ନୂଆଗାଁ,୨୯ା୭ (ଡି.ଏନ.ଏ.): ନୟାଗଡ଼ ଜିଲା ନୂଆଗାଁ ବ୍ଲକ ତଥା ମହିପୁର ବନାଞ୍ଚଳ ଅଧୀନରେ ଥିବା ଜାକେଡା ପଞ୍ଚାୟତର ବିଭିନ୍ନ ଗ୍ରାମ ନିକଟକୁ ଫସଲ ଖାଇବା ପାଇଁ ବଣୁଆ ହାତୀ ପଶି ଆସୁଥିବାରୁ ଲୋକେ ଆତଙ୍କିତ ହୋଇ ରହିଛନ୍ତି। ଜାକେଡା ପଞ୍ଚାୟତର ଅନେକ ଆଦିବାସୀ ଗ୍ରାମ ହାତୀମୁଣ୍ଡା ଓ ପାଲଭା ପାହଡକୁ ଲାଗି ରହିଛି। ଉଭୟ ପାହାଡରେ ବଣୁଆ ହାତୀ ଚଳପ୍ରଚଳ କରୁଥିବାରୁ ସେମାନେ ବର୍ଷର ବିଭିନ୍ନ ସମୟରେ ଜଙ୍ଗଲ ଛାଡି ଫସଲ ଖାଇବା ଆଶାରେ ଗ୍ରାମ ନିକଟକୁ ଆସୁଥିବା ସ୍ଥାନୀୟ ଲୋକଙ୍କଠାରୁ ଜଣାପଡିଛି। ଏ ସମ୍ପର୍କରେ ଗ୍ରାମବାସୀ ବନ କର୍ମଚାରୀଙ୍କ ନିକଟରେ ଅଭିଯୋଗ କରିବା ପରେ ସେମାନେ ରାତିରେ ଆସି ହାତୀ ଘଉଡାଇଥାନ୍ତି। ଜଙ୍ଗଲ ମଧ୍ୟରେ ବନ୍ୟଜନ୍ତୁ ପିଇବା ପାଇଁ ପାଣିର କୌଣସି ବ୍ୟବସ୍ଥା କରାଯାଇ ନ ଥିବାରୁ ସେମାନେ ଗାଁ ମୁହାଁ ହେଉଥିବା ଜଣାପଡିଛି । ଶନିବାର ରାତି କରଚୁଲି ଗ୍ରାମକୁ ଲାଗି ଫାର୍ମ ହାଉସ ଭିତରେ ରହିଥିବା ପୋଖରୀକୁ ପାଣି ପିଇବା ପାଇଁ ଆସି ଅନେକ କ୍ଷତି କରିଥିବା କହିଛନ୍ତି ଫାର୍ମ ହାଉସ ଜଗୁଆଳି ଅମର ଜାନି। ୪-୫ଟି ହାତୀ ଟାଙ୍ଗିରି ମୁଣ୍ଡିଆ ଓ ମଶାଣି ମୁଣ୍ଡିଆରେ ରହୁଥିବା ବେଳେ ଆଉ ୧୦-୧୨ଟି ହାତୀ ଦୁରୁଙ୍ଗି ଜଙ୍ଗଲରେ ରହିଥିବା କୁହନ୍ତି ସ୍ଥାନୀୟ ଲୋକେ। ହାତୀ ଗାଁ ଭିତରକୁ ପଶି ଆସିବା ଭୟରେ ଲୋକେ ସନ୍ଧ୍ୟା ପୂର୍ବରୁ ତାଟିକବାଟ ଦେଇ ଘରେ ରହୁଛନ୍ତି। ସେହି ରାସ୍ତା ଦେଇ ଲୋକମାନେ ଯିବା ଆସିବା କରିବା ପାଇଁ ମଧ୍ୟ ଭୟ କରୁଛନ୍ତି। ବନ ବିଭାଗ ପକ୍ଷରୁ ହାତୀ ଘଉଡାଇବା ବ୍ୟବସ୍ଥା କରିବାକୁ ଜାକେଡା ପଞ୍ଚାୟତବାସୀ ଦାବି କରିଛନ୍ତି। ବନ୍ୟଜନ୍ତୁଙ୍କ ପାଇଁ ଜଙ୍ଗଲରେ ପାଣି ବ୍ୟବସ୍ଥା ବିଷୟରେ ମହିପୁର ରେଞ୍ଜର ସୁଧାଂଶୁ ଶେଖର ପଣ୍ଡାଙ୍କୁ ପଚାରିବାରୁ ସେ କହିଥିଲେ, ଜଙ୍ଗଲ ମଧ୍ୟରେ ପୋଖରୀ ଖୋଳିବା ଲାଗି ଆମେ ପ୍ରସ୍ତାବ ଦେଇଛୁ ଏବଂ ଯଥାଶୀଘ୍ର ଏହା ହୋଇଯିବ। ଏହାଛଡା ବର୍ତ୍ତମାନ ଆମେ ହାତୀ ଘଉଡାଇବା ବ୍ୟବସ୍ଥା କରୁଛୁ ବୋଲି ସେ କହିଛନ୍ତି।
