ଅନୁଗୋଳ ଅଫିସ୍, ୧୯।୩: କରୋନା ସନ୍ଦିଗ୍ଧଙ୍କ ନିମନ୍ତେ ପ୍ରତି ଜିଲାରେ ପଞ୍ଚାୟତ ଓ ସଦର ମହକୁମାର ବିଦ୍ୟାଳୟଗୁଡ଼ିକରେ କ୍ବାରାଣ୍ଟାଇନ୍ ହୋମ ଖୋଲିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଏହାକୁ ଦୃଷ୍ଟିରେ ରଖି ଅନୁଗୋଳରେ ମୋଟ୍ ୨୩୫ଟି କ୍ବାରାଣ୍ଟାଇନ୍ ହୋମ ଖୋଲିବ ବୋଲି ଜିଲାପାଳ ମନୋଜ କୁମାର ମହାନ୍ତି ସୂଚନା ଦେଇଛନ୍ତି। ଅନୁଗୋଳ ଜିଲାରେ ଥିବା ୨୨୫ଟି ପଞ୍ଚାୟତର ଗୋଟିଏ ଲେଖାଏଁ ସ୍କୁଲରେ କ୍ବାରାଣ୍ଟାଇନ୍ ହୋମ୍ ଖୋଲିବାକୁ ଥିବାବେଳେ ପ୍ରତି ସହରାଞ୍ଚଳରେ ୨ରୁ ୩ଟି ଲେଖାଏଁ ହୋମ୍ ଖୋଲିବାକୁ ପ୍ରସ୍ତୁତି ଆରମ୍ଭ ହୋଇଯାଇଛି। ପ୍ରତି ପଞ୍ଚାୟତରେ ଶହେ ଲୋକ ରହିବା ଭଳି ବିଦ୍ୟାଳୟରେ ଏହି ହୋମ ଖୋଲିବା ସାଙ୍ଗକୁ ବିଦ୍ୟୁତ, ପାନୀୟ ଜଳ, ଖାଦ୍ୟ ଓ ଶୌଚାଳୟର ବ୍ୟବସ୍ଥା କରାଯିବ। ସେହିପରି ଅନୁଗୋଳ ସହରରେ ମଧ୍ୟ ଏହି ଗୃହ ଖୋଲିଛି। ପ୍ରଥମେ ଆଦର୍ଶ ବିଦ୍ୟାଳୟରେ ୩ ଶହ, ଅନୁଗୋଳ ବାଳିକା ଉଚ୍ଚ ବିଦ୍ୟାଳୟରେ ଶହେ ଓ ଅନୁଗୋଳ ଟାଉନ୍ ହାଇସ୍କୁଲରେ ଶହେ ଜଣ ରହିବା ଭଳି ହୋମ୍ ଖୋଲାଯିବ। ବିଦେଶ କିମ୍ବା ରାଜ୍ୟ ବାହାରୁ ଆସୁଥିବା ଲୋକଙ୍କ ଘରେ ସୁବିଧା ନ ଥିଲେ ଏହି କ୍ବାରାଣ୍ଟାଇନ୍ ହଲରେ ୧୪ ଦିନ ରହିବା ପରେ ତାଙ୍କ ଘରକୁ ଛଡ଼ାଯିବ ବୋଲି ସୂଚନା ଦିଆଯାଇଛି। ଯଦି ଏହି ଗୃହରେ ରହିବା ସମୟରେ କିଛି କରୋନାର ଲକ୍ଷଣ ଦେଖାଦିଏ, ତେବେ ଜିଲା ମୁଖ୍ୟ ଚିକିତ୍ସାଳୟରେ ଖୋଲିଥିବା ଆଇସୋଲେଶନ୍ ୱାର୍ଡ଼ରେ ରଖାଯିବାର ବ୍ୟବସ୍ଥା କରାଯାଇଛି।
