ନୂଆଦିଲ୍ଲୀ,୧୩।୯(ପି.ଟି.): ନୂଆ କରି ନାମିତ ହୋଇଥିବା ଅରୁଣ ଜେଟ୍ଲୀ ଷ୍ଟାଡିୟମରେ ଡିଡିସିଏ ଏକ ନୂଆ ପ୍ୟାଭିଲିୟନ ଷ୍ଟାଣ୍ଡ ଉନ୍ମୋଚନ କରିଥିଲା। ଭାରତୀୟ ଅଧିନାୟକ ବିରାଟ କୋହଲିଙ୍କ ନାମରେ ଏହାକୁ ନାମିତ କରାଯାଇଛି। କିଛି ଦିନ ତଳେ ମହେନ୍ଦ୍ର ସିଂ ଧୋନୀଙ୍କୁ ପଛରେ ପକାଇ କୋହଲି ସଫଳତମ ଟେଷ୍ଟ ଅଧିନାୟକର ମାନ୍ୟତା ପାଇଥିଲେ। ଏହି ଅବସରରେ ୧୯ ବର୍ଷରୁ କମ୍ ଖେଳାଳିରୁ କୋହଲି କିପରି ଭାରତୀୟ ଅଧିନାୟକ ହେଲେ ସେ ନେଇ ଏକ ଶର୍ଟ ଭିଡିଓ ଓ ଏକ ଆନିମେଶନ ଫିଲ୍ମ ପ୍ରଦର୍ଶିତ ହୋଇଥିଲା। କୋହଲିଙ୍କ ନାମରେ ଷ୍ଟାଣ୍ଡ ନାମିତ କରିବାକୁ ଜେଟଲୀ ଅନୁମତି ଦେଇଥିଲେ ବୋଲି ଡିଡିସିଏ ଅଧ୍ୟକ୍ଷ ରଜତ ଶର୍ମା କହିଛନ୍ତି। ବିଶ୍ୱ କ୍ରିକେଟରେ କୋହଲି ଜଣେ ଶ୍ରେଷ୍ଠ ଖେଳାଳି। ତେଣୁ ତାଙ୍କ ନାମରେ ଷ୍ଟାଣ୍ଡ ନାମିତ କରାଯିବାରେ କୌଣସି ଅସୁବିଧା ନାହିଁ ବୋଲି ଜେଟଲୀ କହିଥିବା କଥା ରଜତ ସୂଚନା ଦେଇଥିଲେ। ଜବାହରଲାଲ ନେହେରୁ ଷ୍ଟାଡିୟମର ଓ୍ବେଟ ଲିଫ୍ଟିଙ୍ଗ୍ ହଲ୍ରେ ଏହି ଉନ୍ମୋଚନ ଉତ୍ସବ ଆୟୋଜିତ ହୋଇଥିଲା। ଏହି ଅବସରରେ ଜେଟଲୀଙ୍କ ପରିବାରବର୍ଗଙ୍କ ସହ କେନ୍ଦ୍ର କ୍ରୀଡ଼ାମନ୍ତ୍ରୀ କିରଣ ରିଜିଜୁ, ପୂର୍ବତନ କ୍ରୀଡ଼ାମନ୍ତ୍ରୀ ରାଜ୍ୟବର୍ଦ୍ଧନ ସିଂ ରାଠୋର, ଦିଲ୍ଲୀ ଭାଜପା ମୁଖ୍ୟ ମନୋଜ ତିଓ୍ବାରୀ, ପୂର୍ବତନ ଭାରତୀୟ ଅଧିନାୟକ କପିଳ ଦେବ ଓ ପୂର୍ବତନ ଭାରତୀୟ ଓପନର ଚେତନ ଚୌହାନ ଉପସ୍ଥିତ ଥିଲେ।
