ଛତ୍ରପୁର, ୧୬।୫(ଡି.ଏନ୍.ଏ.)- ଚାଲି ଚାଲି ଅନ୍ୟ ରାଜ୍ୟକୁ ତଥା ନିଜ ଘରକୁ ଫେରୁଥିବା ଶ୍ରମିକଙ୍କୁ ଗଞ୍ଜାମ ଜ଼ିଲା ସୀମାନ୍ତ ଗିରିଶୋଳା ଚେକପୋଷ୍ଟ ଏବଂ ଜାତୀୟ ରାଜପଥରେ ପ୍ରଶାସନ ଓ ପୋଲିସ ପକ୍ଷରୁ ଉଦ୍ଧାର କରାଯାଉଛି। ପରେ ଉକ୍ତ ଶ୍ରମିକଙ୍କୁ ନିଜ ଜ଼ିଲାକୁ ବସ ଯୋଗେ ପଠାଯାଉଛି। ବସ୍ ଭଡ଼ା ଖର୍ଚ୍ଚ ମୁଖ୍ୟମନ୍ତ୍ରୀ ରିଲିଫ ଫଣ୍ଡ ରୁ ଭରଣା କରିବାକୁ ସରକାର ନିର୍ଦ୍ଦେଶ ଦେଇଥିଲେ। ବସ ଭଡା କରିବାକୁ ରାଜ୍ୟ ପରିବହନ ବିଭାଗର ଯୁଗ୍ମ ସଚିବ ଓ ସ୍ବତନ୍ତ୍ର ରିଲିଫ କମିଶନରଙ୍କଠାରୁ ଗଞ୍ଜାମ ଜ଼ିଲାପାଳଙ୍କୁ ଚିଠି ଆସିଥିଲା। ସେହିପରି ଗିରିଶୋଳା- ଆନ୍ଧ୍ର ସୀମାନ୍ତ ଚେକପୋଷ୍ଟରେ ଗଞ୍ଜାମ ଦେଇ ଏବଂ ଜାତୀୟ ରାଜପଥରେ ଚାଲି ଯାଉଥିବା ଉଦ୍ଧାର କରି ନିଜ ଜିଲାକୁ ବସ ଯୋଗେ ପଠାଇବା ବ୍ୟବସ୍ଥା କରିବାକୁ ଗଞ୍ଜାମ ଓ ବ୍ରହ୍ମପୁର ଏସ୍ପିଙ୍କୁ ନିର୍ଦ୍ଦେଶନାମା ଆସିଥିଲା। ଏହିପରିପ୍ରେକ୍ଷୀରେ ଗଞ୍ଜାମ ଜ଼ିଲାପାଳଙ୍କ ନିର୍ଦ୍ଦେଶ କ୍ରମେ ପ୍ରଶାସନିକ ଅଧିକାରୀ ଏବଂ ୨ ଏସ୍ପି ଙ୍କ ନିର୍ଦ୍ଦେଶ କ୍ରମେ ବିଭିନ୍ନ ଥାନା ପୋଲିସ ପକ୍ଷରୁ ବାହାର ଶ୍ରମିକଙ୍କୁ ନିଜ ଜ଼ିଲ୍ଲା କୁ ବସ ଯୋଗେ ପଠାଇବାର ବ୍ୟବସ୍ଥା କରାଯାଉଥିବା ସୂଚନା ଦିଆଯାଇଛି ଜାତୀୟ ରାଜପଥ ଓ ଆନ୍ଧ୍ର ସୀମାନ୍ତ ଚେକପୋଷ୍ଟରେ ୧୦ ଟି ବସ୍ ର ବ୍ୟବସ୍ଥା କରାଯାଇ ଶ୍ରମିକଙ୍କୁ ନିଜ ଜିଲାକୁ ପଠାଇବା ପାଇଁ ରାଜ୍ୟ ପରିବହନ ବିଭାଗ ପକ୍ଷରୁ ଜ଼ିଲାପାଳଙ୍କୁ ଚିଠି ଆସିଥିଲା।
ଗତ ୩ ଦିନ ମଧ୍ୟରେ ଗିରିଶୋଳା ଚେକପୋଷ୍ଟରେ ଚାଲି କରି ଯାଉଥିବା ୨୭୦ ଜଣ ଶ୍ରମିକଙ୍କୁ ଉଦ୍ଧାର କରାଯାଇଛି। ପୋଲିସ ପକ୍ଷରୁ ସେମାନଙ୍କୁ ବସ ଯୋଗେ ସେମାନଙ୍କ ଜ଼ିଲାକୁ ପଠାଇଛି। ଏଥିସହ ଉଭୟ ପୋଲିସ ଜ଼ିଲାର ବିଭିନ୍ନ ଥାନା ପୋଲିସ ଜାତୀୟ ରାଜପଥରୁ ମଧ୍ୟ ଶ୍ରମିକ ଙ୍କୁ ଉଦ୍ଧାର କରି ତାଙ୍କ ଜ଼ିଲାଜୁ ବସ ଯୋଗେ ପଠାଇଛି। ଶନିବାର ଗଞ୍ଜାମ ପୋଲିସ ଓ ପ୍ରଶାସନ ପକ୍ଷରୁ ମିଳିତ ଭାବେ ୪୬ ଜଣ ଶ୍ରମିକଙ୍କୁ ଉଦ୍ଧାର କରି କଳାହାଣ୍ଡି ଜ଼ିଲାକୁ ପଠାଇଛି। ସେହିପରି ଜାତୀୟ ରାଜପଥରେ ଚାଲ ଚାଲି ଯାଉଥିବା ୧୦୦ ରୁ ଉର୍ଦ୍ଧ୍ୱ ଶ୍ରମିକଙ୍କୁ ଝାରଖଣ୍ଡ, ବାଲେଶ୍ୱର ଓ ଭଦ୍ରକକୁ ୨ ଟି ବସ ଯୋଗେ ପଠାଯାଇଛି। ସମସ୍ତ ଥାନାକୁ ଏସମ୍ପର୍କରେ ନିର୍ଦ୍ଦେଶ ଦିଆଯାଇଥିବା ଗଞ୍ଜାମ ଏସ୍ପି ବ୍ରିଜେଶ କୁମାର ରୟ ଗଣମାଧ୍ୟମକୁ ସୂଚନା ଦେଇଛନ୍ତି।
