ନୂଆଦିଲ୍ଲୀ, ୨୮-୮: ଦେଶର ଆର୍ଥତ୍କ ଅଭିବୃଦ୍ଧି ହାର ଖସୁଛି। ଏଥିରେ ତୁରନ୍ତ ସୁଧାର ଆସିବାର ସମ୍ଭାବନା କମ୍ ରହିଥିବା ବଜାର ବିଶେଷଜ୍ଞମାନେ କହୁଛନ୍ତି। ଦେଶ ମଧ୍ୟରେ ବିଗିଡିଥିବା ଆର୍ଥତ୍କ ଢାଞ୍ଚାରେ ତ୍ୱରିତ ଉନ୍ନତି ଆସୁ ନ ଥିବାରୁ ଏହାର ପ୍ରଭାବ ଅର୍ଥନୈତିକ ଅଭିବୃଦ୍ଧି ଉପରେ ପଡୁଥିବା ଜଣାପଡିଛି। ଇନ୍ ଏଣ୍ଡ ବ୍ରାଡଷ୍ଟ୍ରିଟ ଇକୋନୋମି ଅବଜରଭର ତଥ୍ୟ ମୁତାବକ ଔଦ୍ୟୋଗିକ ଉତ୍ପାଦନ ସୂଚୀ(ଆଇଆଇପି) ଅଭିବୃଦ୍ଧି ହାର ଶୀଥିଳ ରହିବା ନେଇ ଆଶଙ୍କା କରାଯାଇଛି। ଦେଶର ମାନଫାକଚରିଂ କ୍ଷେତ୍ର ବିଭିନ୍ନ ଚ୍ୟାଲେଞ୍ଜ ଦେଇ ଗତି କରୁଛି। ଜୁଲାଇ ମାସରେ ଆଇଆଇପି ୨.୫%ରୁ ୩% ଅଭିବୃଦ୍ଧି ହାସଲ କରିପାରେ। ଅର୍ଥନୈତିକ ବିକାଶଧାରାକୁ ତ୍ୱରାନ୍ବିତ କରିବା ଲାଗି ଅର୍ଥମନ୍ତ୍ରୀ ନିର୍ମଳା ସୀତାରାମନଙ୍କ ଘୋଷଣା ଏବଂ ରିଜର୍ଭ ବ୍ୟାଙ୍କର ବିଭିନ୍ନ ପଦକ୍ଷେପ କମ୍ପାନୀଗୁଡିକ ଲାଗି କିଛିଟା ଆଶ୍ୱସ୍ତି ଆଣିପାରେ। ଏହାବାଦ ବିଭିନ୍ନ କ୍ଷେତ୍ରରେ ରହିଥିବା ଚ୍ୟାଲେଞ୍ଜକୁ ଧ୍ୟାନରେ ରଖି ଆର୍ଥତ୍କ ପ୍ୟାକେଜ ଆସିବାର ଆବଶ୍ୟକତା ରହିଛି ବୋଲି ବିଶେଷଜ୍ଞମାନେ କହିଛନ୍ତି।
ଇନ୍ ଆଣ୍ଡ ବ୍ରାଡଷ୍ଟ୍ରିଟ ଇଣ୍ଡିଆର ମୁଖ୍ୟ ଅର୍ଥନୀତଜ୍ଞ ଅରୁଣ ସିଂ କହିଛନ୍ତି ଯେ, ବିଶ୍ୱ ଏବଂ ଘରୋଇ ବଜାରରେ ରହିଥିବା ବିଭିନ୍ନ ଅସୁବିଧାର ପ୍ରଭାବ ଦେଶର ତ୍ୱରିତ ଅଭିବୃଦ୍ଧି ରାସ୍ତାରେ ବାଧକ ହେଉଛି। ଏଥି ଲାଗି ଅଭିବୃଦ୍ଧି ଧାରା ପ୍ରଭାବିତ ହେଉଛି। ଦେଶର ଆର୍ଥତ୍କ ଢାଞ୍ଚାରେ ଆସିଥିବା ପ୍ରଭାବକୁ ତୁରନ୍ତ ସମାଧାନ କରିବା ଏତେଟା ସହଜ ନୁହେଁ। ସରକାର ଅର୍ଥନୀତିର ବିଭିନ୍ନ ଦିଗକୁ ବିଚାର କରିବା ସହ ସମାଧାନ ଲାଗି ହସ୍ତକ୍ଷେପ କରିବାର ଆବଶ୍ୟକତା ରହିଛି। ଏହା ଦ୍ୱାରା ଅର୍ଥନୀତିକୁ ନେଇ ରହିଥିବା ଖାଉଟିଙ୍କ ଧାରଣା ବଦଳିବ ଏବଂ ଘରୋଇ କ୍ଷେତ୍ର ନିବେଶ ବଢାଇବାରେ ସହାୟତା କରିବ। ଶେୟାର ବଜାର ନିବେଶଙ୍କ ଲାଗୁ ହେଉଥିବା ସରଚାର୍ଜକୁ ସରକାର ଶୁକ୍ରବାର ପ୍ରତ୍ୟାହାର କରିଥିବା ବେଳେ ଷ୍ଟାର୍ଟଅପଗୁଡିକର ଏଞ୍ଜେଲ ନିବେଶ ଉପରେ ଟିକସରୁ ମୁକ୍ତି, ଅଟୋ ସେକ୍ଟର ଅସୁବିଧା ଦୂରୀକରଣ ଲାଗି ପଦକ୍ଷେପ, ରାଷ୍ଟ୍ରାୟତ୍ତ ବ୍ୟାଙ୍କଗୁଡିକ ଲାଗି ୭୦,୦୦୦ କୋଟି ଟଙ୍କାର ପୁଞ୍ଜି ବ୍ୟବସ୍ଥା ସମ୍ପର୍କରେ ଘୋଷଣା କରିଛନ୍ତି। ଏହାବାଦ ବ୍ୟାଙ୍କଗୁଡିକ ସେମାନଙ୍କ ସୁଧହାର ରିଜର୍ଭ ବ୍ୟାଙ୍କର ରେପୋ ରେଟ ସହ ଯୋଡିବାକୁ ପଦକ୍ଷେପ ନିଆଯାଇଛି। ଏହା ଦ୍ୱାରା ବାସଗୃହ ଏବଂ ଯାନ ଋଣ ଶସ୍ତା ହେବ ବୋଲି ଆଶା କରାଯାଉଛି।
