ନୂଆଦିଲ୍ଲୀ,୨।୮- ଭାରତୀୟ କ୍ରିକେଟ ଦଳ ଓ୍ବେଷ୍ଟଇଣ୍ଡିଜ ବିପକ୍ଷରେ ଦୁଇ ଟି ୨୦ ମ୍ୟାଚ୍ ଖେଳିବା ପାଇଁ ଆମେରିକା ଗସ୍ତରେ ଯାଇଛି। ଫ୍ଲୋରିଡାଠାରେ ଶନିବାର ପ୍ରଥମ ଟି ୨୦ ମ୍ୟାଚ୍ ଖେଳାଯିବା ପୂର୍ବରୁ ଖେଳାଳିମାନେ ଅଭ୍ୟାସ କରିବା ସହ ସୋସିଆଲ ମିଡିଆରେ ଫଟୋ ଶେୟାର କରୁଛନ୍ତି। ନିକଟରେ ଅଧିନାୟକ ବିରାଟ କୋହଲି ମଧ୍ୟ ଦଳର ଅନ୍ୟ ସଦସ୍ୟଙ୍କ ସହ ଫଟୋକୁ ଟୁଇଟରରେ ଶେୟାର କରିଥିଲେ। ସେ ଏହାର କ୍ୟାପଶନ ଦେଇଥିଲେ ‘ସ୍କ୍ବାଡ’। ଏହି ଫଟୋରେ ରବୀନ୍ଦ୍ର ଜାଡେଜା, ନବଦୀପ ସାଇନି, ଖଲିଲ ଅହମ୍ମଦ, ଶ୍ରେୟାସ ଆୟାର, କ୍ରୁନାଲ ପାଣ୍ଡ୍ୟା, ଭୁବନେଶ୍ୱର କୁମାର ଓ ଲୋକେଶ ରାହୁଲ ଥିଲେ। କିନ୍ତୁ ଉପଅଧିନାୟକ ରୋହିତ ଶର୍ମା ନ ଥିଲେ। ଏଥିନେଇ ପ୍ରଶଂସକମାନେ ପ୍ରଶ୍ନ ଉଠାଇଛନ୍ତି। ବର୍ତ୍ତମାନ ଦଳର ଅଧିନାୟକ ଓ ତାଙ୍କ ଡେପୁଟିଙ୍କ ମଧ୍ୟରେ ମତପାର୍ଥକ୍ୟ ନେଇ ଆଲୋଚନା ହେଉଥିବାବେଳେ କୋହଲିଙ୍କ ଫଟୋରେ ରୋହିତଙ୍କ ଅନୁପସ୍ଥିତିରେ ନିଆଁରେ ଘିଅ ଢାଳିବା ଭଳି କାର୍ଯ୍ୟ କରିଛି। ବହୁ ପ୍ରଶଂସକ ରୋହିତ କେଉଁଠାରେ ବୋଲି ପ୍ରଶ୍ନ ଉଠାଇଛନ୍ତି। ଉଲ୍ଲେଖଥାଉ କି, ସେମିଫାଇନାଲରେ ପରାସ୍ତ ହୋଇ ଭାରତ ବିଶ୍ୱକପ୍ରୁ ବିଦାୟ ନେବା ପରେ ଦୁଇ ଖେଳାଳିଙ୍କ ମତ ପାର୍ଥକ୍ୟ ନେଇ ଗଣମାଧ୍ୟମରେ ଚର୍ଚ୍ଚା ଚାଲିଛି। ତେବେ ଓ୍ବେଷ୍ଟଇଣ୍ଡିଜ ଗସ୍ତ ପୂର୍ବରୁ କୋହଲି ଖବରଦାତା ସମ୍ମିଳନୀରେ ମତପାର୍ଥକ୍ୟ ଥିବା ଚର୍ଚ୍ଚକୁ ଖଣ୍ଡନ କରିଥିଲେ।
