ଗଞ୍ଜାମ,୧୫।୯(ଡି.ଏନ୍.ଏ.): ଗଞ୍ଜାମ ଜିଲା ପୋଲିସକୁ ଆଉ ଏକ ସଫଳତା ମିଳିଛି। ଶନିବାର ଦୁର୍ଦ୍ଦାନ୍ତ ଅପରାଧୀ ସୁଶାନ୍ତ ଓରଫ କୋକୋଙ୍କୁ ଏନ୍କାଉଣ୍ଟର ହୋଇଥିଲା। ଏହାର ୨୪ ଘଣ୍ଟା ନ ପୂରୁଣୁ ରବିବାର ଗଞ୍ଜାମ ବ୍ଲକ ପାଲୁର-କୃଷ୍ଣପ୍ରସାଦ ରାସ୍ତାରେ ଏନ୍କାଉଣ୍ଟର ହୋଇଛି। ଏଥିରେ ଦୁର୍ଦ୍ଦାନ୍ତ ଅପରାଧୀ ପୁଇଁତୋଳା ଗ୍ରାମର ପ୍ରମୋଦ ବାରିକ (୩୦) ଗୁରୁତର ହୋଇଛନ୍ତି। ପ୍ରମୋଦଙ୍କ ଡାହାଣ ଗୋଡ଼ରେ ଗୁଳିବାଜିଥିବାରୁ ତାଙ୍କୁ ପ୍ରଥମେ ଗଞ୍ଜାମ ପରେ ବ୍ରହ୍ମପୁର ମେଡିକାଲକୁ ସ୍ଥାନାନ୍ତର କରାଯାଇଛି। ତାଙ୍କଠାରୁ ୨ଟି ଜୀବନ୍ତ ଗୁଳି ସହ ୧ମାଉଜର ଜବତ କରାଯାଇଛି। ସେ ବିଜେଡି ନେତା ସୁଧୀର ପାଢ଼ୀଙ୍କ ଉପରକୁ ହୋଇଥିବା ବୋମାମାଡ ଘଟଣାରେ ସମ୍ପୃକ୍ତ ଥିବା ପୋଲିସ କହିଛି। ତାଙ୍କ ନାମରେ ବିଭିନ୍ନ ଥାନାରେ ଏକାଧିକ ମାମଲା ରହିଛି।
ସୂଚନାଯୋଗ୍ୟ, ପ୍ରମୋଦ ରମ୍ଭା ଥାନା ଅଞ୍ଚଳରେ ଥିବା ପୋଲିସ ଖବର ପାଇଥିଲା। ତାଙ୍କୁ ଧରିବାକୁ ଉଦ୍ୟମ କରୁଥିବା ବେଳେ ସେ ପୋଲିସ ଉପରକୁ ଗୁଳି ଚଳାଇଥିଲେ। ପରେ ପୋଲିସର ପାଲଟା ଗୁଳିରେ ସେ ଗୁରୁତର ହୋଇଛନ୍ତି।
