଭିଡ-୧୯ ସଂକ୍ରମଣ କାରଣରୁ ବିଶ୍ୱକ୍ରୀଡ଼ା ଏବେ ସ୍ଥାଣୁ ପ୍ରାୟ ହୋଇଯାଇଛି। ଅଷ୍ଟ୍ରେଲିଆରେ ଆଗାମୀ ଅକ୍ଟୋବର ୧୮ରୁ ନଭେମ୍ବର ୧୫ ତାରିଖ ମଧ୍ୟରେ ଟି୨୦ ବିଶ୍ୱକପ ଖେଳାଯିବ। ତେବେ ଏହି ଭାଇରସ୍ କାରଣରୁ ବିଶ୍ୱକପ୍ ଆୟୋଜନ ଏବେ ଅନିଶ୍ଚିତତା ଆଡକୁ ଚାଲିଯାଇଛି। ପୁଣି ଅଷ୍ଟ୍ରେଲିଆ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ତା’ର ସୀମା ସିଲ କରିଛି। ଟୁର୍ନାମେଣ୍ଟ ଅକ୍ଟୋବର ମଝିରେ ଆରମ୍ଭ ହେଉଥିବାରୁ ଏହାର ଆୟୋଜନ ନିଶ୍ଚିତ ଭାବେ କଷ୍ଟକର ବୋଲି ଗାଭାସ୍କର କହିଛନ୍ତି। ଏପଟେ ଯଦି ଭାରତରେ କରୋନା ଭାଇରସ ସଂକ୍ରମଣ ସମସ୍ୟାର ସମାଧାନ ହୁଏ ତେବେ ଭାରତ ଏହି ଟୁର୍ନାମେଣ୍ଟକୁ ଅକ୍ଟୋବର-ନଭେମ୍ବରରେ ଆୟୋଜନ କରି ପାରିବ। ଠିକ୍ ସେହିପରି ଅସନ୍ତାବର୍ଷ ଏହି ସମୟରେ ଅଷ୍ଟ୍ରେଲିଆ ଟି୨୦ ବିଶ୍ୱକପ୍ ଆୟୋଜନ କରିବା ନେଇ କୌଣସି ଅସୁବିଧା ନାହିଁ ବୋଲି ସେ କହିଛନ୍ତି।
ପୁଣି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ନେଇ ମଧ୍ୟ ଅନିଶ୍ଚିତତା ଜାରି ରହିଛି ଓ ଏହା ସେପ୍ଟେମ୍ବରରେ ଆୟୋଜନ ହେବାର ସମ୍ଭାବାନ ରହିଛି। ଯଦି ଅଦଳବଦଳ ହୁଏ ତେବେ ଆଇପିଏଲ୍ ଟି୨୦ ବିଶ୍ୱକପ୍ ପୂର୍ବରୁ ଖେଳାଯିବ। ଏହା ଦ୍ୱାରା ଖେଳାଳିମାନେ ଅଭ୍ୟାସ କରିବାର ପର୍ଯ୍ୟାପ୍ତ ସୁଯୋଗ ପାଇବେ। ଏହାହେଲେ ନଭେମ୍ବରରେ ଟି୨୦ ବିଶ୍ୱକପ୍ ଓ ୟୁଏଇରେ ଡିସେମ୍ବରରେ ଏସିଆ କପ୍ ଆୟୋଜନ ନେଇ ସମସ୍ୟା ରହିବ ନାହିଁ ବୋଲି ଗାଭାସ୍କର କହିଛନ୍ତି। ତେବେ ପ୍ରଥମେ ଏ ସଂକ୍ରାନ୍ତରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଓ କ୍ରିକେଟ ଅଷ୍ଟ୍ରେଲିଆ ମଧ୍ୟରେ ପ୍ରଥମେ ଆଲୋଚନା ଓ ପରେ ଚୁକ୍ତି ହେବା ଆବଶ୍ୟକ। ଏହାପରେ ଯାଇ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)ର ଅନୁମତି ଲୋଡାଯିବ ବୋଲି ୭୦ ବର୍ଷୀୟ ଗାଭାସ୍କର କହିଛନ୍ତି।
