ପୁରୀ ଅଫିସ,୭ା୫ : ଲକ୍ଡାଉନ ପରିପ୍ରେକ୍ଷୀରେ କୌଣସି ସରକାରୀ ସହଯୋଗ ପାଇ ନ ଥିବାରୁ ପୁରୀ ଖବରକାଗଜ ବିତରକମାନେ କ୍ଷୋଭ ପ୍ରକାଶ କରିଛନ୍ତି। ଏକ ପ୍ରେସ୍ ବିଜ୍ଞପ୍ତି ମାଧ୍ୟମରେ ବିତରକମାନେ ଜଣାଇଛନ୍ତି ଯେ, କରୋନା ଯୋଗୁ ଖବରକାଗଜ ବିତରଣରେ ସମସ୍ୟା ହେବାରୁ ସେମାନେ ବିତରଣ ବନ୍ଦ କରିଦେଇଥିଲେ। ସରକାରଙ୍କ ନିୟମ ମାନି ଘରେ ରହିଥିଲେ। ତେଣୁ ପରିବାର ପ୍ରତିପୋଷଣ କରିବା କଷ୍ଟକର ହେଉଛି। ଏଭଳି ଏକ ଘଡ଼ିସନ୍ଧି ମୁହୂର୍ତ୍ତରେ ସରକାର କିମ୍ବା କୌଣସି ଅନୁଷ୍ଠାନ ଦୃଷ୍ଟି ଦେବା ପାଇଁ ବିତରକମାନେ ନିବେଦନ କରିଛନ୍ତି। ଗଣମାଧ୍ୟମ ପ୍ରତିନିଧିଙ୍କ ଭଳି ସେମାନେ ମଧ୍ୟ ଖରା, ବର୍ଷା, ଶୀତ କାକରରେ ଘର ଘର ବୁଲି ଖବରକାଗଜ ବିତରଣ କରିଥାନ୍ତି । ଏହି ସମୟରେ ଅନେକ ଦୁର୍ଘଟଣାର ସମ୍ମୁଖୀନ ହୋଇଥାନ୍ତି। ଏଥିପାଇଁ ସେମାନଙ୍କ ପରିବାରକୁ ସର୍ବସ୍ବାନ୍ତ ହେବାକୁ ପଡ଼ିିଥାଏ। ଏଭଳି ନଜିର ପୂର୍ବରୁ ରହିଛି। ସରକାର ଏ ଦିଗରେ ଦୃଷ୍ଟି ଦେବା ସହ ସେମାନଙ୍କୁ ବୀମାଭୁକ୍ତ କରିବା ପାଇଁ ଶାନ୍ତନୁ କୁମାର ସାହୁ, ଦିଲୀପ କୁମାର ମହାନ୍ତି, ବେଣୁଧର ସାହୁ, ବିଜୟ କୁମାର ସାହୁ, ବସନ୍ତ ପ୍ରଧାନ, ଚିତ୍ତରଞ୍ଜନ ସାହୁ, ଚନ୍ଦନ ମହାନ୍ତି ପ୍ରମୁଖ ବିତରକମାନେ ଦାବି କରିଛନ୍ତି।
