ନୂଆଦିଲ୍ଲୀ,୩୦।୪:ବର୍ତ୍ତମାନ ଚ୍ୟାଲେଞ୍ଜିଂ ସ୍ଥିତିରେ କ୍ଷତିଗ୍ରସ୍ତ ଶିଳ୍ପକ୍ଷେତ୍ରଗୁଡ଼ିକୁ ସରକାର ପ୍ୟାକେଜ ପ୍ରଦାନ କରିବେ। ଏ ନେଇ ବିସ୍ତୃତ ଭାବେ ବିଚାର କରାଯାଉଛି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମ୍ଓ) ଏ ଦିଗରେ ଶୀଘ୍ର ନିଷ୍ପତ୍ତି ନେବ ବୋଲି କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରୀ ନୀତିନ ଗଡକରୀ ବୁଧବାର ସୂଚନା ଦେଇଛନ୍ତି। ରିୟଲ ଇଷ୍ଟେଟ ସଂଘ ନାରେଡକୋ ସହ ସେ ଭିଡିଓ କନ୍ଫରେନ୍ସିଂ ଯୋଗେ ଆଲୋଚନା କରିଛନ୍ତି। ତାଙ୍କ ସହ ଜଡ଼ିତ କ୍ଷେତ୍ରଗୁଡିକରେ ଉପୁଜିଥିବା ସମସ୍ୟାକୁ ନେଇ ସେ ସରକାରଙ୍କୁ ଅବଗତ କରାଇଛନ୍ତି। ଏ ଦିଗରେ ଚୂଡ଼ାନ୍ତ ନିଷ୍ପତ୍ତି ପିଏମ୍ଓ ନେବ ବୋଲି ସେ ମତ ରଖିଛନ୍ତି। ସେ କହିଛନ୍ତି, ସରକାର ଶିଳ୍ପ ସହ ଛିଡ଼ା ହୋଇଛନ୍ତି ଯାହାବି ପଦକ୍ଷେପ ନିଆଯିବ ସେ ନେଇ ଲୋକମାନେ ଜାଣିପାରିବେ। ସରକାର ବିଭିନ୍ନ ଦିଗକୁ ନେଇ ବିଚାର କରୁଥିବା ବେଳେ ଯାହା ସମ୍ଭବ ସେ ଦିଗରେ ପଦକ୍ଷେପ ନେବେ। ସେହିଭଳି ଏମ୍ଏସ୍ଏମ୍ଇଗୁଡିକ ଲାଗି ଏକ ସ୍ବତନ୍ତ୍ର ନୀତି ଆଣିବାକୁ ସରକାର ଯୋଜନା ରଖିଛନ୍ତି ବୋଲି ସେ ମତବ୍ୟକ୍ତ କରିଛନ୍ତି। ଏବେ ଚାଇନାକୁ ନେଇ ବିଶ୍ୱ ସ୍ତରରେ ଯେଭଳି ଭାବନା ସୃଷ୍ଟି ହୋଇ ତାର ଲାଭ ଭାରତୀୟ ଶିଳ୍ପଜଗତ ନେବାର ସୁଯୋଗ ରହିଛି। ଦେଶର ଏମ୍ଏସ୍ଏମ୍ଇଗୁଡିକ କୃଷିଭିତ୍ତିକ ଶିଳ୍ପ ଉପରେ ଫୋକସ କରିବା ନେଇ ସେ ଆହ୍ବାନ ଦେଇଛନ୍ତି।
