ଢେଙ୍କାନାଳ ଅଫିସ, ୨।୩: ଡାକ୍ତରଙ୍କ ଚିକିତ୍ସାରେ ଅବହେଳା ଯୋଗୁ ଜଣେ ନବଜାତ ଶିଶୁକନ୍ୟାର ହାର୍ଟରେ ସମସ୍ୟା ସୃଷ୍ଟି ହୋଇଥିବା ଅଭିଯୋଗ ହୋଇଛି। ଏପରି ଅଭିଯୋଗ ଆଣିଛନ୍ତି ଢେଙ୍କାନାଳ ମହାବୀର ବଜାରରେ ରହୁଥିବା ସାର୍ଥକ ପଟ୍ଟନାୟକ ଏବଂ ତାଙ୍କ ସ୍ତ୍ରୀ ଶୁଚିସ୍ମିତା। ଏ ନେଇ ସମ୍ପୃକ୍ତ ଡାକ୍ତରଙ୍କୁ କାଠଗଡ଼ାକୁ ଟାଣିଛନ୍ତି ପଟ୍ଟନାୟକ ଦମ୍ପତି। ଏଥିସହ ତାଙ୍କ ବିରୋଧରେ କୋର୍ଟରେ ୧୦ କୋଟି ଟଙ୍କାର ଡ୍ୟାମେଜ୍ ସୁଟ୍ (କ୍ଷତିପୂରଣ) ମାମଲା ରୁଜୁ କରିଛନ୍ତି।
ସାର୍ଥକ ରବିବାର ଏକ ଖବରଦାତା ସମ୍ମିଳନୀରେ ସୂଚନା ଦେଇ କହିଛନ୍ତି, ସ୍ତ୍ରୀ ଗର୍ଭବତୀ ହେବା ପରେ ସ୍ତ୍ରୀରୋଗ ବିଶେଷଜ୍ଞ ଡା. ପ୍ରଶାନ୍ତ ସାମଲଙ୍କ ନିକଟରେ ଚିକିତ୍ସିତ ହେଉଥିଲେ। ୩ମାସ, ୭ ମାସ, ୫ମାସ, ୯ମାସରେ ଅଲ୍ଟ୍ରାସାଉଣ୍ଡ ସହ ଅନ୍ୟାନ୍ୟ ପରୀକ୍ଷା କରାଯାଇଥିଲା। ଜୟଗୋପାଳସାହିସ୍ଥିତ କଲ୍ୟାଣୀ ପଲ୍ଲି କ୍ଲିନିକରେ ଗତ ଡିସେମ୍ବର ୯ରେ କନ୍ୟା ସନ୍ତାନ ପ୍ରସବ ହୋଇଥିଲା। ଶିଶୁ ମାସକର ହେବାପରେ ଶରୀର ହଠାତ୍ ଅସୁସ୍ଥ ହେବାରେ ଲାଗିଲା। ସେମାନେ ୨୦୨୦ ଜାନୁୟାରୀ ୧୮ରେ ପ୍ରଥମେ କଟକ ଏବଂ ପରେ ହାଇଦ୍ରାବାଦରେ ଶିଶୁଟିର ଚିକିତ୍ସା କରାଇଥିଲେ। ଏହି ସମୟରେ ଛୁଆର ବାମପାର୍ଶ୍ୱ ହାର୍ଟରେ ସମସ୍ୟା ଥିବା ଜଣାପଡ଼ିଥିଲା। ୨୦୨୦ ଜାନୁୟାରୀ ୨୩ରେ ଉଭୟେ ଶିଶୁକୁ କୋଲକାତାରେ ପରୀକ୍ଷା କରାଇଥିଲେ। ହେଲେ ଏପରି ଜଟିଳ ରୋଗର କୌଣସି ଚିକିତ୍ସା ନ ଥିବା ଡାକ୍ତରମାନେ କହିଛନ୍ତି। ୪ଥର ଅଲ୍ଟ୍ରାସାଉଣ୍ଡ ସତ୍ତ୍ୱେ ରୋଗ ବିଷୟରେ ଡାକ୍ତର ଜାଣି ନ ପାରିବା ନେଇ ପ୍ରଶ୍ନ ଉଠାଇଛନ୍ତି ସାର୍ଥକ। ଏଥିସହ ଡାକ୍ତର ତାଙ୍କୁ ଅନ୍ଧାରରେ ରଖିଥିବା ଅଭିଯୋଗ କରିଛନ୍ତି। ଏ ନେଇ ସେ ଡାକ୍ତର ସାମଲଙ୍କ ବିରୋଧରେ ଆଇନଜୀବୀ ଦେବାଶିଷ ପଟ୍ଟନାୟକଙ୍କ ଜରିଆରେ ଏକ ଡ୍ୟାମେଜ୍ ସୁଟ୍ (ନଂ. ସିଏସ୍ ୧୪୯/୨୦, ତା. ୨୮ା୨ା୨୦ରିଖ)ରେ ଆବେଦନ କରିଛନ୍ତି ା
ଏ ନେଇ ଡା. ସାମଲ କୁହନ୍ତି, ସମ୍ପୃକ୍ତ ଦମ୍ପତିଙ୍କ ୭ବର୍ଷ ହେଲା ସନ୍ତାନ ହେଉ ନ ଥିଲା। ସେମାନେ ଆସି ଚିକିତ୍ସା କରିବା ପରେ ଭଲରେ ଡେଲିଭେରି ହୋଇଥିଲା। ଶିଶୁ ରୋଗ ବିଶେଷଜ୍ଞ ଛୁଆ ଭଲ ଥିବା କହିଥିଲେ। ଶିଶୁ ଜନ୍ମ ହେବାର ମାସକ ପରେ ହାର୍ଟ ଡିଜିଜ୍ ଥିବା ସୂଚନା ମିଳିଥିଲା। ସାର୍ଥକ ଏବଂ ତାଙ୍କ ସ୍ତ୍ରୀ ଯୋଗାଯୋଗ କରିଥିଲେ। ଯେହେତୁ ଏହି ରୋଗର ଚିକିତ୍ସା ସୁବିଧା ଓଡ଼ିଶାରେ ନାହିଁ, ତେଣୁ ସେମାନଙ୍କୁ ହାଇଦ୍ରାବାଦରେ ଚିକିତ୍ସା କରାଇବାକୁ ପରାମର୍ଶ ଦିଆଯାଇଥିଲା। ଚିକିତ୍ସାରେ କୌଣସି ଅବହେଳା କରାଯାଇନାହିଁ ବୋଲି ସେ ନିଜ ପ୍ରତିକ୍ରିୟାରେ କହିଛନ୍ତି।
